Ittra Mingħand il-Ġemgħa li Tiggverna
Għeżież Xhieda taʼ Ġeħova Sħabna:
Kemm nieħdu gost niktbu lilkom għeżież aħwa! Aħna nħossuna bħall-appostlu Ġwanni, li qal li hu kien ‘verament iħobb’ lil sħabu fil-fidi u feraħ li kienu “mexjin fil-verità.” (2 Ġw. 1, 4) Kemm hi barka l-verità għalina lkoll! Il-verità ħelsitna minn Babilonja l-Kbira u mid-duttrini u t-tradizzjonijiet tagħha li jiddiżonoraw lil Alla. L-ubbidjenza lejn Alla għenitna nsiru nies li juru mħabba, qalb tajba, u ħniena. U l-verità fetħitilna t-triq biex ikollna relazzjoni tajba m’Alla kif ukoll il-prospett taʼ ħajja taʼ dejjem.
Ukoll, kemm aħna grati għall-ispirtu taʼ Ġeħova li kuljum jiggwidana u jsaħħaħna! Aħna fiduċjużi li ħadtu gost teżaminaw aspetti differenti taʼ dan il-provvediment taʼ mħabba minn Ġeħova fil-Konvenzjonijiet Distrettwali reċenti “Gwidati mill-Ispirtu t’Alla.” Hekk kif il-kundizzjonijiet tad-dinja jeħżienu, huwa essenzjali li nistrieħu fuq l-ispirtu qawwi taʼ Ġeħova biex jidderiġina fil-jiem kritiċi li għandna quddiemna.
Aħna ċerti li qalbkom tqanqlet meta qrajtu r-rakkonti eċċitanti fil-Yearbook dwar ħutna li ssaportew ħafna tbatija minħabba l-fidi tagħhom. U hija ħaġa taʼ l-iskantament li naħsbu dwar il-fatt li meta qamu d-diffikultajiet ħafna minn dawn l-uħud leali jew kienu ilhom ftit żmien biss mgħammdin jew inkella lanqas kienu għadhom tgħammdu. Kemm inħobbuhom għal-lealtà tagħhom u għall-fatt li żammew maʼ dak li hu sewwa! Verament, l-eżempju eċċellenti tagħhom isaħħilna d-determinazzjoni tagħna biex nibqgħu leali lejn is-Saltna ikun xi jkun l-inkwiet li nistgħu niffaċċjaw.—1 Tess. 1:6-8.
Aħna nafu, għeżież ħutna, li hemm ħafna problemi, kemm ekonomiċi kif ukoll problemi oħrajn, li tridu tkampaw magħhom biex iżżommu l-familji tagħkom magħqudin fl-imħabba. Għal xi wħud minnkom, hi saħansitra taʼ sfida li tappoġġaw regolarment u lealment ix-xogħol taʼ l-ippridkar tas-Saltna u attivitajiet neċessarji oħrajn tal-kongregazzjoni. Din hi r-raġuni għala, wara ħafna diskussjonijiet u talb, għamilna xi aġġustamenti fil-laqgħat tal-kongregazzjoni mill-1 taʼ Jannar, 2009. Aħna nittamaw li tieħdu vantaġġ minn dan l-aġġustament sabiex tqattgħu iktar ħin fl-istudju persunali u tal-familja tagħkom.
Fid-diversi assembleat u konvenzjonijiet din is-sena, kien verament taʼ ferħ li tara daqstant uħud li kkwalifikaw għall-magħmudija. Fosthom kien hemm xi wħud pjuttost żgħar fl-età. Intom il-ġenituri taʼ min ifaħħarkom talli qed trabbu lil uliedkom biex ikollhom apprezzament għall-verità u talli tinkuraġġuhom biex jiddedikaw lilhom infushom ħalli jaqdu lil Ġeħova meta għadhom żgħar. Il-fatt li dawn l-uħud żgħar għeżież jiffaċċjaw ħafna sfidi l-iskola u xorta waħda kkwalifikaw għall-magħmudija jirrifletti tajjeb ħafna fuq it-taħriġ li rċivew id-dar.—Salm 128:1-6.
Irridu nsemmu wkoll iż-żjieda taʼ min ifaħħarha fix-xogħol taʼ l-istudji tal-Bibbja—u l-missjunarji u l-pijunieri speċjali ħabrieka tagħna kellhom sehem kbir f’dan. Ilkoll kemm aħna li naqdu fil-Ġemgħa li Tiggverna napprezzaw ħafna s-sehem importanti li għandhom ħutna madwar id-dinja biex jgħidu “Ejja!” lil uħud taʼ qalb onesta, u biex jistiednu lil dawk kollha li huma għatxana ħalli ‘jieħdu l-ilma tal-ħajja b’xejn.’ (Riv. 22:17) Aħna nilqgħu mill-qalb fil-fratellanza globali tagħna lill-289,678 li ssimbolizzaw id-dedikazzjoni tagħhom bil-magħmudija taʼ l-ilma s-sena li għaddiet!
Hu tajjeb li nibqgħu nfakkru lilna nfusna l-kliem taʼ l-appostlu Ġwanni li kiteb: “Id-dinja tgħaddi u x-xewqa tagħha wkoll, imma min jagħmel ir-rieda t’Alla jibqaʼ għal dejjem.” (1 Ġw. 2:17) U aħna qed ngħixu viċin ħafna taż-żmien meta din id-dinja se “tgħaddi”! Kemm ikun għaqli li r-rieda t’Alla u li ‘nibqgħu għassa’ jkunu fl-ewwel post f’ħajjitna. (Mt. 24:42) Qatt m’hu se jkollna xi dispjaċir min-naħa tagħna jekk nagħmlu hekk, u se naħsdu l-benefiċċji tal-qalb tajba bl-imħabba taʼ Ġeħova.—Is. 63:7.
Nittamaw li r-rakkonti li jqanqlu minn ħafna pajjiżi li nsibu f’dan il-Yearbook se jinkuraġġukom ilkoll biex tpoġġu l-interessi tas-Saltna l-ewwel f’ħajjitkom. Nixtiequ naċċertawkom li intom dejjem fil-ħsibijiet u fit-talb tagħna u li nħobbukom ħafna. Jalla Ġeħova jferraʼ fuqkom barkiet għonja.
Ħutkom,
Il-Ġemgħa li Tiggverna tax-Xhieda taʼ Ġeħova
Ittra Mingħand il-Ġemgħa li Tiggverna