Aħwa Rġiel Żgħażagħ, Qed Tirsistu?

1. Ħu żagħżugħ meta għandu jibda japplika d-​direzzjoni misjuba fl-​1 Timotju 3:1?

1 “Jekk raġel qed jirsisti . . . , ikun jixtieq xogħol tajjeb.” (1 Tim. 3:1) Dan il-​kliem imnebbaħ jinkuraġġixxi lill-​aħwa rġiel biex jirsistu ħalli jikkwalifikaw għal privileġġi taʼ servizz fil-​kongregazzjoni. Bilfors trid tkun adult biex tagħmel dan? Fir-​realtà, ikun aħjar li tibda tirsisti meta tkun għadek żagħżugħ. B’hekk, tistaʼ tirċievi t-​taħriġ u turi jekk jistħoqqlokx tinħatar bħala qaddej ministerjali meta tikber. (1 Tim. 3:10) Jekk int ħu żagħżugħ mgħammed, kif tistaʼ tirsisti?

2. Kif tistaʼ tikkultiva u turi l-​ispirtu taʼ li tagħti minnek innifsek?

2 Agħti Minnek Innifsek: Ftakar li qed tirsisti għal xogħol tajjeb, mhux għal xi titlu. Għalhekk, rawwem fik xewqa biex tgħin lil ħutek. Mod kif tistaʼ tagħmel dan hu billi timmedita fuq l-​eżempju mill-​aħjar taʼ Ġesù. (Mt. 20:28; Ġw. 4:6, 7; 13:4, 5) Itlob lil Ġeħova jgħinek tkun interessat f’ħaddieħor. (1 Kor. 10:24) Tistaʼ tgħin int b’mod prattiku lil dawk fil-​kongregazzjoni li huma morda jew imdaħħlin fiż-​żmien? Tagħmel lilek innifsek disponibbli biex tiżbogħ, tnaddaf, jew tieħu ħsieb aspetti oħra tal-​manutenzjoni tas-​Sala tas-​Saltna? Toffri ruħek biex tagħti taħditiet volontarji fl-​Iskola tal-​Ministeru Teokratiku? Se ssib li tikseb il-​ferħ meta tagħti minnek innifsek għal ħaddieħor.—Atti 20:35.

3. L-​ispiritwalità kemm hi importanti, u kif tistaʼ tiżviluppaha?

3 Kun Spiritwali: Hu bil-​wisq iktar importanti li qaddej fil-​kongregazzjoni jkun spiritwali milli jkollu xi talenti speċjali jew abbiltajiet naturali. Raġel spiritwali jipprova jħares lejn l-​affarijiet bl-​istess mod kif jagħmlu Ġeħova u Ġesù. (1 Kor. 2:15, 16) Juri “l-​frott taʼ l-​ispirtu.” (Gal. 5:22, 23) Hu evanġelizzatur żeluż li jpoġġi l-​interessi tas-​Saltna l-​ewwel f’ħajtu. (Mt. 6:33) Int tistaʼ tiżviluppa kwalitajiet spiritwali billi jkollok rutina tajba taʼ studju persunali. Dan jinkludi li taqra l-​Bibbja kuljum, li taqra kull ħarġa tat-​Torri tal-​Għassa u Stenbaħ!, u li tipprepara għal-​laqgħat tal-​kongregazzjoni u tattendihom. (Salm 1:1, 2; Ebr. 10:24, 25) Meta kien qed jinkuraġġixxi liż-​żagħżugħ Timotju biex jagħmel avvanz spiritwali, Pawlu kitiblu: “Oqgħod attent il-​ħin kollu . . . għat-​tagħlim tiegħek.” (1 Tim. 4:15, 16) Allura aħdem sew fuq it-​taħditiet li tiġi inkarigat bihom fl-​Iskola tal-​Ministeru Teokratiku. Ipprepara għall-​ministeru, u ħu sehem fih regolarment. Agħmel miri spiritwali u aħdem biex tilħaqhom, bħal pereżempju li taqdi bħala pijunier, fis-​servizz f’Betel, jew li tattendi l-​Iskola tal-​Bibbja Għal Aħwa Rġiel Mhux Miżżewġin. L-​ispiritwalità se tgħinek ‘taħrab mix-​xewqat li jistaʼ jkollok fiż-​żgħożija.’—2 Tim. 2:22.

4. X’valur hemm f’li tkun leali u taʼ min joqgħod fuqek?

4 Uri li Int Leali u taʼ Min Joqgħod Fuqek: Fl-​ewwel seklu, l-​aħwa li ġew inkarigati biex iqassmu l-​ikel lill-​Kristjani fil-​bżonn kienu “kwalifikati,” milli jidher għax kienu magħrufin bħala wħud leali u taʼ min joqgħod fuqhom. Għalhekk, l-​appostli ma kellhomx għalfejn jinkwetaw dwar jekk kienx se jsir ix-​xogħol. B’hekk, setgħu jiffokaw fuq kwistjonijiet iktar importanti. (Atti 6:1-​4) Għalhekk, meta tingħata inkarigu fil-​kongregazzjoni, wettqu bl-​aħjar mod li tistaʼ. Imita lil Noè, li bir-​reqqa segwa l-​istruzzjonijiet li ngħata biex jibni l-​arka. (Ġen. 6:22) Il-​lealtà hi prezzjuża f’għajnejn Ġeħova u turi li int matur spiritwalment.—1 Kor. 4:2; ara l-​kaxxa “Il-​Benefiċċji tat-​Taħriġ.”

5. Aħwa rġiel żgħażagħ għala għandhom jirsistu?

5 Kif ġie profetizzat, Ġeħova qed jgħaġġel il-​ġbir tan-​nies. (Is. 60:22) Bħala medja, kwart taʼ miljun qed jitgħammdu kull sena. Peress li deħlin tant uħud ġodda fil-​verità, hemm bżonn taʼ rġiel spiritwali kwalifikati biex jieħdu ħsieb ir-​responsabbiltajiet tal-​kongregazzjoni. Issa iktar minn qatt qabel, hemm ħafna x’tagħmel fis-​servizz taʼ Ġeħova. (1 Kor. 15:58) Aħwa rġiel żgħażagħ, qed tirsistu? Jekk iva, tkunu qed tixtiequ xogħol tassew tajjeb!

[Kumment f’paġna 2]

Peress li deħlin tant uħud ġodda fil-​verità, hemm bżonn taʼ rġiel spiritwali kwalifikati biex jieħdu ħsieb ir-​responsabbiltajiet tal-​kongregazzjoni

[Kaxxa f’paġna 3]

Il-​Benefiċċji tat-​Taħriġ

Aħwa rġiel żgħażagħ kwalifikati jibbenefikaw meta l-​anzjani jagħtuhom inkarigi u jħarrġuhom. Indokratur tas-​circuit kien bilqiegħda fuq il-​platform jinkuraġġixxi lil pubblikatur wara l-​laqgħa. Innota tifel żgħir bilwieqfa fil-​viċin, u allura staqsieh jekk kienx qed jistenna biex ikellmu. It-​tfajjel wieġeb li kien inkarigat biex jiknes il-​platform wara kull laqgħa. Il-​ġenituri tiegħu kienu lesti biex jitilqu imma ma riedx jitlaq qabel ma jwettaq l-​inkarigu tiegħu. L-​indokratur tas-​circuit b’ferħ resaq minn fejn kien. Hu qal: “L-​anzjani f’dik il-​kongregazzjoni regolarment kienu jħarrġu lil aħwa rġiel żgħażagħ kwalifikati billi jagħtuhom inkarigi fil-​kongregazzjoni. Minħabba f’hekk, spiss kienu jirrikkmandaw lil ħu żagħżugħ bħala qaddej ministerjali meta kont inżur il-​kongregazzjoni.”