Mistoqsijiet mill-​Qarrejja

Alla meta se jieqaf isejjaħ lill-​Kristjani individwali għal tama fis-​sema?

Il-​Bibbja ma tagħtix tweġiba preċiża għal din il-​mistoqsija. Aħna nafu li d-​dlik tad-​dixxipli taʼ Ġesù li għandhom it-​tama li jirċievu l-​wirt tagħhom fis-​sema beda fis-​sena 33 E.K. (Atti 2:​1-4) Nafu wkoll li wara l-​mewt taʼ l-​appostli, il-​Kristjani midlukin ġenwini li huma mxebbhin maʼ “qamħ” bdew ‘jikbru flimkien’ mal-​Kristjani foloz, is-​“sikrana.” (Mattew 13:​24-​30) Imbagħad, lejn l-​aħħar tas-​seklu 19, il-​Kristjani midlukin reġgħu kienu attivi b’mod prominenti. Fl-​1919 beda l-​ħsad tal-​“prodott taʼ l-​art,” inkluż il-​ġbir taʼ l-​aħħar uħud tal-​midlukin.​—Rivelazzjoni 14:​15, 16.

Mill-aħħar tas-​seklu 19 sa l-​1931, l-​għan prinċipali tax-​xogħol taʼ l-​ippridkar kien il-​ġbir tal-​fdal tal-​membri tal-​ġisem taʼ Kristu. Fl-​1931, l-​Istudenti tal-​Bibbja ħadu l-​isem Xhieda taʼ Ġeħova, isem ibbażat fuq il-​Bibbja, u fil-​ħarġa taʼ The Watchtower tal-​15 taʼ Novembru, 1933, ħareġ il-​ħsieb li dan l-​isem uniku kien id-​“dinar” li rrefera għalih Ġesù fil-​parabbola mniżżla f’Mattew 20:​1-​16. Kien maħsub li t-​12-il siegħa msemmijin fil-​parabbola jikkorrispondu mat-​12-il sena mill-​1919 sa l-​1931. Għal ħafna snin wara dan, kien maħsub li s-​sejħa għas-​Saltna tas-​sema ntemmet fl-​1931 u li dawk imsejħin biex ikunu werrieta bi sħab maʼ Kristu fl-​1930 u fl-​1931 kienu “l-​aħħar” uħud li ssejħu. (Mattew 20:​6-8) Madankollu, fl-​1966 ġiet preżentata fehma aġġustata taʼ dik il-​parabbola, u ġie ċċarat li din xejn ma kellha x’taqsam mat-​tmiem tas-​sejħa tal-​midlukin.

Fl-1935, kien mifhum li l-​“folla kbira” taʼ Rivelazzjoni 7:​9-​15 kienet magħmula minn “nagħaġ oħrajn,” il-​Kristjani bit-​tama għall-​art li kellhom jidhru fix-​xena tad-​dinja fl-​“aħħar jiem” u li bħala grupp kellhom jgħaddu ħajjin minn Armageddon. (Ġwanni 10:16; 2 Timotju 3:1; Rivelazzjoni 21:​3, 4) Wara dik is-​sena, ix-​xogħol biex isiru d-​dixxipli beda jiffoka prinċipalment biex tinġabar il-​folla kbira. Għaldaqstant, b’mod speċjali wara l-​1966 kien maħsub li s-​sejħa għas-​sema kienet waqfet fl-​1935. Dan kien jidher konfermat meta kważi dawk kollha li tgħammdu wara l-​1935 ħassew li kellhom tama għall-​art. Minn dak iż-​żmien ’l hawn, kien maħsub li dawk kollha li kienu jissejħu għal tama fis-​sema kienu qed jieħdu post il-​Kristjani midlukin li ma baqgħux leali.

Bla dubju, jekk wieħed mill-​midlukin ma jibqax fit-​triq tal-​verità u ma jindimx, Ġeħova fil-​fatt jagħżel individwu ieħor biex jiħodlu postu. (Rumani 11:​17-​22) Madankollu, l-​għadd taʼ wħud midlukin ġenwini li ma baqgħux leali probabbilment m’huwiex kbir. Min-​naħa l-​oħra, hekk kif għadda ż-​żmien, xi Kristjani mgħammdin wara l-​1935 kellhom xiehda mill-​ispirtu qaddis li huma kellhom tama għas-​sema. (Rumani 8:​16, 17) Għaldaqstant jidher li aħna ma nistgħux inpoġġu data speċifika dwar meta tintemm is-​sejħa għall-​Kristjani bit-​tama għas-​sema.

Kif għandu jitqies individwu li huwa determinat f’qalbu li issa huwa wieħed mill-​midlukin u jibda jieħu sehem mill-​emblemi fit-​Tifkira? Dan m’għandux jiġi ġudikat. Il-​kwistjoni hija bejnu u bejn Ġeħova. (Rumani 14:12) Madankollu, il-​Kristjani midlukin li jkunu ġenwini ma jitolbux attenzjoni speċjali. Huma ma jemmnux li l-​fatt li huma midlukin jagħtihom xi “dehen” speċjali, iktar milli jistaʼ jkollhom xi ftit mill-​membri tal-​folla kbira li għandhom l-​esperjenza. Ma jaħsbux li huma bilfors għandhom iktar spirtu qaddis milli għandhom sħabhom tan-​nagħaġ oħrajn; lanqas ma jistennew xi trattament speċjali jew jistqarru li l-​fatt li jieħdu mill-​emblemi jpoġġihom f’pożizzjoni ’l fuq mill-​anzjani maħtura fil-​kongregazzjoni. Huma jiftakru bl-​umiltà li xi rġiel midlukin fl-​ewwel seklu ma kinux jikkwalifikaw biex jaqdu bħala anzjani jew qaddejja ministerjali. (1 Timotju 3:​1-10, 12, 13; Titu 1:​5-9; Ġakbu 3:1) Xi Kristjani midlukin kienu saħansitra batuti spiritwalment. (1 Tessalonikin 5:​14) U l-​aħwa nisa, għalkemm midlukin, ma kinux jgħallmu fil-​kongregazzjoni.​—1 Timotju 2:​11, 12.

Għaldaqstant, il-​Kristjani midlukin flimkien maʼ sħabhom in-​nagħaġ oħrajn iħabirku biex jibqgħu b’saħħithom spiritwalment, billi jikkultivaw il-​frott taʼ l-​ispirtu u jaħdmu għall-​paċi tal-​kongregazzjoni. Il-​Kristjani kollha, kemm jekk midlukin u kemm jekk min-​nagħaġ oħrajn, jaħdmu iebes biex jippridkaw l-​aħbar tajba u jagħmlu dixxipli taħt id-​direzzjoni tal-​Ġemgħa li Tiggverna. Il-​Kristjani midlukin huma kuntenti li jagħmlu dan sakemm tkun ir-​rieda t’Alla li jibqgħu fuq l-​art bħala qaddejja taʼ Ġeħova.