Kaxxa għall-Mistoqsija
◼ Għandhom ix-Xhieda taʼ Ġeħova jqassmu taħditiet rekordjati jew miktubin?
Aħna niġu msaħħin u inkuraġġiti minn taħditiet Bibliċi. (Atti 15:32) Għalhekk, hu naturali li nkunu rridu naqsmu informazzjoni inkuraġġanti bħal din maʼ dawk li ma kinux preżenti. Bil-wasla taʼ diversi apparati li jirrekordjaw, taħdita tistaʼ tiġi rekordjata u mqassma lil oħrajn f’ħakka t’għajn. Xi wħud żammew kollezzjoni taʼ taħditiet rekordjati, inkluż taħditiet li ngħataw ħafna snin ilu, u b’intenzjoni tajba jsellfu dawn it-taħditiet lil ħbieb jew jagħmlulhom kopji tagħhom. Oħrajn għamlu Web sites u fuqhom tefgħu taħditiet biex iniżżilhom min irid.
M’għandniex xi ngħidu, m’hemm l-ebda oġġezzjoni jekk nirrekordjaw taħditiet għall-użu persunali jew għal membri tal-familja tagħna. Barra minn hekk, l-anzjani għandhom mnejn jirranġaw biex it-taħditiet jiġu rekordjati għal membri morda fil-kongregazzjoni li ma jistgħux jattendu l-laqgħat. Madankollu, hemm raġunijiet tajbin biex ma nqassmux taħditiet miktubin jew rekordjati.
Peress li t-taħditiet spiss jingħataw skont il-bżonnijiet lokali nistgħu faċilment nifhmu ħażin xi punti minn rekording li jkun ġie mqassam, ladarba ma nkunux nafu biċ-ċirkustanzi li fihom ngħatat it-taħdita. Barra minn hekk, ikun diffiċli għalina biex nivverifikaw minn ta t-taħdita u meta, sabiex nistgħu nkunu fiduċjużi li l-informazzjoni preżentata hi aġġornata u eżatta. (Lq. 1:1-4) Iżjed minn hekk, it-tqassim taʼ taħditiet miktubin jew rekordjati jistaʼ jħajjar lil xi wħud biex jagħtu jew jaċċettaw attenzjoni u unur mhux dovut lilhom.—1 Kor. 3:5-7.
L-ilsir leali u għaqli jaħdem iebes biex jipprovdi l-ikel spiritwali bil-qies u “fiż-żmien xieraq.” (Lq. 12:42) Dan jinkludi l-arranġament biex taħditiet jingħataw fil-kongregazzjonijiet lokali tax-Xhieda taʼ Ġeħova u rekordings bl-awdjo li jistgħu jitniżżlu mill-Web site uffiċjali jw.org. Nistgħu nkunu fiduċjużi li l-ilsir leali u għaqli u l-Ġemgħa li Tiggverna tiegħu se jipprovdu dak li għandna bżonn sabiex inkomplu nissodaw fil-fidi.—Atti 16:4, 5.