Agħmel il-​Ħin Għal Dak li Hu Importanti

“Iż-​żmien li fadal tqassar.”—1 Korintin 7:29.

“LI TOQGĦOD taqbeż u ċċafċaf fl-​ilma ma jfissirx li qed tgħum,” kiteb Michael LeBoeuf fil-​ktieb tiegħu Working Smart.

Fi kliem ieħor, jistaʼ jkun hemm differenza bejn li sempliċement tkun attiv u bejn li tassew twettaq xi ħaġa siewja. Ħares lura lejn il-​ġimgħa li għaddiet. Għal xiex għamilt il-​ħin? X’ma lħaqtx għamilt minħabba li kellek ħafna x’tagħmel? Tara li hemm bżonn tagħmel iktar ħin għall-​affarijiet li tassew jimpurtak minnhom?

Ikkunsidra dak li bassar Ġesù dwar iż-​żminijiet mgħaġġlin tagħna. Hu qal li hekk kif din is-​sistema toqrob lejn tmiemha u d-​dinja l-​ġdida u ġusta t’Alla tersaq qrib, id-​dixxipli tiegħu kien se jkollhom ħafna x’jagħmlu. Jagħmlu xiex? Jippritkaw “din l-​aħbar tajba tas-​saltna” t’Alla. Ġesù qal ukoll li l-​biċċa l-​kbira min-​nies kienu se jkunu mħabbtin wisq biex jisimgħu. Kienu se jkunu medhijin bl-​affarijiet normali tal-​ħajja. Hu żied li dawk li huma mħabbtin wisq biex jagħtu kas il-​messaġġ tas-​Saltna kienu se jsofru qerda.—Mattew 24:14, 37-​39; Luqa 17:28-​30.

Illum, ix-​Xhieda taʼ Ġeħova qed jippritkaw l-​aħbar tajba tas-​Saltna t’Alla f’iktar minn 230 pajjiż. Bħalma bassar Ġesù, ħafna ma jridux jisimgħu, billi jgħidu li huma “mħabbtin wisq.” Imma aħna nistidnuk biex tieħu l-​ħin mill-​ħajja mgħaġġla tiegħek ħalli teżamina dak li tgħallem il-​Bibbja dwar is-​Saltna t’Alla. Hija t-​tama tagħna li hekk kif titgħallem dwar il-​barkiet li Alla għandu merfugħin għall-​umanità, int se taqbel illi li tismaʼ u tagħti kas il-​messaġġ tal-​Bibbja hu xi ħaġa taʼ min jagħmel il-​ħin għaliha, xi ħaġa li hi tassew importanti.a

[Nota taˈ taħt]