Il-5 Sigriet
Issodisfa l-Bżonn Spiritwali Tiegħek
IL-BIBBJA X’TGĦALLEM? “Henjin dawk li huma konxji tal-bżonn spiritwali tagħhom.”—Mattew 5:3.
X’INHI L-ISFIDA? Hemm eluf taʼ reliġjonijiet differenti, u ħafna minnhom jgħallmu modi differenti għalkollox kif tissodisfa l-bżonn spiritwali tiegħek. Kif tistaʼ ssir taf liema waħda tgħallem il-verità u liema tassew togħġob lil Alla? Xi awturi prominenti jsostnu li t-twemmin f’Alla u d-devozzjoni lejh mhumiex loġiċi, u li saħansitra huma taʼ ħsara. Ir-rivista Maclean’s tpoġġiha hekk l-opinjoni taʼ raġel ateu prominenti: “Dan il-konċett Kristjan, jiġifieri li hemm xi ħaġa aqwa mix-xjenza u aqwa mis-sensi tagħna, . . . inaqqas il-valur tal-unika ħajja li għandna u jagħmilna ferm suxxettibbli għall-vjolenza.”
X’TISTAʼ TAGĦMEL? Eżamina l-evidenza li Alla jeżisti. (Rumani 1:20; Ebrej 3:4) Tħalli lil ħadd jaqtagħlek qalbek milli tfittex it-tweġibiet għal mistoqsijiet importanti bħalma huma: Għalfejn qegħdin hawn? Hemm ħajja wara l-mewt? Għala hawn tant tbatija? Alla x’jirrikjedi minni? Sabiex tikseb kuntentizza dejjiema huwa fundamentali li ssib tweġibiet sodisfaċenti għal dawn il-mistoqsijiet.
Madankollu, taċċettax dak li jgħidlek ħaddieħor b’għajnejk magħluqin. Il-Kelma t’Alla tħeġġek tuża l-“qawwa tar-raġuni” tiegħek sabiex tagħti prova lilek innifsek dwar dak li hu aċċettabbli għalih. (Rumani 12:1, 2) Int se tiġi premjat għall-isforzi li tkun għamilt. Jekk twarrab il-ħin biex tistudja l-Bibbja u tapplika l-pariri prattiċi tagħha, int se tevita l-problemi, tnaqqas l-ansjetà, u tgawdi iktar il-ħajja. Din hi wegħda li tistaʼ toqgħod fuqha. Miljuni taʼ nies minn kull xorta taʼ sfondi tal-ħajja bbenefikaw billi tgħallmu l-verità dwar Alla u dwar l-iskopijiet tiegħu.
Meta tapplika l-pariri għaqlin tal-Bibbja, int se tibbenefika u d-devozzjoni tiegħek lejn Alla se tissaħħaħ. Għala ma taċċettax l-istedina biex tistudja l-Bibbja max-Xhieda taʼ Ġeħova? Jekk taċċetta, x’aktarx issib li int taqbel mal-kliem li kiteb l-appostlu Pawlu: “Hi mezz taʼ qligħ kbir din id-devozzjoni lejn Alla flimkien maʼ li wieħed ikun kuntent b’dak li għandu.”—1 Timotju 6:6.
[Stampa f’paġna 8]
Agħti prova lilek innifsek taʼ dak li hu aċċettabbli għal Alla