LEZZJONI 13
X’Se Jiġri mir-Reliġjonijiet?
1. Ir-reliġjonijiet kollha huma tajbin?
Hemm nies sinċieri f’kull reliġjon. Hi aħbar tajba li Alla jara dawn in-nies u jimpurtah minnhom. Imma b’sogħba, ħafna affarijiet ħżiena saru f’isem ir-reliġjon. (2 Korintin 4:3, 4; 11:13-15) Skont rapporti fl-aħbarijiet, xi reliġjonijiet huma anke involuti f’terroriżmu, ġenoċidju, gwerer, u abbuż fuq it-tfal. Dan hu taʼ niket kbir għal dawk li sinċerament jemmnu f’Alla!—Aqra Mattew 24:3-5, 11, 12.
Filwaqt li r-reliġjon vera tigglorifika lil Alla, ir-reliġjon falza ma togħġbu xejn. Din tgħallem ideat li mhumiex fil-Bibbja, inkluż tagħlim falz dwar Alla u dwar il-mejtin. Imma Ġeħova jrid li n-nies ikunu jafu l-verità dwaru.—Aqra Eżekjel 18:4; 1 Timotju 2:3-5.
2. X’se jiġri mir-reliġjonijiet?
B’ferħ, Alla ma jiħux pjaċir b’reliġjonijiet li jsostnu li jħobbuh imma li fil-verità jħobbu d-dinja taʼ Satana. (Ġakbu 4:4) Il-Kelma t’Alla tirreferi għar-reliġjon falza kollha bħala “Babilonja l-Kbira.” Babilonja kienet il-belt antika fejn bdiet ir-reliġjon falza wara d-Dilluvju taʼ żmien Noè. Alla dalwaqt se jeqred ħesrem lir-reliġjon li tqarraq bl-umanità u taħqarha.—Aqra Rivelazzjoni 17:1, 2, 5, 16, 17; 18:8.
Madanakollu, Ġeħova ma nesiex lin-nies sinċieri li huma mxerrdin fost ir-reliġjonijiet foloz madwar id-dinja. Qed jgħaqqad lil dawn in-nies billi jgħallimhom il-verità.—Aqra Mikea 4:2, 5.
3. X’għandhom jagħmlu n-nies sinċieri?
Ir-reliġjon vera qed tgħaqqad lin-nies
Ġeħova jimpurtah min-nies li jħobbu dak li hu veru u tajjeb. Hu jħeġġiġhom biex iħallu warajhom ir-reliġjon falza. In-nies li jħobbu lil Alla huma lesti li jinbidlu biex jogħġbuh.—Aqra Rivelazzjoni 18:4.
Fl-ewwel seklu, meta n-nies sinċieri semgħu l-aħbar tajba mill-appostli, wieġbu bil-ferħ. Tgħallmu mod ġdid taʼ ħajja mingħand Ġeħova, ħajja iktar ferħana bi skop u b’tama. Huma eżempju tajjeb għalina llum għax wieġbu għall-aħbar tajba billi poġġew lil Ġeħova fl-ewwel post f’ħajjithom.—Aqra l-1 Tessalonikin 1:8, 9; 2:13.
Ġeħova jilqaʼ fil-familja tiegħu taʼ aduraturi lil dawk li jagħtu daharhom lir-reliġjon falza. Jekk taċċetta l-istedina mill-qalb taʼ Ġeħova, se tikseb il-ħbiberija tiegħu, familja ġdida u kollha mħabba taʼ wħud li flimkien miegħek jaqdu lil Ġeħova, u ħajja taʼ dejjem.—Aqra Marku 10:29, 30; 2 Korintin 6:17, 18.
4. Alla kif se jġib ferħ mal-art kollha?
Il-ġudizzju li ġej fuq ir-reliġjon falza hu aħbar tajba. Se jġib serħan mad-dinja kollha mill-moħqrija. Ir-reliġjon falza qatt mhi se terġaʼ tqarraq bl-umanità u tifridha. L-umanità kollha se tkun magħquda fil-qima tal-uniku Alla veru.—Aqra Rivelazzjoni 18:20, 21; 21:3, 4.