Qed Tużah il-​Ktejjeb Kif Nibdew u Nkomplu Diskussjonijiet Fuq Il-​Bibbja?

1. L-​appostlu Pawlu u Ġesù kif għallmu lil oħrajn?

¹ L-​appostlu Pawlu stinka biex ‘jirraġuna mill-​Iskrittura.’ (Atti 17:2, 3; 18:19) Peress li għamel hekk, hu imita lil Ġesù li spiss kien jikkwota mill-​Iskrittura u juża tixbihat biex jgħin lis-​semmiegħa tiegħu jifhmu x’inhi r-​rieda t’Alla. (Mt. 12:1-12) Il-​ktejjeb Kif Nibdew u Nkomplu Diskussjonijiet Fuq il-​Bibbja u l-​ktieb Reasoning ġew imħejjijin biex jgħinuna nagħmlu l-​istess.

2. Kif nistgħu nużaw il-​ktejjeb Kif Nibdew u Nkomplu Diskussjonijiet Fuq Il-​Bibbja meta nippreparaw introduzzjonijiet effettivi?

² Nippreparaw Introduzzjonijiet Effettivi: Mill-​paġna 2-7, il-​ktejjeb Kif Nibdew u Nkomplu Diskussjonijiet Fuq Il-​Bibbja fih ħafna introduzzjonijiet li jqanqlu l-​interess. Meta titgħallem introduzzjonijiet differenti u tużahom, speċjalment jekk tkopri t-​territorju spiss, iżżid il-​varjetà fil-​ministeru tiegħek u dan se jgħinek issir iktar flessibbli u effettiv meta tibda konversazzjoni. Meta nagħtu xiehda bit-​telefon jew nitkellmu fuq l-​interkom f’bini taʼ sigurtà kbira nistgħu naqraw l-​introduzzjonijiet direttament mill-​ktejjeb.

3. Xi nsibu f’paġni 7-16 tal-​ktejjeb li jistaʼ jgħinna fil-​ministeru tagħna?

³ X’Għandna Ngħidu Meta n-​Nies Joġġezzjonaw: Għala ma tantiċipax l-​oġġezzjonijiet li jistgħu jqumu fit-​territorju tiegħek u tieħu ftit minuti qabel tmur tippriedka biex tirrivedi xi suġġerimenti taʼ kif tistaʼ twieġeb minn paġni 7-16? Jistaʼ jkun hemm xi inkwilini li x’aktarx ikunu Buddisti, Ħindu, Lhud, jew Musulmani? Jekk inhu hekk, l-​informazzjoni f’paġni 13-16 se tkun t’għajnuna.

4. Kif nistgħu nużaw il-​ktieb Reasoning meta titqajjem mistoqsija jew suġġett kontroversjali?

⁴ Inwieġbu l-​Mistoqsijiet: Il-​ktieb Reasoning jistaʼ jgħinna wkoll meta titqajjem mistoqsija jew suġġett kontroversjali. Int tistaʼ sempliċement tgħid lill-​individwu li tixtieq turih xi ħaġa interessanti li għandek dwar is-​suġġett u toħroġ il-​ktieb Reasoning tiegħek. Ladarba s-​suġġetti huma mniżżlin f’ordni alfabetiku, mur fuq it-​titlu prinċipali li taħseb li fih l-​informazzjoni li għandek bżonn. Imbagħad ħares malajr lejn il-​mistoqsijiet li jkunu miktubin iktar skuri. Jekk ma tarax malajr dak li tkun qed tfittex, mur fl-​indiċi fuq wara. Meta ssib l-​informazzjoni adattata, aqraha direttament mill-​pubblikazzjoni. Jekk tkun qed tiddiskuti skrittura speċifika, tistaʼ ssib dak li jkollok bżonn f’paġna 445 taħt “Scriptures Often Misapplied” (L-Iskritturi li Spiss Jiġu Applikati Ħażin).

5. B’liema modi oħrajn nibbenefikaw meta nużaw il-​ktieb Reasoning?

⁵ Metodi Oħrajn Kif Nużaw il-​Ktieb Reasoning: Xi wħud iżommu kopja tal-​ktieb Reasoning fuq il-​post tax-​xogħol jew l-​iskola tagħhom biex jgħinhom iwieġbu mistoqsijiet bħal, ‘Għala ma tiċċelebrawx il-​festi?’ Xi żgħażagħ sabu t’għajnuna informazzjoni taħt it-​titli “Creation” (Ħolqien) u “Evolution” (Evoluzzjoni) biex jippreparaw għal xi suġġetti taʼ l-​iskola. Sejjer iżżur lil xi ħadd li hu marid jew li tilef lil xi maħbub fil-​mewt? L-​informazzjoni taħt it-​titlu “Encouragement” (Inkuraġġiment) tistaʼ tgħinek tipprovdi faraġ Skritturali. Il-​ktieb Reasoning fih ukoll informazzjoni t’għajnuna għal dawk li jippreparaw taħditiet u għal dawk li jikkonduċu l-​laqgħat tas-​servizz taʼ l-​għalqa.

6. X’inhi l-​mira tagħna meta nippridkaw?

⁶ Meta nippridkaw, il-​mira tagħna m’hijiex li nirbħu l-​argumenti; lanqas li sempliċement inwasslu l-​informazzjoni. Irridu nirraġunaw bis-​sengħa mill-​Iskrittura. Hekk kif nagħmlu użu tajjeb mill-​ktejjeb Kif Nibdew u Nkomplu Diskussjonijiet Fuq Il-​Bibbja u mill-​ktieb Reasoning, aħna nuru li qed noqogħdu attenti l-​ħin kollu għat-​tagħlim tagħna.—1 Tim. 4:16.