“Jien Konvint li l-​Ħajja Ġiet Disinjata Minn Alla”

Għidilna xi ħaġa dwar it-​trobbija tiegħek.

Missieri kien inġinier. Spiss kien ikellimni b’entużjażmu dwar il-​matematika u x-​xjenza. Bħala tifel kont nimmeravilja ruħi bil-​pjanti u l-​annimali li kien hemm fix-​xmajjar żgħar u l-​għadajjar ħdejn id-​dar tagħna fi New Paris, Ohio, l-​Istati Uniti tal-​Amerika. Għalhekk, meta mort l-​Università taʼ Purdue, għażilt li nistudja l-​ekoloġija.

Kienet tinteressak ir-​reliġjon?

Iva, kienet. Missieri inkuraġġieni nistudja r-​reliġjon Luterana li konna nħaddnu. Jien studjajt il-​Grieg komuni (Koine Greek), waħda mil-​lingwi li bihom bdiet tinkiteb il-​Bibbja. Jien rawwimt rispett profond għall-​Bibbja.

X’kienet il-​ħarsa tiegħek lejn it-​teorija tal-​evoluzzjoni?

Il-​knisja tiegħi aċċettatha. Sħabi tax-​xogħol kienu jemmnuha. Allura qatt ma ddubitajtha. Imma kont nemmen ukoll li kien hemm Alla. Kont naħseb li ż-​żewġ ideat kienu kompatibbli. Għalkemm kont nirrispetta l-​Bibbja, ma kontx naħseb li kienet ġejja minn Alla.

X’ġiegħlek tbiddel il-​ħarsa tiegħek lejn il-​Bibbja?

Tnejn mix-​Xhieda taʼ Ġeħova, Steve u Sandy, ġew iħabbtulna l-​bieb. Huma wrew lili u lil marti Debbie li l-​Bibbja, għalkemm mhix ktieb dwar ix-​xjenza, hi xjentifikament eżatta. Pereżempju, hi tgħid dwar Alla: “Hemm Wieħed li jgħammar ’il fuq miċ-​ċirku taʼ l-​art.” (Isaija 40:22) Tgħid ukoll: “Hu qed . . . idendel l-​art fuq ix-​xejn.” (Ġob 26:7) Dak iż-​żmien, kont qed nuża ritratti meħudin bis-​satellita biex nistudja l-​ekoloġija, allura dawn l-​iskritturi impressjonawni. Inkitbu ħafna qabel xi ħadd ħa ritratt taċ-​ċirku tal-​art imdendla fuq ix-​xejn. Hekk kif jien u marti studjajna l-​Bibbja maʼ Steve u Sandy, tgħallimt dwar profeziji li seħħew, dwar pariri li jirnexxu, u dwar spjegazzjonijiet li ssodisfawni. Bil-​mod il-​mod, sirt konvint li l-​Bibbja hija l-​Kelma t’Alla.

Meta biddilt il-​ħsieb tiegħek dwar kif bdiet il-​ħajja?

Maż-​żmien, Steve urieni l-​istqarrija ċara tal-​Bibbja: “Alla Ġeħova sawwar ir-​raġel mit-​trab tal-​art.” (Ġenesi 2:7) B’hekk, il-​ħajja tal-​ewwel bniedem hija dokumentata fil-​Bibbja. Dan qajjem il-​mistoqsija: Taqbel il-​Bibbja mal-​fatti xjentifiċi? Steve inkuraġġieni nfittex dwar is-​suġġett, u hekk għamilt.

X’tgħallimt dwar l-​evoluzzjoni?

Ħafna affarijiet. Biex insemmi waħda biss, it-​teorija tal-​evoluzzjoni tipprova tispjega l-​oriġini tal-​ispeċi. Affarijiet ħajjin huma magħmulin minn organi effiċjenti, bħalma huma l-​qalb, il-​pulmun, u l-​għajnejn. Ukoll, b’mikroskopju naraw ‘magni’ disinjati b’mod tal-​għaġeb li jinsabu fiċ-​ċelluli. Minn fejn jiġu d-​disinji taʼ dawn? L-​evoluzzjonisti jistqarru li l-​aħjar mekkaniżmi huma magħżulin awtomatikament għaliex l-​affarijiet ħajjin li għandhom lilhom jgħixu l-​iktar. Imma din l-​idea ma twiġibx il-​mistoqsija: Minn fejn jiġu l-​mekkaniżmi? Sirt naf li ħafna xjentisti ma jemmnux li t-​teorija tal-​evoluzzjoni twieġeb din il-​mistoqsija. Professur taż-​żooloġija stqarr miegħi li ma kien jemmen bl-​ebda teorija tal-​evoluzzjoni. Madankollu, ma qagħadx jgħid lil kulħadd kif jaħsibha għax beżaʼ li jitlef ħobżu.

L-​għarfien tiegħek tal-​ekoloġija jsaħħaħlek il-​fidi tiegħek?

Iva. Ix-​xogħol tiegħi kien jinvolvi l-​istudju dwar kif affarijiet ħajjin jiddependu minn xulxin. Fid-​dinja, kull ħaġa ħajja tiddependi minn xi ħaġa oħra. Pereżempju, ikkunsidra l-​fjuri u n-​naħal. Il-​kulur, ir-​riħa, in-​nektar, u kif inhuma magħmulin il-​fjuri huma disinjati biex jattiraw lin-​naħal u biex dan jitraxxax bit-​trab li jdakkar (pollen). In-​naħal huwa magħmul biex jieħu n-​nektar u biex jieħu t-​trab li jdakkar taʼ fjura għal fuq pjanta oħra biex jiffertilizzaha. Biċ-​ċar, il-​fjuri u n-​naħal huma disinjati biex jagħtu dak li jeħtieġ l-​ieħor.

F’ekosistema naraw kemm l-​affarijiet ħajjin jiddependu minn xulxin fuq skala kbira. Ekosistema hija ambjent li jkun fih forsi eluf taʼ tipi t’annimali, pjanti, organiżmi żgħar, u fungi. L-​annimali kollha jiddependu mill-​pjanti għall-​ikel u l-​ossiġnu, u l-​biċċa l-​kbira tal-​pjanti bil-​fjuri jiddependu mill-​annimali. Għalkemm l-​ekosistemi huma komplikati bil-​kbir u l-​organiżmi taʼ ġo fihom huma fraġli, huma jistgħu jibqgħu ħajjin għal millennji sħaħ. Anke wara li ssir ħsara minħabba t-​tinġis, ladarba s-​sors tat-​tinġis jitlaq, ekosistema komplikata malajr terġaʼ tiżviluppa. Meta naħseb fuq kemm is-​sistema kollha fuq l-​art kapaċi tfejjaq lilha nfisha, inkun konvint li l-​ħajja ġiet disinjata minn Alla.

Għala sirt wieħed mix-​Xhieda taʼ Ġeħova?

Kont ninkwieta ħafna dwar kif is-​soċjetà umana qed teqred l-​ambjent. Kont naf li għalkemm l-​ekosistemi huma b’saħħithom, huma jistgħu jinqerdu. Mix-​Xhieda taʼ Ġeħova tgħallimt li, skont l-​Iskrittura, Alla se ‘jeqred lil dawk li qed jeqirdu l-​art.’ (Rivelazzjoni 11:18) Dan il-​kliem kien importanti għalija. Hekk kif komplejt nistudja l-​Bibbja, bil-​mod il-​mod irrealizzajt li t-​tama li toffri l-​Bibbja hija żgura.

Nieħu gost naqsam it-​twemmin tiegħi m’oħrajn u studjajt il-​Bibbja maʼ xi xjentisti. Irtirajt kmieni mix-​xogħol meta kelli 55 sena biex inqattaʼ iktar ħin ngħin lin-​nies jifhmu lill-​Ħallieq tal-​ħajja u l-​iskop tiegħu għall-​art meraviljuża tagħna.