X’tistaʼ tagħmel biex ikun hemm il-​paċi fil-​familja

TAĦSEB int li l-​Bibbja tistaʼ tgħin biex ikun hemm il-​paċi fil-​familja? Jekk jogħġbok qabbel dak li tgħid il-​Bibbja maʼ dak li sabu t’għajnuna dawn in-​nies li ġew intervistati. Ikkunsidra liema punti jistgħu jgħinuk tevita l-​ġlied, iżżomm il-​paċi, u ssaħħaħ rabtiet dejjiema.

PRINĊIPJI BIBLIĊI LI JWASSLU GĦALL-​PAĊI

ŻVILUPPA ĦARSA POŻITTIVA DWAR XULXIN.

‘Tagħmlu xejn bi ġlied jew bi kburija, imma b’umiltà qisu lill-​oħrajn superjuri għalikom. Tfittxux l-​interessi persunali tagħkom biss, imma wkoll l-​interessi persunali taʼ l-​oħrajn.’—Filippin 2:3, 4.

“Aħna sibna li jkun tajjeb li tqis lill-​persuna l-​oħra fiż-​żwieġ iżjed importanti minnek innifsek u minn ħaddieħor.”—C. P., ilha miżżewġa 19-​il sena.

ISMAʼ B’ATTENZJONI U B’MOĦĦ MIFTUĦ.

“Ibqaʼ fakkarhom biex . . . ma jkunux ġellidin, imma jkunu raġunevoli, u kollhom ħlewwa maʼ kulħadd.”—Titu 3:1, 2.

“Ħafna tensjoni tistaʼ tiġi evitata jekk ma nirrispondux lis-​sieħeb fiż-​żwieġ b’ton taʼ ġlied. Hu importanti li tismaʼ mingħajr preġudizzju u tirrispetta l-​opinjoni tiegħu jew tagħha, anki jekk aħna ma naqblux.”—P. P., ilha miżżewġa 20 sena.

URI IŻJED PAĊENZJA U ĦLEWWA.

“Il-​paċenzja tipperswadi kmandant, u lsien ġwejjed jistaʼ jkisser għadma.”—Proverbji 25:15.

“Se jkun hemm ġlied, imma x’jiġri wara jiddependi fuq l-​ispirtu li nuru. Verament għandna nkunu paċenzjużi. Meta nkunu paċenzjużi, insibu li l-​affarijiet jirranġaw.”—G. A., ilha miżżewġa 27 sena.

QATT TAQAʼ GĦAL LI TKUN ABBUŻIV VERBALMENT JEW FIŻIKAMENT.

“Qisu li twarrbuhom kollha, il-​korla, ir-​rabja, il-​ħażen, it-​tgħajjir, u l-​kliem oxxen minn fommkom.”—Kolossin 3:8.

“Lil żewġi nammirah minħabba r-​rażan tiegħu. Dejjem jibqaʼ kalm u qatt ma jgħajjat miegħi jew jinsultani.”—B. D., ilha miżżewġa 20 sena.

KUN ĦERQAN BIEX TAĦFER U TIRRANĠA D-​DIFFERENZI MALAJR.

“Komplu ssaportu lil xulxin u aħfru lil xulxin mill-​qalb jekk xi ħadd għandu għalxiex jilmenta kontra ħaddieħor.”—Kolossin 3:13.

“Meta wieħed ikun stressjat, mhux dejjem ikun faċli jibqaʼ kalm, u jistaʼ malajr jgħid jew jagħmel affarijiet li jweġġgħu lis-​sieħeb fiż-​żwieġ. F’mumenti bħal dawn, tkun ħaġa mill-​isbaħ li jaħfer. Mingħajr il-​maħfra, żwieġ b’saħħtu mhux possibbli.”—A. B., ilha miżżewġa 34 sena.

AGĦMILHA DRAWWA LI TAGĦTI U TAQSAM M’OĦRAJN MINGĦAJR EGOIŻMU.

“Idraw agħtu, u n-​nies jagħtukom. . . . Għax bil-​kejl li tkejlu, ikejlulkom lura.”—Luqa 6:38.

“Żewġi jaf xi nħobb, u dejjem itini xi sorpriża. Mill-​banda l-​oħra, spiss naħseb, ‘Kif nistaʼ nferrħu jien?’ B’hekk dħaqna ħafna, u għadna nidħqu.”—H. K., ilha miżżewġa 44 sena.

TIQAFX TĦEĠĠEĠ IL-​PAĊI FIL-​FAMILJA

Il-​membri tal-​familja li ġew intervistati minn Stenbaħ! huma ftit mill-​miljuni madwar id-​dinja li mill-​Bibbja ġew megħjunin jiżviluppaw kwalitajiet li jgħinu biex ikun hemm iżjed paċi fil-​familja.a Anki meta wħud fil-​familja tagħhom jidhru li mhumiex qed jipprovaw jikkooperaw, sabu li l-​isforz li jagħmlu biex ikunu paċifiċi xorta jkun worth it, għax il-​Bibbja twiegħed: “Dawk li jħeġġu l-​paċi jkollhom il-​ferħ.”—Proverbji 12:20.