Kif Tikkomunika bl-Ittri
L-ITTRI tejbu l-ħajjiet u l-imġiba taʼ miljuni taʼ nies. Ħafna mill-kotba tal-Iskrittura Griega Kristjana oriġinalment kienu ittri. Aħna llum nistgħu niktbu l-ittri biex nibnu lil uħud ġodda fit-twemmin, inżommu kuntatt mal-ħbieb, ninkuraġġixxu lil ħutna li aċċettaw responsabbiltajiet speċjali, insaħħu lil dawk li qed jiffaċċjaw it-tbatijiet, u ngħaddu informazzjoni meħtieġa biex nieħdu ħsieb attivitajiet tal-kongregazzjoni.—1 Tess. 1:1-7; 5:27; 2 Pt. 3:1, 2.
L-ittri huma wkoll mod effettiv kif tingħata xhieda. F’xi nħawi, ħafna nies jgħixu f’binjiet taʼ appartamenti jew postijiet oħrajn taʼ sigurtà stretta li ma jistgħux jinħadmu bil-libertà. Xi wħud ma jkunux id-dar il-biċċa l-kbira tal-ħin, allura ma nsibuhomx meta nagħtu xhieda minn dar għal dar. Oħrajn jgħixu fi nħawi iżolati.
Il-mard jew il-maltemp jistaʼ jġiegħlek tingħalaq id-dar. Jew il-gvern jistaʼ jagħmel kerfju, jiġifieri, joħroġ liġi li kulħadd irid ikun id-dar f’ċertu ħin. Tistaʼ forsi tikteb ittra biex tkompli tagħti xhieda lil qarib jew lil xi ħadd li kellimtu b’mod informali? Kellek student tal-Bibbja li mar jgħix xi mkien ieħor? Ittra mingħandek tistaʼ tkun eżatt dak li għandu bżonn biex iżomm l-interess spiritwali tiegħu ħaj. Jew forsi tistaʼ taqsam informazzjoni Skritturali adattata maʼ dawk li jkunu għadhom kif iżżewġu, saru ġenituri, jew mitilhom xi ħadd maħbub.
Kif Tagħti Xhieda bl-Ittri
Meta tikteb biex tagħti xhieda lil xi ħadd li qatt ma ltqajt miegħu, l-ewwel introduċi lilek innifsek. Tistaʼ tispjega li qed tieħu sehem f’xogħol volontarju internazzjonali. Jekk inhu xieraq, semmi li int wieħed mix-Xhieda taʼ Ġeħova. Għid lill-individwu għala qed tikteb minflok ma żżuru personalment. Ikteb daqslikieku qed tkellem lill-individwu wiċċ imb wiċċ. Xorta waħda, fi qbil mad-direzzjoni biex ‘turi li int attent bħas-sriep iżda innoċenti bħall-ħamiem,’ aħseb bis-serjetà dwar kemm għandek tiżvela informazzjoni dwarek innifsek.—Mt. 10:16.
Fl-ittra inkludi dak li kont se tgħid lill-individwu kieku kellek iżżuru. Tistaʼ tadatta l-introduzzjoni mill-ktieb Reasoning jew mill-ktejjeb Kif Nibdew u Nkomplu Diskussjonijiet Fuq Il-Bibbja jew tuża preżentazzjoni Skritturali minn ħarġa reċenti tal-Ministeru tas-Saltna. Tistaʼ tqajjem mistoqsija u tinkuraġġixxi lill-individwu jaħseb dwarha. Xi pubblikaturi sempliċement jispjegaw li għandna programm bla ħlas li jwieġeb mistoqsijiet Bibliċi u mbagħad isemmu ftit mit-titli tal-kapitli taʼ wieħed mill-kotba li jgħinuna fl-istudju tal-Bibbja. F’paġna 73 hemm eżempju taʼ ittra miktuba biex tagħti xhieda. Tistaʼ tagħtik xi ideat, imma jkun tajjeb li tvarja l-kontenut. Inkella maż-żmien in-nies jistgħu jibdew jirċievu l-istess ittra darba wara l-oħra.
Xi nies jiddejqu jaqraw ittra twila mingħand xi ħadd li ma jafuhx. Allura forsi jkun għaqli li żżomm l-ittra tiegħek fil-qosor. Ikkonkludi l-ittra tiegħek qabel ma l-wieħed li jirċiviha jixbaʼ jaqraha. Ikun xieraq li tinkludi invit stampat tal-laqgħat li jsiru fis-Sala tas-Saltna. Tistaʼ tinkludi fuljett, browxer, jew ħarġa tat-Torri tal-Għassa jew Stenbaħ! u tispjega li dawn jistgħu jiġu provduti fuq bażi regulari jekk inhu mixtieq. Jew tistaʼ tistaqsi jekk tistax iżżur lill-individwu f’daru ħalli tkompli tkellmu dwar is-suġġett li ġie diskuss.
Kelmtejn Dwar Kif Tifforma l-Ittra
Issa agħti daqqa t’għajn lejn l-ittra li sservi taʼ eżempju. Innota dan li ġej: (1) Tidher pulita, mhux b’kitba traskurata. (2) Anki jekk jintilef l-envelop, min jirċievi l-ittra xorta jkollu l-isem taʼ min bagħatha u l-indirizz postali. (3) L-iskop tal-ittra ntqal b’mod sempliċi u dirett fl-ewwel paragrafu. (4) Kull punt prinċipali huwa diskuss f’paragrafu għalih. (5) Fi qbil mal-iskop tagħha, l-ittra la hi miktuba kif ġie ġie u lanqas ma hi formali żżejjed.
F’ittra iktar formali, bħal waħda li s-segretarju tal-kongregazzjoni jistaʼ jibgħat lill-uffiċċju tal-fergħa, l-isem tal-kongregazzjoni jkun inkluż, flimkien mal-isem tas-segretarju stess, l-indirizz postali tiegħu, u d-data. L-isem u l-indirizz tal-individwu jew l-organizzazzjoni li lilha tkun qed tintbagħtilha l-ittra għandhom jitniżżlu wkoll. Dan jiġi segwit minn tislija adattata. B’xi lingwi l-ittra tingħalaq b’espressjoni bħal “Tiegħek” fuq il-firma. Il-firma għandha tinkiteb bl-idejn.
Fi kwalunkwe ittra, oqgħod attent għal kif tispelli, għall-grammatika, għall-punteġġatura u, m’għandniex xi ngħidu, ara li tkun pulita u nadifa. Dan se jżid mad-dinjità tal-ittra tiegħek u l-messaġġ li fiha.
Fuq barra tal-envelop, dejjem ikteb indirizz fejn jistgħu jiktbulek lura—preferibbilment l-indirizz postali tiegħek stess. Forsi tħoss li ma jkunx għaqli li tagħti l-indirizz tiegħek stess meta tagħti xhieda bl-ittri lil min ma tafx. Allura tistaʼ tistaqsi lill-anzjani jekk jaċċettawx li tuża l-indirizz tas-Sala tas-Saltna lokali ħalli dak li jkun jużah biex jiktiblek lura. L-indirizz tal-uffiċċju lokali qatt m’għandu jintuża għal dan l-iskop, għaliex dan jindika b’mod żbaljat li l-korrispondenza tiegħek intbagħtet mill-uffiċċju lokali u dan jistaʼ joħloq konfużjoni. Jekk ma jkun hemm ebda indirizz provdut biex jibagħtu risposta u jkun hemm xi letteratura inkluża, dan ukoll jistaʼ jagħti l-impressjoni żbaljata li ntbagħtet mill-uffiċċju lokali.
Kun ċert li twaħħal biżżejjed bolol, speċjalment jekk inkludejt il-letteratura. Jekk ma tkunx waħħalt bolol biżżejjed, min jirċiviha jistaʼ jkollu jħallas għall-ammont li ma tkunx ħallast int, u dan itellef mill-messaġġ tiegħek. Ftakar li f’ħafna pajjiżi meta browxer jew rivista tkun inkluża, ir-rata postali tkun iktar minn dik meħtieġa għal sempliċi ittra.
It-Ton Xieraq
Ladarba tkun lestejt l-ittra tiegħek, aqraha biex teżamina x’fiha. Kif tinstemaʼ? Tinstemaʼ li nkitbet b’mod dħuli u bit-tattika? L-imħabba u l-qalb tajba huma fost il-kwalitajiet li nistinkaw biex nuru meta nittrattaw maʼ oħrajn. (Gal. 5:22, 23) Jekk tħoss li hemm ton negattiv jew xi ħjiel taʼ pessimiżmu, biddel il-kliem.
Ittra tistaʼ tmur f’postijiet fejn int ma tistax. Dan il-fatt biss jagħmilha għodda sinifikanti għall-ministeru. Ladarba l-ittra tiegħek tirrappreżenta lilek u l-valuri tiegħek, aħseb sew dwar dak li tgħid, kif tidher, u kif tinstemaʼ. Tistaʼ tipprovdi eżatt dak li hemm bżonn biex tidderieġi ruħ prezzjuża lejn it-triq għall-ħajja, issaħħaħha, jew tinkuraġġiha.