Ġesù—Is-​Sigriet Għal Ħajja Sinifikanti

KELLU Ġesù verament ħajja sinifikanti? Milli jidher, hu ma trabbiex fil-​lussu u matul ħajtu ma kellux ħafna affarijiet materjali. Fil-​fatt, ma kellu “mkien fejn imidd rasu.” (Luqa 9:57, 58) Barra minn hekk, kien malafamat, mibgħud, u fl-​aħħar ġie maqtul mill-​għedewwa tiegħu.

Għandek mnejn tirraġuna, ‘Jien ma nqisx ħajja bħal dik waħda sinifikanti!’ Imma hemm affarijiet oħra fil-​ħajja taʼ Ġesù li nagħmlu tajjeb li nikkunsidraw. Ejja neżaminaw erbaʼ aspetti mill-​ħajja tiegħu.

1. ĠESÙ KELLU SKOP F’ĦAJTU —LI JAGĦMEL IR-​RIEDA T’ALLA.

“L-​ikel tiegħi hu li nagħmel ir-​rieda taʼ dak li bagħatni.”—Ġwanni 4:34.

Bi kliemu u b’għemilu, Ġesù fittex li jwettaq ir-​rieda taʼ Missieru tas-​sema, Ġeħova.a Kienet l-​hena taʼ Ġesù li jagħmel ir-​rieda t’Alla. Hu qabbel dan mal-​ikel, bħalma jidher fl-​iskrittura li għadha kif ġiet ikkwotata. Ikkunsidra ċ-​ċirkustanzi li fihom għamel dan ix-​xebh.

Kien għall-​ħabta taʼ nofsinhar li Ġesù lissen dan il-​kliem. (Ġwanni 4:6) Kien ilu minn filgħodu għaddej mill-​għoljiet tas-​Samarija bil-​mixi, u bla dubju kellu l-​ġuħ. Fil-​fatt, id-​dixxipli tiegħu kienu ħeġġewh: “Rabbi, kul.” (Ġwanni 4:31) Bit-​tweġiba tiegħu, Ġesù wera li hu verament kien iħossu sostnut u msaħħaħ għax kien jagħmel ix-​xogħol li tah Alla. Ma taħsibx li raġel bħal dan kellu ħajja sinifikanti?

2. ĠESÙ KELLU MĦABBA INTENSA GĦAL MISSIERU.

“Jien inħobb lill-​Missier.”—Ġwanni 14:31.

Ġesù kellu relazzjoni mill-​qrib ħafna maʼ Missieru fis-​sema. L-​imħabba profonda taʼ Ġesù qanqlitu biex jagħmel magħruf lil Missieru—l-​isem, l-​iskopijiet, u l-​kwalitajiet Tiegħu. Bi kliemu, b’għemilu, u bl-​attitudni tiegħu, Ġesù rrifletta perfettament lil Missieru—sal-​punt li meta naqraw dwar Ġesù, hu bħallikieku qed naqraw dwar Missieru. B’hekk, meta Filippu staqsa lil Ġesù: “Urina l-​Missier,” Ġesù wieġbu: “Min ra lili ra wkoll lill-​Missier.”—Ġwanni 14:8, 9.

Ġesù tant ħabb lil Missieru li kien lest li jobdih sal-​mewt. (Filippin 2:7, 8; 1 Ġwanni 5:3) Imħabba intensa bħal din għal Alla għamlet il-​ħajja taʼ Ġesù waħda sinifikanti ferm.

3. ĠESÙ ĦABB LIN-​NIES.

“Ħadd m’għandu mħabba akbar minn din, li xi ħadd jagħti ruħu għal ħbiebu.” —Ġwanni 15:13.

Ngħiduha kif inhi, il-​prospetti għall-​ħajja futura tagħna bħala bnedmin imperfetti ma tantx jidhru sbieħ. Il-​Bibbja tispjega: “Permezz taʼ bniedem wieħed [Adam] id-​dnub daħal fid-​dinja, u permezz tad-​dnub il-​mewt, u b’hekk il-​mewt infirxet fuq il-​bnedmin kollha għax kollha dinbu.” (Rumani 5:12) Waħedna ma nistgħux naħarbu mill-​konsegwenzi tad-​dnub, jiġifieri l-​mewt.—Rumani 6:23.

Fortunatament, Ġeħova bi mħabba pprovda soluzzjoni għas-​sitwazzjoni tal-​umanità. Hu ppermetta lil Ibnu li kien perfett u bla dnub, li sar magħruf bħala Ġesù, biex isofri u jmut sabiex jipprovdi l-​fidwa meħtieġa biex jeħles lill-​umanità mill-​jasar tad-​dnub u l-​mewt. Imqanqal mill-​imħabba għal Missieru u għan-​nies, Ġesù minn rajh obda u ta l-​ħajja perfetta tiegħu għalina. (Rumani 5:6-​8) Imħabba bħal din għamlet il-​ħajja tiegħu waħda sinifikanti.b

4. ĠESÙ KIEN JAF LI KELLU L-​IMĦABBA U L-​APPROVAZZJONI TAʼ MISSIERU.

“Dan hu Ibni, il-​maħbub, li lilu jien approvajt.”—Mattew 3:17.

Ġeħova qal dan il-​kliem mis-​sema meta tgħammed Ġesù. B’hekk, Ġeħova esprima bil-​miftuħ l-​imħabba u l-​approvazzjoni tiegħu għal Ibnu, Ġesù. Mhux taʼ b’xejn li Ġesù setaʼ jgħid b’wiċċu minn quddiem: ‘Missieri jħobbni’! (Ġwanni 10:17) Peress li kien jaf li Missieru kien iħobbu u japprovah, Ġesù rabba l-​kuraġġ biex jissaporti l-​oppożizzjoni u l-​kritika. Din l-​imħabba u l-​approvazzjoni saħansitra għenu lil Ġesù jiffaċċja l-​mewt. (Ġwanni 10:18) Minħabba li Ġesù kien jaf li kellu l-​imħabba u l-​approvazzjoni taʼ Missieru stess, bla dubju ħajtu kienet saħansitra iktar sinifikanti.

Ċertament, Ġesù kellu ħajja sinifikanti. Bla dubju, nistgħu nitgħallmu ħafna minnu dwar kif nistgħu ngħixu ħajja verament sinifikanti. L-​artiklu li jmiss se jikkunsidra xi pariri li Ġesù ta lis-​segwaċi tiegħu dwar kif kellhom jgħixu.