It-talb

Hemm xi ħadd li jismaʼ t-talb tagħna?

“O Semmiegħ it-talb, għandek jiġu n-nies taʼ kull xorta.”—Salm 65:2.

DAK LI JGĦIDU N-NIES

Ħafna nies jiddubitaw jekk xi ħadd jismax it-​talb tagħhom, speċjalment meta jkunu għaddejjin minn xi tbatija.

DAK LI TGĦID IL-BIBBJA

“Għajnejn [Alla] Ġeħova huma fuq in-​nies sewwa, u widnejh miftuħin għat-​talb bil-​ħerqa tagħhom; imma Ġeħova jdawwar wiċċu lil hinn minn dawk li qed jagħmlu l-​ħażen,” tgħid il-​Bibbja. (1 Pietru 3:12) Bla dubju, Alla tassew jismaʼ t-​talb. Madankollu, hu b’mod speċjali inklinat li jismaʼ lil dawk li jimxu fi qbil mal-​prinċipji tiegħu. Rigward il-​fatt li Alla lest li jismagħna meta nitolbu, skrittura oħra tgħid: “Din hi l-​fiduċja li għandna fih, li, kulma nitolbuh skond ir-​rieda tiegħu, hu jismagħna.” (1 Ġwanni 5:14) Għalhekk, dawk li jitolbu b’mod sinċier għandhom bżonn jifhmu liema tip taʼ talb ikun fi qbil mar-​rieda t’Alla.

Kif għandna nitolbu?

“Meta titlob, toqgħodx tirripeti l-istess ħaġa.”—Mattew 6:7.

DAK LI JGĦIDU N-NIES

Aduraturi taʼ diversi reliġjonijiet—bħalma huma l-​Buddiżmu, il-​Kattoliċiżmu, il-​Ħinduiżmu, u l-​Iżlam—ġew mgħallmin biex jużaw affarijiet bħall-​kuruna tar-​rużarju sabiex jirripetu u jgħoddu t-​talb tagħhom.

DAK LI TGĦID IL-BIBBJA

It-​talb għandu jiġi mqanqal mill-​qalb u jintqal bis-​sinċerità; m’għandux jiġi mgħallem bl-​amment u ripetut b’mod mekkaniku. L-​Iskrittura tħeġġiġna: “Meta titlob, toqgħodx tirripeti l-​istess ħaġa, bħalma jagħmlu n-​nies tal-​ġnus, għax dawn jimmaġinaw li se jinstemgħu għax jużaw ħafna kliem. Għalhekk, tagħmlux bħalhom, għax Alla Missierkom jaf x’teħtieġu saħansitra qabel ma titolbuh.”—Mattew 6:7, 8.

GĦALA HU IMPORTANTI

Meta t-​talb jiġi offrut b’mod li ma jkunx aċċettabbli għal Alla, l-​aduratur jaf ikun qiegħed jaħli l-​ħin jew possibbilment joffendi lil Alla. Il-​Bibbja twissi li talb offrut minn uħud li jirrifjutaw li jimxu fi qbil mar-​rieda t’Alla hu ‘mistkerrah’ f’għajnejh.—Proverbji 28:9.

Lil min għandna nitolbu?

“Fittxu lil [Alla] Ġeħova waqt li għadu jistaʼ jinstab. Sejħulu waqt li qiegħed fil-qrib.”—Isaija 55:6.

DAK LI JGĦIDU N-NIES

Xi aduraturi jitolbu lil Marija jew lil xi ħlejjaq oħra, bħal anġli u individwi, li huma meqjusin bħala “qaddisin.” Fost dawn il-​qaddisin insibu lil “Sant’Antnin” li jsib il-​ħwejjeġ mitlufin u lil “Santa Barbara” li jduru lejha biex tbegħedhom minn kull deni u ħsara. Ħafna aduraturi jduru bit-​talb lejn dawn il-​“qaddisin” u anġli bit-​tama li dawn il-​ħlejjaq se jidħlu għalihom quddiem Alla.

DAK LI TGĦID IL-BIBBJA

Aduraturi veri għandhom jitolbu lil “Missierna fis-​smewwiet.” (Mattew 6:9) Il-​Bibbja tħeġġiġna: “Tkunu ansjużi fuq xejn, imma f’kollox b’talb u b’suppliki flimkien maʼ radd il-​ħajr ħallu lil Alla jkun jaf x’teħtieġu.”​—Filippin 4:6.