Kapitlu 7

Dak Li Għamel Alla Biex Isalva lill-​umanità

1, 2. (a) Ċenturjun Ruman kif ġie li japprezza min kien l-​Iben t’Alla? (b) Jehovah għala ħalla lil Ġesù jmut?

DARBA waħda wara nofs in-​nhar fir-​rebbiegħa kważi 2,000 sena ilu, ċenturjun Ruman qagħad jara tlett irġiel imutu mewta bil-​mod il-​mod u agonizzanti. Dak is-​suldat innota speċjalment lil wieħed minnhom—Ġesù Kristu. Ġesù kien ġie msammar maʼ pilastru taʼ l-​injam. Is-​sema f’nofs inhar iddallam hekk kif qorob il-​mument taʼ mewtu. Meta miet, l-​art tregħdet b’mod vjolenti, u s-​suldat esklama: “Dan il-​bniedem kien tassew Bin Alla!”—Mark 15:39.

² L-​Iben t’Alla! Dak is-​suldat kellu raġun. Kien għadu kif ra b’għajnejh l-​iktar ġrajja importanti li qatt seħħet fuq l-​art. F’okkażjonijiet iktar qabel, Alla nnifsu kien sejjaħ lil Ġesù Ibnu l-​maħbub. (Mattew 3:17; 17:5) Jehovah għala ħalla lil Ibnu jmut? Għaliex dan kien il-​mezz t’Alla biex isalva lill-​umanità mid-​dnub u l-​mewt.

MAGĦŻUL GĦAL SKOP SPEĊJALI

3. Għala kien xieraq li l-​Iben uniġenitu t’Alla jkun magħżul għal skop speċjali rigward l-​umanità?

³ Bħalma diġà tgħallimna f’dan il-​ktieb, Ġesù kellu eżistenza qabel ma sar bniedem. Hu jissejjaħ “l-​Iben il-​waħdieni” t’Alla għaliex Jehovah ħalqu direttament. Alla minn dak inhar ’il quddiem uża lil Ġesù biex iġib l-​affarijiet l-​oħrajn kollha f’eżistenza. (Ġwann 3:18; Kolossin 1:16) Ġesù kellu speċjalment għal qalbu lill-​umanità. (Proverbji 8:30, 31) Mhux taʼ b’xejn li Jehovah għażel lill-​Iben uniġenitu tiegħu biex jaqdi skop speċjali meta l-​umanità ġiet taħt il-​kundanna tal-​mewt!

4, 5. Qabel ma Ġesù ġie fuq l-​art, il-​Bibbja x’irrivelat dwar iż-​Żerriegħa Messjanika?

⁴ Meta lissen is-​sentenza fuq Adam, Eva, u Satana fil-​ġnien t’Għeden, Alla tkellem dwar il-​Ħellies futur bħala ‘nisel [“żerriegħa,” NW].’ Dan iż-​Żerriegħa, jew nisel, kellu jiġi biex ineħħi l-​mard terribbli li Satana x-​Xitan, “is-​Serp tal-​qedem,” kien ġab. Fil-​fatt, iż-​Żerriegħa mwiegħed kellu jgħaffeġ lil Satana u lil dawk kollha li segwewh.—Ġenesi 3:15; 1 Ġwann 3:8; Apokalissi 12:9.

⁵ Matul is-​sekli, Alla bil-​mod il-​mod irrivela iktar dwar iż-​Żerriegħa, imsejjaħ ukoll il-​Messija. Bħalma huwa muri fit-​tabella f’paġna 37, għadd taʼ profeziji taw dettalji dwar ħafna aspetti taʼ ħajtu fuq l-​art. Per eżempju, hu kellu jissaporti li jiġi ttrattat ħażin b’mod terribbli sabiex iwettaq l-​irwol tiegħu fl-​iskop t’Alla.—Isaija 53:3-5.

GĦALA L-​MESSIJA KELLU JMUT

6. Skond Danjel 9:24-26, il-​Messija x’kellu jwettaq, u kif?

⁶ Il-​profezija ddokumentata f’​Danjel 9:24-26 bassret li l-​Messija—il-​Wieħed Midluk t’Alla—kellu jwettaq skop kbir. Kellu jiġi fuq l-​art ‘biex itemm id-​dnub, jispiċċa l-​ħtija, u jħallas il-​ħażen, biex imbagħad tiġi l-​ġustizzja’ għal dejjem. Il-​Messija kellu jneħħi l-​kundanna tal-​mewt minn fuq l-​umanità leali. Imma kif kellu jagħmlu dan? Il-​profezija tispjega li kellu jiġi “maqtugħ,” [NW] jew mogħti l-​mewt.

7. Il-​Lhud għala offrew sagrifiċċji taʼ l-​annimali, u dawn liema ħaġa kienu jiffiguraw bil-​quddiem?

⁷ L-​Iżraeliti tal-​qedem kienu familjari maʼ l-​idea taʼ tpattija għall-​iżball. Fil-​qima tagħhom taħt il-​Liġi li Alla tahom permezz taʼ Mosè, huma regolarment offrew sagrifiċċji taʼ l-​annimali. Dawn fakkru lill-​poplu taʼ Iżrael li l-​bnedmin jeħtieġu xi ħaġa biex tpatti għad-​dnubiet tagħhom jew tgħattihomlhom. L-​appostlu Pawlu ġabar fil-​qosor il-​prinċipju b’dan il-​mod: “Bla tixrid tad-​demm ma hemmx maħfra.” (Lhud 9:22) Il-​Kristjani m’humiex taħt il-​Liġi Mosajka bil-​ħtiġijiet tagħha, bħalma huma s-​sagrifiċċji. (Rumani 10:4; Kolossin 2:16, 17) Huma jafu wkoll li s-​sagrifiċċji taʼ l-​annimali ma jistgħux jipprovdu maħfra permanenti u kompleta tad-​dnubiet. Minflok, dawn l-​offerti bħala sagrifiċċji kienu jiffiguraw bil-​quddiem is-​sagrifiċċju bil-​wisq iktar taʼ valur—dak tal-​Messija, jew Kristu. (Lhud 10:4, 10; qabbel Galatin 3:24.) Madankollu, għandek mnejn tistaqsi, ‘Kien tassew neċessarju li l-​Messija jmut?’

8, 9. Adam u Eva liema affarijiet prezzjużi tilfu, u l-​azzjonijiet tagħhom kif effettwaw lid-​dixxendenti tagħhom?

⁸ Iva, il-​Messija kellu jmut jekk l-​umanità kellha tiġi salvata. Biex nifhmu għala, irridu mmorru lura fil-​ħsieb għall-​ġnien t’Għeden u nipprovaw nifhmu sewwa l-​enormità taʼ dak li Adam u Eva tilfu meta rribellaw kontra Alla. Ħajja eterna kienet ġiet imqiegħda quddiemhom! Bħala tfal t’Alla, gawdew ukoll relazzjoni diretta miegħu. Imma meta rrifjutaw l-​istat taʼ ħakkiem taʼ Jehovah, tilfu dak kollu u ġabu d-​dnub u l-​mewt għal fuq ir-​razza umana.—Rumani 5:12.

⁹ Kien bħal li kieku l-​ewwel ġenituri tagħna kienu berbqu għana kbir, u b’hekk daħlu f’dejn enormi. Adam u Eva għaddew dak id-​dejn għal fuq in-​nisel tagħhom. Minħabba li ma twelidniex perfetti u bla dnub, kull wieħed minna huwa midneb u qiegħed imut. Meta nimirdu jew ngħidu xi ħaġa li tweġġaʼ u li nixtiequ kieku nreġġgħu lura, aħna qegħdin nesperjenzaw l-​effetti tad-​dejn li writna—l-​imperfezzjoni umana. (Rumani 7:21-25) It-​tama unika tagħna qiegħda biss f’li niksbu mill-​ġdid dak li tilef Adam. Madankollu, ma nistgħux naqilgħu l-​ħajja umana perfetta. Ladarba l-​bnedmin imperfetti kollha jikkommettu d-​dnub, ilkoll kemm aħna naqilgħu l-​mewt, mhux il-​ħajja.—Rumani 6:23.

10. X’kien meħtieġ biex jinxtara lura dak li tilef Adam?

¹⁰ Madankollu, setgħet tiġi offruta xi ħaġa bi bdil mal-​ħajja li Adam u Eva tilfu? Il-​livell taʼ ġustizzja t’Alla jitlob għal bilanċ, “ħajja b’ħajja.” (Eżodu 21:23) Mela ħajja kellha tiġi offruta biex tħallas għall-​ħajja li kienet intilfet. Mhux sempliċement ħajja kwalunkwe kellha tkun suffiċjenti. Salm 49:8, 9 [49:7, 8, NW] jgħid dwar bnedmin imperfetti: “Ħadd ma jistaʼ jifdi lilu nnifsu, jew jagħti lil Alla l-​prezz tal-​fidwa [“rahan,” NW] tiegħu. Għoli wisq il-​prezz taʼ ħajtu, qatt ma jkun biżżejjed.” Hija s-​sitwazzjoni għalhekk bla tama? Dażgur li le.

11. (a) X’tissinjifika l-​kelma “rahan” bl-​Ebrajk? (b) Min biss setaʼ jifdi lill-​umanità, u għala?

¹¹ Fil-​lingwa Ebrajka, il-​kelma “rahan” tissinjifika s-​somma mħallsa biex jiġi mifdi rsir u wkoll tagħti stampa t’ekwivalenza. Raġel b’ħajja umana perfetta biss setaʼ joffri l-​ekwivalenti taʼ dak li tilef Adam. Wara Adam, l-​uniku raġel perfett imwieled fuq l-​art kien Ġesù Kristu. Għalhekk, il-​Bibbja ssejjaħ lil Ġesù “l-​aħħar Adam,” [KŻ] u tassigurana li Kristu “ta lilu nnifsu bħala prezz tal-​fidwa għal kulħadd.” (1 Korintin 15:45; 1 Timotju 2:5, 6) Fil-​waqt li Adam min-​naħa tiegħu għadda l-​mewt għal fuq it-​tfal tiegħu, il-​wirt li għaddielhom Ġesù huwa ħajja eterna. L-​Ewwel Korintin 15:22 jispjega: “Għax bħalma l-​bnedmin kollha jmutu f’Adam, hekk ilkoll jiksbu l-​ħajja fi Kristu.” B’mod xieraq, allura, Ġesù hu msejjaħ “Missier għal dejjem.”—Isaija 9:5, 6 [9:6, 7, NW].

KIF IR-​RAHAN ĠIE MĦALLAS

12. Ġesù meta sar il-​Messija, u liema korsa taʼ ħajja segwa minn dak inhar ’il quddiem?

¹² Fil-​Ħarifa tas-​sena 29 E.K., Ġesù mar għand il-​qarib tiegħu Ġwanni biex jiġi mgħammed u b’hekk jippreżenta lilu nnifsu biex iwettaq ir-​rieda t’Alla. F’dik l-​okkażjoni Jehovah dilek lil Ġesù bl-​ispirtu qaddis. Ġesù b’hekk sar il-​Messija, jew Kristu, il-​wieħed midluk minn Alla. (Mattew 3:16, 17) Imbagħad Ġesù ta bidu għall-​ministeru tiegħu taʼ tliet snin u nofs. Hu vvjaġġa m’art twelidu kollha, jippriedka dwar is-​Saltna t’Alla u jiġbor segwaċi leali. Madankollu, bħalma kien imbassar, l-​oppożizzjoni lejh malajr bdiet tikkarga.—Salm 118:22; Atti 4:8-11.

13. Liema ġrajjiet wasslu għall-​mewt taʼ Ġesù bħala wieħed li jżomm l-​integrità?

¹³ Ġesù bil-​kuraġġ kollu kixef l-​ipokrezija tal-​mexxejja reliġjużi, u huma fittxew li joqtluh. Eventwalment fasslu komplott mill-​agħar li kien jinvolvi tradiment, arrest mhux xieraq, ġuri illegali, u akkuża falza taʼ sedizzjoni. Ġesù ġie msawwat, beżqulu, ġie rredikolat, u ġie mogħti daqqiet bi frosta magħmula apposta biex iċċarratlu l-​laħam. Il-​gvernatur Ruman Ponzju Pilatu mbagħad issentenzjah għall-​mewt fuq zokk tat-​tortura. Ġie msammar m’arblu taʼ l-​injam u mdendel hemmhekk wieqaf. Kull nifs kien t’uġigħ insopportabbli, u dam sigħat sħaħ biex imut. Matul dik il-​prova kbira, Ġesù żamm integrità perfetta lejn Alla.

14. Alla għala ħalla lil Ibnu jsofri u jmut?

¹⁴ B’hekk, kien fl-​14 taʼ Nisan, tas-​sena 33 E.K., li Ġesù ta ħajtu bħala “fidwa għall-​kotra.” (Mark 10:45; 1 Timotju 2:5, 6) Mis-​sema, Jehovah setaʼ jara lill-​għażiż Ibnu jsofri u jmut. Alla għala ħalla ħaġa terribbli bħal din tiġri? Għamel hekk għaliex ħabb lill-​umanità. Ġesù qal: “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Ġwann 3:16) Il-​mewt taʼ Ġesù tgħallimna wkoll li Jehovah hu Alla taʼ ġustizzja perfetta. (Dewteronomju 32:4) Xi wħud jistgħu jitħassbu għala Alla ma warrabx il-​prinċipji tiegħu taʼ ġustizzja li jirrikjedu ruħ għal ruħ u injora l-​prezz tal-​korsa midinba t’Adam. Ir-​raġuni hija li Jehovah dejjem iżomm mal-​liġijiet tiegħu u jappoġġjahom, saħansitra jekk dan ikun jiswielu ħafna.

15. Ladarba kienet tkun ħaġa inġusta li l-​eżistenza taʼ Ġesù titħalla tintemm b’mod permanenti, x’għamel Jehovah?

¹⁵ Il-​ġustizzja taʼ Jehovah irrikjediet ukoll li l-​mewt taʼ Ġesù jkollha riżultat hieni. Wara kollox, kien se jkun hemm ġustizzja f’li jħalli lil-​leali Ġesù jibqaʼ rieqed għal dejjem fil-​mewt? Dażgur li le! L-​Iskrittura Ebrajka kienet ipprofetizzat li l-​wieħed leali t’Alla ma kellux jibqaʼ fil-​qabar. (Salm 16:10; Atti 13:35) Hu raqad fil-​mewt għal partijiet minn tlett ijiem, u mbagħad Alla Jehovah irxoxtah għall-​ħajja bħala ħlejqa spirtu setgħan.—1 Pietru 3:18.

16. Ġesù x’għamel malli rritorna lejn is-​sema?

¹⁶ Maʼ mewtu, Ġesù ċeda l-​ħajja umana tiegħu darba għal dejjem. Malli ġie rxoxtat għall-​ħajja fis-​sema, sar spirtu li jagħti l-​ħajja. Iktar minn hekk, meta Ġesù telaʼ lejn il-​post l-​iktar qaddis fl-​univers, ngħaqad mill-​ġdid maʼ l-​għażiż Missieru u formalment ippreżenta l-​valur tal-​ħajja umana u perfetta tiegħu Lilu. (Lhud 9:23-28) Il-​valur taʼ dik il-​ħajja prezzjuża setaʼ mbagħad jiġi applikat għan-​nom taʼ l-​umanità ubbidjenti. Dak x’ifisser għalik?

IR-​RAHAN TAʼ KRISTU U INT

17. Kif nistgħu nieħdu vantaġġ mill-​maħfra fuq il-​bażi tas-​sagrifiċċju bħala rahan taʼ Kristu?

¹⁷ Ikkunsidra tliet modi li bihom is-​sagrifiċċju bħala rahan taʼ Kristu jibbenefikak saħansitra issa. L-​ewwel, dan iġib il-​maħfra tad-​dnubiet. Permezz tal-​fidi fid-​demm imxerred taʼ Ġesù, għandna “l-​fidwa,” iva, “il-​maħfra tad-​dnubiet.” (Efesin 1:7) Mela saħansitra jekk ikkommettejna dnub serju, nistgħu nitolbu maħfra lil Alla f’isem Ġesù. Jekk aħna verament nidmin, Jehovah japplika għalina l-​valur tas-​sagrifiċċju bħala rahan taʼ Ibnu. Alla jaħfrilna, billi jagħtina l-​barka taʼ kuxjenza tajba, minflok ma jesiġi l-​piena tal-​mewt li nġibu fuqna nfusna meta nidinbu.—Atti 3:19; 1 Pietru 3:21.

18. Is-​sagrifiċċju taʼ Ġesù b’liema mod jipprovdilna tama?

¹⁸ It-​tieni, is-​sagrifiċċju bħala rahan taʼ Kristu jipprovdi l-​bażi tat-​tama tagħna għall-​futur. Ġo viżjoni, Ġwanni ra li “kotra kbira li ħadd ma jistaʼ jgħoddha” kellha tibqaʼ ħajja wara t-​tmiem katakliżmiku li ġej taʼ din is-​sistema t’affarijiet. Huma għala se jsalvaw meta Alla se jeqred tant nies oħrajn? Anġlu qal lil Ġwanni li l-​folla kbira kienu ‘ħaslu l-​ilbiesi tagħhom u bajduhom fid-​demm tal-​Ħaruf,’ Ġesù Kristu. (Apokalissi 7:9, 14) Sakemm neżerċitaw fidi fid-​demm imxerred taʼ Ġesù Kristu u ngħixu f’armonija mal-​ħtiġijiet divini, aħna se nkunu nodfa f’għajnejn Alla u se jkollna t-​tama taʼ ħajja taʼ dejjem.

19. Is-​sagrifiċċju taʼ Kristu kif jagħti prova li hu u Missieru jħobbuk?

¹⁹ It-​tielet, is-​sagrifiċċju bħala rahan huwa l-​prova fundamentali taʼ l-​imħabba taʼ Jehovah. Il-​mewt taʼ Kristu ġabret fiha l-​akbar żewġ atti taʼ mħabba fl-​istorja taʼ l-​univers: (1) L-​imħabba t’Alla f’li jibgħat lil Ibnu biex imut għan-​nom tagħna; (2) L-​imħabba taʼ Ġesù f’li minn jeddu offra lilu nnifsu bħala rahan. (Ġwann 15:13; Rumani 5:8) Jekk aħna verament neżerċitaw fidi, din l-​imħabba tapplika għal kull wieħed u waħda minna. L-​appostlu Pawlu qal: “L-​Iben taʼ Alla . . . ħabbni u ta ruħu għalija.”—Galatin 2:20; Lhud 2:9; 1 Ġwann 4:9, 10.

20. Għala għandna neżerċitaw fidi fis-​sagrifiċċju bħala rahan taʼ Ġesù?

²⁰ Għalhekk, ejjew nuru l-​gratitudni tagħna għall-​imħabba murija minn Alla u Kristu billi neżerċitaw fidi fis-​sagrifiċċju bħala rahan taʼ Ġesù. Li nagħmlu hekk iwassal għall-​ħajja taʼ dejjem. (Ġwann 3:36) Madankollu, is-​salvazzjoni tagħna m’hijiex l-​iktar raġuni importanti għall-​ħajja u l-​mewt taʼ Ġesù fuq l-​art. Le, it-​tħassib primarju tiegħu kien kwistjoni saħansitra akbar, waħda universali. Bħalma se naraw fil-​kapitlu li jmiss, dik il-​kwistjoni tolqot lilna lkoll għaliex turi għala Alla ħalla l-​ħażen u s-​sofferenza jippersistu daż-żmien kollu f’din id-​dinja.

ITTESTJA L-​GĦARFIEN TIEGĦEK

Ġesù għala kellu jmut biex isalva lill-​umanità?

Ir-​rahan kif tħallas?

Int b’liema modi tibbenefika mir-​rahan?

[Stampa taʼ paġna sħiħa f’paġna 67]