STUDJU 1

Introduzzjoni effettiva

Atti 17:22

X’GĦANDEK TAGĦMEL: L-introduzzjoni tiegħek għandha tqajjem interess, tidentifika x’inhu s-suġġett, u turi għala s-semmiegħa tiegħek għandhom ikunu interessati fih.

KIF TAGĦMEL DAN:

Qajjem interess. Agħżel mistoqsija, esperjenza vera, aħbar, jew semmi xi ħaġa oħra li se tkun taʼ interess għas-semmiegħa tiegħek.

Minn qabel, aħseb sew dwar dak li jinteressa u jinkwieta lis-semmiegħa tiegħek u mbagħad addatta l-introduzzjoni tiegħek skont dan.
Identifika s-suġġett tiegħek. Kun ċert li l-introduzzjoni tiegħek tfiehem b’mod ċar lis-semmiegħa s-suġġett u l-iskop tal-preżentazzjoni tiegħek.
Uri għala s-suġġett hu importanti. Addatta dak li tgħid għall-bżonnijiet prattiċi tas-semmiegħa tiegħek. Huma għandhom jifhmu b’mod ċar kif is-suġġett jistaʼ jgħinhom personalment.

Waqt li qed tipprepara t-taħdita, staqsi lilek innifsek, ‘Liema sitwazzjonijiet qed jiffaċċjaw ħuti fil-kongregazzjoni?’ Imbagħad addatta l-introduzzjoni tiegħek skont il-bżonnijiet tagħhom.