Serħan għal Dawk li Qed Isejħu għall-​Għajnuna

IL-​BIBBJA m’hijiex xi ktieb taʼ pariri dwar is-​saħħa mentali. Madankollu, din tagħtina serħan u tgħinna napprezzaw il-​ħajja minkejja l-​inkwiet li nħabbtu wiċċna miegħu. B’mod realistiku, l-​Iskrittura tgħid: “Il-​bniedem imwieled minn mara għandu ħajja qasira, imma tbatija għandu biżżejjed.” (Ġob 14:1) Xi wħud mill-​provi li jkollna jiġu minħabba l-​imperfezzjoni tagħna stess. Imma min hu responsabbli prinċipalment għat-​tbatija tal-​bnedmin?

Il-Bibbja tidentifika lil dan il-​wieħed bħala spirtu mill-​agħar imsejjaħ id-​Demonju u x-​Xitan. Hu l-​“qarrieq tad-​dinja kollha” u qed jikkaġuna ħafna mill-​inkwiet li qed jifleġ lill-​umanità. Madankollu, il-​Bibbja tgħidilna wkoll li hu ma tantx baqagħlu żmien. (Apokalissi 12:​9, 12) Dalwaqt, permezz taʼ intervent divin se jintemm in-​niket kollu li Satana ġab fuq l-​abitanti taʼ l-​art. Skond il-​Bibbja, id-​dinja l-​ġdida taʼ tjieba mwiegħda minn Alla se ttemm il-​qtigħ taʼ qalb u d-​disperazzjoni.—2 Pietru 3:13.

X’faraġ li tkun taf li t-​tbatija umana m’hijiex għal dejjem! Taħt il-​ħakma tas-​Saltna tas-​sema t’Alla f’idejn Ġesù Kristu, l-​inġustizzja u t-​tbatija se jintemmu. Rigward is-​Sultan maħtur t’Alla, l-​Iskrittura tistqarr: “Għax hu jeħles lill-​fqir li jsejjaħlu, u lill-​imsejken li m’għandux min jgħinu. Iħenn għad-​dgħajjef u għall-​fqajjar; il-​ħajja tal-​fqajrin isalva. Jeħlishom mill-​qerq u mill-​moħqrija; demmhom għażiż quddiem għajnejh.”—Salm 72:​12-14.

Iż-żmien għat-​twettiq taʼ dan il-​kliem profetiku hu qrib ferm. Aħna nistgħu ngawdu l-​ħajja taʼ dejjem fuq art magħmula ġenna taħt kundizzjonijiet taʼ l-​għaġeb. (Luqa 23:43; Ġwanni 17:3) Il-​fatt li jkollna għarfien dwar dawn il-​wegħdi Skritturali tant taʼ faraġ jagħti tama u serħan lil dawk li qed isejħu għall-​għajnuna.

[Sors tal-Istampa f’paġna 32]

Tifla dipressa: Photo ILO/J. Maillard