Qiegħed Int “Teħodha Kontra n-​Niggieża”?

FI ŻMINIJIET Bibliċi, niggieża​—virga twila li ġeneralment kellha ponta tal-​metall li taqtaʼ—kienet tintuża biex iġġiegħel l-​annimali jimxu u biex l-​annimali li jkunu qed iġorru tagħbijiet tqal jiġu gwidati. Jekk l-​annimal b’mod stinat kien jirreżisti t-​tingiż tan-​niggieża billi jimxi kontriha, x’kien se jkun ir-​riżultat? Minflok ma kien se jħoss serħan, hu kien sempliċement se jweġġaʼ lilu nnifsu.

Meta Ġesù Kristu rxoxta, hu tkellem dwar in-​niggieżi meta deher lir-​raġel, jismu Sawl, li kien fi triqtu biex jarresta xi wħud mid-​dixxipli taʼ Ġesù. F’nofs dawl qawwi li jgħammex, Sawl semaʼ lil Ġesù jgħid: “Sawl, Sawl, għaliex qiegħed tippersegwitani? Iebsa għalik li teħodha kontra n-​niggieża!” Billi kien jittratta lill-​Kristjani b’mod ħażin, Sawl kien qed jiġġieled kontra Alla, kien qed isegwi tip taʼ ħajja li kienet se tkun taʼ ħsara għalih innifsu.​—Atti 26:14.

Nistgħu aħna nkunu qed ‘niħduha kontra n-​niggieża’ mingħajr ma nkunu nafu? Il-​Bibbja tqabbel “kliem l-​għorrief” ma niggieżi, jew xpruni, li jimmotivawna biex nimxu fid-​direzzjoni t-​tajba. (Koħèlet 12:11) Il-​parir ispirat li hemm fil-​Kelma t’Alla jistaʼ jqanqalna u jiggwidana sew—jekk inħalluh. (2 Timotju 3:​16) Jekk nirreżistu l-​motivazzjonijiet li jagħtina, dan ikun taʼ ħsara għalina.

Sawl ħa kliem Ġesù bis-​serjetà, biddel ħajtu, u sar l-​appostlu Kristjan maħbub Pawlu. Jekk nisimgħu mill-​parir divin aħna wkoll se jkollna barkiet eterni.​—Proverbji 3:1-6.

[Sors tal-​Istampa f’paġna 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers