Żjara fin-​Nikaragwa

IN-​NIES spiss isejħu lin-​Nikaragwa l-​art tal-​lagi u l-​vulkani. Din l-​art fiha l-​ikbar lag fl-​Amerika Ċentrali, il-​Lag Nikaragwa. It-​tribujiet indiġeni sejħulu Cocibolca, li jfisser “Baħar Ħelu.” Fih mijiet taʼ gżejjer u hu l-​uniku lag tal-​ilma ħelu li fih annimali tal-​oċean bħalma huma l-​kelb il-​baħar, il-​pixxispad, u t-​tarpon.

In-​Nikaragwa wkoll fiha wieħed mill-​iżjed reġjuni iżolati tal-​Amerika Ċentrali—il-​Mosquito Coast. Dan hu strixxa art wiesgħa 65 kilometru tul il-​kosta tal-​Lvant u li tibqaʼ sejra fil-​Ħonduras. Il-​Miskito (mod ieħor kif tiġi spelluta Mosquito) huma wieħed mill-​ħafna gruppi taʼ nies indiġeni fin-​Nikaragwa li l-​istorja tagħhom tmur lura għaż-​żmien taʼ qabel ma waslu l-​Ewropej fis-​seklu 16.

Il-​Miskito għandhom konnessjonijiet soċjali b’saħħithom u drawwiet uniċi. Pereżempju, il-​lingwa Miskito ma fihiex kliem li bih tistaʼ tindirizza lil xi ħadd formalment, bħal “Sur” jew “Sinjura.” Fil-​komunitajiet rurali, nies iżgħar jindirizzaw lil oħrajn ikbar minnhom bħala “Ziju” jew “Zija,” kemm jekk jiġu minn xulxin jew le. Drawwa eqdem fost in-​nisa Miskito hi li jagħtu merħba lil ħbieb tal-​qalb jew qraba billi jmissu ħaddhom maʼ ħadd il-​persuna l-​oħra. Imbagħad il-​mara li bdiet il-​merħba tieħu nifs ’il ġewwa minn imneħirha.