Referenzi għall-Fuljett għall-Istudju tal-Laqgħa tal-Ħajja u l-Ministeru Tagħna

11-​17 TAʼ JANNAR

TEŻORI MILL-​KELMA T’ALLA | LEVITIKU 20-​21

“Ġeħova Jagħżel Poplu Għalih”

it-​1 1199

Wirt

Kwalunkwe propjetà li tgħaddi għand il-​werriet jew għand dawk intitolati li jirtu meta jmut xi ħadd; kwalunkwe ħaġa li xi ħadd jirċievi mingħand dawk li għexu qabel. Il-​verb ewlieni Ebrajk użat jinvolvi li wieħed jakkwista jew jgħaddi wirt. (Nu 26:55; Eże 46:18) Kultant jiġi użat verb ieħor li jfisser li wieħed jilħaq flok ieħor, imma iktar spiss użat bħala li jiret. (Ġen 15:3; Le 20:24) Ifisser ukoll li jittiħidlek il-​wirt jew titkeċċa, u dan jinvolvi azzjoni militari. (Dt 2:12; 31:3) Il-​kliem Grieg li għandu x’jaqsam mal-​wirt għall-​ewwel kien ifisser “bix-​xorti” imma mbagħad sar ifisser “li taqsam” u fl-​aħħar “wirt.”—Mt 27:35; At 1:17; 26:18.

it-​1 317 ¶2

Għasafar

Wara d-​Dulluvju globali, Noè offra ‘ħlejjaq nodfa li jtiru’ flimkien maʼ annimali bħala sagrifiċċju. (Ġen 8:18-​20) B’hekk, Alla ppermetta li l-​għasafar ikunu inklużi fid-​dieta tal-​bniedem, mingħajr ma jittiekel id-​demm. (Ġen 9:1-​4; qabbel Le 7:26; 17:13.) Milli jidher, l-​‘indafa’ taʼ ċerti għasafar dak iż-​żmien kellha x’taqsam maʼ li Alla jaċċetta s-​sagrifiċċju; il-​Bibbja turi li ebda għasfur użat għall-​ikel ma kien meqjus bħala “mhux nadif” sakemm ġiet stabbilita l-​Liġi taʼ Mosè. (Le 11:13-​19, 46, 47; 20:25; Dt 14:11-​20) Il-​fatturi li jiddeterminaw liema għasafar kienu meqjusin b’mod ċerimonjali bħala “mhux nodfa” mhumiex imniżżlin fil-​Bibbja. B’hekk, waqt li l-​biċċa l-​kbira tal-​għasafar kienu meqjusin bħala tal-​priża jew li jieklu annimali mejta, mhux kollha kienu hekk. Din il-​projbizzjoni tneħħiet wara li ġie stabbilit il-​patt il-​ġdid, bħalma Alla fiehem lil Pietru permezz taʼ viżjoni.—At 10:9-​15.

Ġawhar Spiritwali

it-​1 563

Qtugħ Fuq il-​Ġisem

Il-​liġi t’Alla pprojbiet speċifikament il-​qtugħ fuq il-​ġisem meta jmut xi ħadd. (Le 19:28; 21:5; Dt 14:1) Ir-​raġuni għal dan kienet li Iżrael kien poplu qaddis għal Ġeħova, propjetà speċjali. (Dt 14:2) B’hekk, Iżrael ma kellux jinvolvi ruħu fil-​prattiki idolatrużi kollha. Ukoll, bħala poplu li kien konxju kompletament mill-​kundizzjoni attwali tal-​mejtin kif ukoll mit-​tama tal-​irxoxt, turijiet estremi taʼ niket, bħal li xi ħadd iweġġaʼ lilu nnifsu, kienu verament mhux xierqa. (Da 12:13; Eb 11:19) Ukoll, il-​projbizzjoni kontra li wieħed jagħmel ħsara lilu nnifsu kienet se tgħin lill-​Iżraelin biex jirrispettaw kif jixraq il-​ġisem uman, li hu ħolqien t’Alla.

18-​24 TAʼ JANNAR

TEŻORI MILL-​KELMA T’ALLA | LEVITIKU 22-​23

“Festi li Jfissru Xi Ħaġa Għalina”

it-​1 826-​827

Il-​Festa tal-​Ħobż bla Ħmira

L-​ewwel ġurnata tal-​Festa tal-​Ħobż bla Ħmira kienet assemblea solenni kif ukoll Sabat. Fit-​tieni ġurnata, is-​16 taʼ Nisan, qatta tal-​ewwel frott tal-​ħsad tax-​xgħir, l-​ewwel prodott fil-​Palestina li jsir, kien jinġieb lill-​qassis. La qmuħ ġodda, la ħobż, u lanqas qamħ inkaljat mill-​ħsad il-​ġdid ma setaʼ jittiekel qabel din il-​festa. Il-​qassis offra l-​ewwel frott lil Ġeħova b’mod simboliku billi xejjer qatta qamħ ’l hemm u ’l hawn, waqt li muntun bla difett fl-​ewwel sena tiegħu kien offrut bħala offerta tal-​ħruq. Flimkien maʼ dawn kienu joffru offerta tal-​qamħ li kienu jbillu fiż-​żejt u offerta tax-​xorb. (Le 23:6-​14) Ma kien hemm l-​ebda kmand biex jaħarqu xi qmuħ jew id-​dqiq tiegħu fuq l-​artal, kif kienu jagħmlu iktar tard il-​qassisin. Mhux biss kien hemm offerta tal-​ewwel frott li kienet issir fil-​pubbliku jew bħala nazzjon imma wkoll sar arranġament biex kull familja u kull individwu li kellu xi art f’Iżrael joffri sagrifiċċji taʼ radd il-​ħajr f’din l-​okkażjoni taʼ festa.—Eżo 23:19; Dt 26:1, 2.

Sinifikat. Li jieklu l-​ħobż bla ħmira f’dan iż-​żmien kien fi qbil mal-​istruzzjonijiet li Mosè rċieva mingħand Ġeħova, bħalma hu miktub f’​Eżodu 12:14-​20, li jinkludi t-​twissija stretta f’vers 19: “Għal sebat ijiem ebda għaġina mħemmra m’għandha tinstab fi djarkom.” F’​Dewteronomju 16:3 il-​ħobż bla ħmira jissejjaħ “il-​ħobż tas-​sofferenza,” u kull sena dan kien ifakkar lil-​Lhud f’meta telqu bl-​għaġla mill-​art tal-​Eġittu (meta ma kellhomx ħin biex l-​għaġina tħemmer [Eżodu 12:34]). B’hekk huma ftakru fis-​sofferenza u l-​jasar li Iżrael inħeles minnhom, bħalma Ġeħova qal, “sabiex il-​jiem kollha taʼ ħajtek tiftakar fil-​jum li fih ħriġt mill-​art taʼ l-​Eġittu.” Il-​fatt li rrealizzaw il-​ħelsien li kellhom bħala nazzjon u li rrikonoxxew lil Ġeħova bħala l-​Ħellies tagħhom għenhom biex jiċċelebraw l-​ewwel mit-​tliet festi annwali tal-​Iżraelin.—Dt 16:16.

it-​2 598 ¶2

Pentekoste

L-​ewwel frott mill-​ħsad tal-​qamħ kellu jiġi trattat differenti mill-​ewwel frott tax-​xgħir. Tnejn minn kull għaxra taʼ efa dqiq fin tal-​qamħ (4.4 litri) flimkien mal-​ħmira kellhom jinħmew f’żewġ ħobżiet. Kellhom ikunu “mill-​postijiet fejn tgħammru,” li kien ifisser li kellhom ikunu ħobż magħmul għall-​użu taʼ kuljum taʼ familja u mhux għal skopijiet sagri. (Le 23:17) Maʼ dawn kellhom jiġu offruti offerti tal-​ħruq u offerta għad-​dnub, u żewġt iħrief irġiel bħala offerta taʼ sħubija. Il-​qassis kien ixejjer il-​ħobż u l-​ħrief quddiem Ġeħova billi kien ipoġġi jdejh taħthom u jxejjirhom ’l hemm u ’l hawn, u dan kien ifisser li ġew preżentati quddiem Ġeħova. Wara li l-​ħobż u l-​ħrief jiġu offruti, dawn kienu jsiru tal-​qassis biex jikolhom bħala offerta taʼ sħubija.—Le 23:18-​20.

25-​31 TAʼ JANNAR

TEŻORI MILL-​KELMA T’ALLA | LEVITIKU 24-​25

“Is-​Sena tal-​Ġublew u Ħelsien fil-​Futur”

it-​1 871

Ħelsien

L-​Alla tal-​Ħelsien. Ġeħova hu l-​Alla tal-​ħelsien, jew libertà. Hu ħeles lin-​nazzjon t’Iżrael mill-​jasar tal-​Eġittu. Hu qalilhom li jekk jobdu l-​kmandamenti tiegħu ma kien se jonqoshom xejn. (Dt 15:4, 5) David tkellem dwar “ħelsien mill-​inkwiet” fit-​torrijiet taʼ Ġerusalemm. (Sa 122:6, 7) Madankollu, il-​Liġi kienet tgħid li jekk raġel ftaqar, hu setaʼ jbigħ lilu nnifsu bħala skjav biex jipprovdi l-​bżonnijiet għalih u għal familtu. Imma dan l-​Ebrew ingħata l-​ħelsien permezz tal-​Liġi fis-​sebaʼ sena tal-​jasar tiegħu. (Eżo 21:2) Fil-​Ġublew (li kien isir kull 50 sena), kienet tingħata l-​libertà lill-​abitanti kollha tal-​art. Kull Ebrew kien jinħeles, u kull raġel kien imur lura lejn il-​wirt tal-​art tiegħu.—Le 25:10-​19.

it-​1 1200 ¶2

Wirt

Ladarba l-​art kienet tibqaʼ għand l-​istess familja minn ġenerazzjoni għal oħra, ma setgħetx tinbiegħ b’mod perpetwu. Il-​bejgħ tal-​art attwalment kien biss il-​kera tagħha għall-​valur taʼ kemm kienet tipproduċi prodotti tal-​art. Il-​prezz tax-​xiri kien ivarja skont in-​numru taʼ snin li kien jifdal sal-​Ġublew li kien imiss. F’dan iż-​żmien, l-​art kienet terġaʼ tmur lura għand is-​sid oriġinali tagħha sakemm din ma tkunx inxtrat lura jew mifdija qabel il-​Ġublew. (Le 25:13, 15, 23, 24) Din il-​liġi inkludiet djar fi bliet mingħajr swar, li kienu meqjusin bħala parti mill-​għelieqi. Għal dar li kienet f’belt bis-​swar, id-​dritt li tinxtara lura kien jgħodd biss għal sena minn meta nbiegħet. F’dan iż-​żmien kienet issir il-​propjetà tax-​xerrej. Fil-​każ taʼ djar fi bliet Leviti, id-​dritt li jinxtraw lura baqaʼ għal dejjem għax il-​Leviti ma kellhomx art bħala wirt.—Le 25:29-​34.

it-​2 122-​123

Ġublew

Meta n-​nazzjon taʼ Iżrael obda l-​liġi tal-​Ġublew, din ipproteġietu minn dak li qed jiġri f’ħafna pajjiżi llum, jiġifieri li n-​nies ikunu jew sinjuri ħafna jew fqar ħafna. B’hekk, kulħadd kien jibbenefika u ħadd ma kien ibati minn sitwazzjoni ekonomika ħażina, iżda kulħadd kien jikkontribwixxi għall-​ġid tan-​nazzjon permezz tat-​talenti u l-​abbiltajiet tiegħu. Peress li Ġeħova kien ibierek dak li kienet tipproduċi l-​art u permezz tat-​tagħlim li kien provdut, jekk Iżrael kien jobdi, hu kien se jgawdi gvern perfett u prosperità li Ġeħova biss setaʼ jipprovdi.—Is 33:22.

1-​7 TAʼ FRAR

TEŻORI MILL-​KELMA T’ALLA | LEVITIKU 26-​27

“Kif Tirċievi l-​Barka taʼ Ġeħova?”

it-​1 223 ¶3

Li Jqanqal il-​Biżaʼ

Minħabba l-​mod kif Ġeħova uża lil Mosè u ttratta miegħu, Mosè għamel għemejjel kbar li jqanqlu l-​biżaʼ quddiem għajnejn Iżrael kollu. (Dt 34:10, 12; Eżo 19:9) Dawk li kellhom il-​fidi kellhom biżaʼ bnin mill-​awtorità taʼ Mosè. Huma rrealizzaw li Alla tkellem permezz tiegħu. Ukoll, l-​Iżraelin kellu jkollhom rispett profond lejn is-​santwarju taʼ Ġeħova. (Le 19:30; 26:2) Dan kien ifisser li huma kellhom juru rispett kbir lejn is-​santwarju, jagħtu qima bil-​mod li Ġeħova qalilhom, u jġibu ruħhom fi qbil mal-​kmandi tiegħu kollha.

Ġawhar Spiritwali

it-​2 617

Pesta

Tiġi Milli Wieħed Jitlaq il-​Liġi t’Alla. In-​nazzjon taʼ Iżrael kien imwissi li jekk ma jibqax iżomm il-​patt li Alla għamel magħhom, dan kien se jwassal f’li ‘jibgħat il-​pesta f’nofshom.’ (Le 26:14-​16, 23-​25; Dt 28:15, 21, 22) Fl-​Iskrittura kollha, is-​saħħa spiritwali jew fiżika għandha x’taqsam mal-​barka t’Alla (Dt 7:12, 15; Sa 103:1-​3; Pr 3:1, 2, 7, 8; 4:21, 22; Ri 21:1-​4), filwaqt li l-​mard għandu x’jaqsam mad-​dnub u l-​imperfezzjoni. (Eżo 15:26; Dt 28:58-​61; Is 53:4, 5; Mt 9:2-​6, 12; Ġw 5:14) Huwa veru li f’ċerti każi Alla Ġeħova ġab il-​mard b’mod dirett u dak il-​ħin stess fuq xi persuni, bħall-​ġdiem taʼ Mirjam, taʼ Użżija, u taʼ Geħażi (Nu 12:10; 2Kr 26:16-​21; 2Sl 5:25-​27). Imma milli jidher f’ħafna każi, il-​mard u l-​pesta kienu r-​riżultat tal-​imġiba midinba taʼ xi persuni jew in-​nazzjon. Huma sempliċiment ħasdu dak li żergħu; ġisimhom bata l-​effetti tal-​ħażen li għamlu. (Ga 6:7, 8) Dwar dawk li daru għall-​immoralità sesswali oxxena, l-​appostlu jgħid li Alla “telaqhom għan-​nuqqas taʼ ndafa, sabiex jiddiżonoraw lil ġisimhom stess . . . jirċievu fihom infushom il-​ħlas sħiħ li kien ħaqqhom għall-​iżball tagħhom.”—Rum 1:24-​27.

8-​14 TAʼ FRAR

TEŻORI MILL-​KELMA T’ALLA | NUMRI 1-​2

“Ġeħova Jorganizza l-​Poplu Tiegħu”

it-​1 397 ¶4

Kamp

Il-​kamp taʼ Iżrael kien kbir ħafna. Kien hemm total taʼ 603,550 gwerrier, flimkien man-​nisa, tfal, anzjani, persuni b’diżabilità, 22,000 Levita, u “kotra mħallta kbira ħafna taʼ barranin”—b’kollox xi 3,000,000 ruħ jew iktar. (Eżo 12:38, 44; Nu 3:21-​34, 39) It-​tul u l-​wisaʼ tal-​kamp mhumiex fiċ-​ċert; il-​kalkoli jvarjaw ħafna. Meta l-​kamp kien faċċata taʼ Ġeriko fuq il-​Pjanuri taʼ Mowab, jingħad li kien “minn Bet-​ġesimot sa Abel-​sittim.”—Nu 33:49.

Ġawhar Spiritwali

it-​2 764

Reġistrazzjoni

Jitniżżlu l-​ismijiet, ġeneralment skont il-​linja ġenealoġika tat-​tribù u tad-​dar. Dan kien jinvolvi iktar minn sempliċi ċensiment jew li jingħaddu l-​kapijiet tad-​djar. Ir-​reġistrazzjonijiet nazzjonali li jissemmew fil-​Bibbja kienu għal diversi skopijiet, bħal taxxa, inkarigi għal servizz militari, u għal xogħol tal-​Leviti fis-​santwarju.

15-​21 TAʼ FRAR

TEŻORI MILL-​KELMA T’ALLA | NUMRI 3-​4

“L-​Inkarigu tal-​Leviti”

it-​2 683 ¶3

Qassis

Taħt il-​Patt tal-​Liġi. Meta l-​Iżraelin kienu fil-​jasar fl-​Eġittu, Ġeħova qaddes għalih kull l-​ewwel imwieled tifel taʼ Iżrael fiż-​żmien meta qered l-​ewwel imwieled tal-​Eġizzjani permezz tal-​għaxar kastig. (Eżo 12:29; Nu 3:13) B’hekk, dawn l-​ewwel imweldin kienu taʼ Ġeħova, u kellu jużahom biss f’servizz speċjali għalih. Lil dawn l-​ewwel imweldin, Alla setaʼ tahom l-​inkarigu li jaqdu bħala qassisin u dawk li jieħdu ħsieb it-​tempju. Minflok, għoġbu jagħżel it-​tribù taʼ Levi għal dan is-​servizz. Għal din ir-​raġuni, hu ppermetta lin-​nazzjon ikollu l-​Leviti minflok l-​ewwel imweldin tat-​12-​il tribù l-​oħrajn (Efrajm u Manasse, iż-​żewġt itfal taʼ Ġużeppi, kienu meqjusin bħala żewġ tribujiet). Ċensiment wera li kien hemm 273 iktar l-​ewwel imweldin mhux Leviti minn xahar ’il fuq milli kien hemm Leviti. Għalhekk, Alla ried li jitħallas il-​prezz taʼ ħames xekel (€10) bħala fidwa għal kull wieħed mill-​273, liema flus ingħataw lil Aron u lil uliedu. (Nu 3:11-​16, 40-​51) Qabel ġara dan, Ġeħova kien diġà warrab għalih lil membri maskili tal-​familja taʼ Aron tat-​tribù taʼ Levi bħala dawk li jaqdu bħala qassisin taʼ Iżrael.—Nu 1:1; 3:6-​10.

it-​2 241

Leviti

Inkarigi. Kien hemm tliet familji taʼ Leviti minn ulied Levi, dawk taʼ Gerson, Keħat, u Merari. (Ġen 46:11; 1Kr 6:1, 16) Kull waħda minn dawn il-​familji ġiet mogħtija post ħdejn it-​tabernaklu fix-​xagħri. Il-​familja taʼ Keħat minn Aron ikkampjat fil-​Lvant quddiem it-​tabernaklu. Il-​Keħatin l-​oħra kkampjaw in-​naħa tan-​Nofsinhar, il-​Gersonin fil-​Punent, u l-​Merarin fit-​Tramuntana. (Nu 3:23, 29, 35, 38) Il-​Leviti kellhom ix-​xogħol li jarmaw, iżarmaw, u jġorru t-​tabernaklu. Biex imorru minn post għall-​ieħor, Aron u wliedu kienu jaqilgħu l-​purtiera li kienet tifred il-​Qaddis mill-​Iktar Qaddis u jgħattu l-​arka tat-​testimonjanza, l-​altari, u l-​għamara u għodod sagri oħra. Imbagħad, il-​Keħatin ġarrewhom. Il-​Gersonin ġarrew id-​drapp tat-​tined, l-​għata, il-​purtieri tal-​bitħa u tad-​daħla, il-​ħbula tat-​tined (milli jidher il-​ħbula tat-​tabernaklu nnifsu), u l-​Merarin ħadu ħsieb it-​twavel tal-​qafas, il-​kolonni, il-​pedestalli bl-​ingast, l-​imsiemer u l-​ħbula tat-​tined (ħbula tal-​bitħa madwar it-​tabernaklu).—Nu 1:50, 51; 3:25, 26, 30, 31, 36, 37; 4:4-​33; 7:5-​9.

it-​2 241

Leviti Fi żmien Mosè, Levita ried ikollu 30 sena biex jingħata l-​inkarigi kollha, bħal li jġorr it-​tabernaklu u l-​affarijiet tiegħu meta kien jinġarr. (Nu 4:46-​49) Ċertu xogħol setaʼ jsir mill-​età taʼ 25 sena, imma milli jidher mhux ix-​xogħol taʼ strapazz, bħal li jġorru t-​tabernaklu. (Nu 8:24) Fi żmien is-​Sultan David, l-​età tnaqqset għal 20 sena. Ir-​raġuni li ta David kienet li t-​tabernaklu (li issa kien hemm it-​tempju minfloku) ma kellux għalfejn jibqaʼ jinġarr. Wara l-​età taʼ 50 sena, ma kienx ikun hemm iktar inkarigi għal servizz obbligatorju. (Nu 8:25, 26; 1Kr 23:24-​26) Il-​Leviti kellhom ikunu jafu x’tgħid sew il-​Liġi. Spiss kienu jintalbu jaqrawha fil-​pubbliku u jgħallmuha lin-​nies komuni.—1Kr 15:27; 2Kr 5:12; 17:7-​9; Ne 8:7-​9.

22-​28 TAʼ FRAR

TEŻORI MILL-​KELMA T’ALLA | NUMRI 5-​6

“Kif Tistaʼ Timita lin-​Nażiriti?”

it-​2 477

Nażirit

Nażirit kellu jobdi tliet restrizzjonijiet prinċipali: (1) Ma kellux jixrob xorb li jsakkar, lanqas ma kellu jiekol xi prodott tad-​dielja, kemm jekk mhux misjur, misjur, jew niexef, lanqas jixrob il-​meraq tiegħu kemm jekk frisk, fermentat, jew il-​ħall tal-​inbid. (2) Ma kellux jaqtaʼ x-​xagħar taʼ rasu. (3) Ma kellux imiss ġisem mejjet, lanqas dak taʼ xi ħadd li jiġi minnu mill-​qrib ħafna, bħal missier, omm, ħu, jew oħt.—Nu 6:1-​7.

Wegħdi Speċjali. Il-​persuna li jagħmel din il-​wegħda speċjali kellu “jgħix bħala Nażirit [jiġifieri dedikat, separat] għal Ġeħova” u mhux għal għajn in-​nies billi jiċċaħħad mill-​pjaċiri tal-​ħajja. Minflok, “il-​jiem kollha tiegħu bħala Nażirit hu jkun qaddis għal Ġeħova.”—Nu 6:2, 8; qabbel Ġen 49:26.

Dak li kien mistenni min-​Nażiriti kellu tifsir speċjali fil-​qima taʼ Ġeħova. In-​Nażirit ma setax imiss ġisem mejjet lanqas taʼ dawk li jiġu minnu mill-​qrib ħafna, bħalma ma setax il-​qassis il-​kbir minħabba x-​xogħol sagru tiegħu. Minħabba r-​responsabbiltà serja tax-​xogħol tagħhom, il-​qassis il-​kbir u s-​sotto-​qassisin ma setgħux jixorbu nbid jew xorb li jsakkar waqt l-​inkarigi sagri tagħhom quddiem Ġeħova.—Le 10:8-​11; 21:10, 11.

Iktar minn hekk, in-​Nażirit “għandu juri li hu qaddis billi jħalli n-​nokkli tax-​xagħar taʼ rasu jikbru,” u dan kellu jservi taʼ sinjal li minnu kulħadd kellu jagħraf malajr li kien Nażirit. (Nu 6:5) L-​istess kelma Ebrajka għal Nażirit intużat b’konnessjoni maʼ ‘dwieli mhux miżburin’ matul is-​Sabat qaddis u s-​snin tal-​Ġublew. (Le 25:5, 11) Interessanti wkoll huwa l-​fatt li l-​istrixxa tad-​deheb fuq it-​turban tal-​qassis il-​kbir, li kien fiha l-​kliem “Il-​qdusija hi taʼ Ġeħova,” kienet tissejjaħ “is-​sinjal qaddis tad-​dedikazzjoni,” fejn intużat ukoll forma tal-​kelma Nażir. (Eżo 39:30, 31) Bl-​istess mod, il-​kuruna uffiċjali li kienu jilbsu s-​slaten midlukin taʼ Iżrael kienet tissejjaħ ukoll neʹzer. (2Sa 1:10; 2Sl 11:12) Fil-​kongregazzjoni Kristjana, l-​appostlu [Pawlu] jgħid li x-​xagħar twil taʼ mara hu mogħti lilha minflok għata tar-​ras. Din hija tfakkira naturali għaliha li hi għandha pożizzjoni differenti minn tar-​raġel; hi għandha tkun konxja mill-​pożizzjoni taʼ sottomissjoni fl-​arranġament t’Alla. Mela ħtiġijiet bħal dawn—xagħar mhix maqtugħa (xi ħaġa mhux naturali għal raġel), li jżomm lura għalkollox mill-​inbid, kif ukoll il-​bżonn li jkun nadif u bla tebgħa—kienu jfakkru lil Nażirit dedikat dwar l-​importanza taʼ ċaħda personali u sottomissjoni sħiħa għar-​rieda taʼ Ġeħova.—1Ko 11:2-​16.