“Ħdejn Ilmijiet taʼ Serħan Imexxini”

FIL-​KLIMA sħuna tal-​pajjiżi Bibliċi, in-​nagħaġ ikollhom bżonn jixorbu kuljum. Għalhekk, parti vitali mix-​xogħol tar-​ragħaj hi li jipprovdi l-​ilma għall-​merħla tiegħu. Xi drabi, ir-​rgħajja jisqu l-​merħliet tagħhom billi jtellgħu l-​ilma minn xi bir għal ġo ħawt sabiex jagħtuhom jixorbu. (Ġenesi 29:​1-3) Iżda, b’mod partikulari fl-​istaġun tax-​xita, l-​inħawi mdawrin bix-​xmajjar u l-​widien jipprovdu postijiet paċifiċi taʼ serħan imsoqqijin sewwa.—Salm 23:2.

Ragħaj kapaċi jrid ikun jaf fejn jistaʼ jsib kemm l-​ilma u kemm l-​art tajba fejn ikun jistaʼ jirgħa l-​merħla tiegħu. Jekk ikun jaf ċerti nħawi fuq ponot subgħajh, ikun jistaʼ jiggarantixxi li n-​nagħaġ tiegħu jibqgħu ħajjin. David, li qattaʼ bosta snin jirgħa n-​nagħaġ fuq l-​għoljiet tal-​Lhudija, qabbel il-​gwida spiritwali t’Alla maʼ dik taʼ ragħaj li jmexxi n-​nagħaġ tiegħu lejn mergħat tajbin u lejn ilma li jagħti l-​ħajja. “Ħdejn ilmijiet taʼ serħan imexxini,” qal David skond traduzzjoni waħda.—Salm 23:​1-3, KŻ.

Snin wara, permezz tal-​profeta tiegħu Eżekjel, Jehovah uża tixbiha simili. Hu wiegħed li kien se jerġaʼ jiġbor lill-​poplu tiegħu mill-​artijiet fejn kienu ġew imxerrdin, bħalma ragħaj jiġbor in-​nagħaġ tiegħu. “Inġibhom lejn arthom. Nirgħahom fuq il-​muntanji taʼ Iżrael, fil-​widien,” hu assigurahom.—Eżekjel 34:13.

Alla Jehovah huwa wkoll konċernat ferm dwar li jipprovdi ilma spiritwali. Il-​ktieb taʼ l-​Apokalissi jiddeskrivi “x-​xmara taʼ l-​ilma tal-​Ħajja” li tgelgel mit-​tron t’Alla. (Apokalissi 22:1) L-​istedina biex jixorbu minn din ix-​xmara tgħodd għan-​nies kollha. “Ħa jieħu b’xejn min irid l-​ilma tal-​Ħajja.”—Apokalissi 22:17.

Dan l-​ilma tal-​ħajja simboliku jirrappreżenta l-​provvedimenti t’Alla għall-​ħajja taʼ dejjem. Kulmin irid jistaʼ jibda jixrob minn dan l-​ilma billi ‘jagħraf lil Alla waħdu veru, u lil Ġesù Kristu, li hu bagħat.’—Ġwann 17:3.