Qed Tħares ’il Quddiem Biex Tgħix għal Dejjem Fuq l-Art?
ILKOLL kemm aħna nħarsu ’l quddiem biex titwettaq il-wegħda taʼ Ġesù: “Ferħanin huma l-umli, għax se jirtu l-art.” (Mt. 5:5) Il-midlukin se jirtu l-art meta jsiru slaten u jmexxu mis-sema maʼ Ġesù. (Riv. 5:10; 20:6) Ħafna mill-Kristjani veri llum iħarsu ’l quddiem biex jgħixu għal dejjem fuq l-art. Huma se jkunu perfetti, ferħanin, u jgħixu fil-paċi. Biex dan ikun possibbli se jkollhom xogħol importanti x’jagħmlu. Pereżempju, se jgħinu biex jagħmlu l-art ġenna, jagħmlu ċert li dawk li jiġu rxoxtati jkollhom kulma għandhom bżonn, u jgħallmuhom. Aħseb dwar dak li tistaʼ tagħmel issa biex turi li tixtieq tagħmel dawn l-affarijiet fid-dinja l-ġdida.
LEST LI TGĦIN BIEX TAGĦMEL L-ART ĠENNA?
Meta Ġeħova kkmanda lil Adam u Eva biex ‘jimlew l-art u jieħdu ħsiebha,’ hu wera li maż-żmien id-dinja kollha kellha ssir ġenna. (Ġen. 1:28) Dawk li se jgħixu għal dejjem iridu jobdu l-istess kmand. Id-dinja mhux se tkun ġenna mill-bidu għax il-ġnien tal-Għeden m’għadux jeżisti. Eżatt wara Armageddon se jkollna ħafna xogħol x’nagħmlu. Se jkollna nnaddfu partijiet mid-dinja li ġew meqrudin. Dan żgur mhux se jkun faċli!
Dan ifakkarna fix-xogħol li l-Iżraelin kellhom jagħmlu meta marru lura fl-art tagħhom minn Babilonja. Għal 70 sena ħadd ma kien għex hemm. Imma Isaija bassar li bl-għajnuna taʼ Ġeħova kien se jirnexxilhom jerġgħu jagħmlu l-art sabiħa. Il-profezija qalet: “Jagħmel ix-xagħri tagħha bħall-Għeden u l-pjanura tad-deżert tagħha bħall-ġnien taʼ Ġeħova.” (Is. 51:3) Bl-għajnuna taʼ Ġeħova l-Iżraelin irnexxielhom. Bl-istess mod, dawk li se jgħixu fuq l-art se jirnexxilhom jagħmluha ġenna sabiħa. Hemm affarijiet li tistaʼ tagħmel minn issa biex turi li tixtieq tieħu sehem f’dan ix-xogħol.
Mod wieħed hu billi tagħmel l-aħjar li tistaʼ biex iżżomm id-dar tiegħek nadifa. Tistaʼ tagħmel dan anki jekk il-ġirien tiegħek mhumiex nodfa. Tistaʼ tgħin ukoll fit-tindif u l-manutenzjoni tas-Sala tas-Saltna u fejn isiru l-assembleat. Jekk jippermettulek iċ-ċirkustanzi, inti tistaʼ tapplika biex tgħin bħala volontier meta jinqalaʼ xi diżastru. Dan se juri li tixtieq tgħin lil ħutek meta jkun hemm il-bżonn. Staqsi lilek innifsek, ‘Nistaʼ nitgħallem xi ħaġa li biha nistaʼ ngħin jekk Ġeħova jippermettili li ngħix għal dejjem fuq l-art?’
LEST BIEX TGĦIN LIL DAWK LI JIRXOXTAW?
Wara li rxoxta lit-tifla taʼ Ġajru, Ġesù qalilhom biex jagħtuha xi ħaġa x’tiekol. (Mk. 5:42, 43) Forsi ma kienx xogħol diffiċli biex jieħdu ħsieb din it-tifla taʼ 12-il sena. Imma aħseb dwar kemm xogħol irridu nagħmlu meta Ġesù jwettaq il-wegħda tiegħu li “dawk kollha li qegħdin fl-oqbra tat-tifkira jisimgħu leħnu u joħorġu.” (Ġw. 5:28, 29) Għalkemm il-Bibbja ma ttiniex ħafna dettalji, nistgħu nimmaġinaw li dawk li jiġu rxoxtati se jkollhom bżonn x’jieklu, post fejn joqogħdu, u x’jilbsu. Tistaʼ turi minn issa li trid tgħin? Aħseb fuq il-mistoqsijiet li ġejjin.
X’tistaʼ tagħmel minn issa biex turi li lest li tgħix għal dejjem fuq l-art?
Meta l-indokratur li jżur il-kongregazzjonijiet jiġi fil-kongregazzjoni tiegħek, toffri biex tistiednu għall-ikel? Meta aħwa li kienu jaqdu f’Betel jiġu assenjati fil-kongregazzjoni tiegħek jew meta indokratur li jżur il-kongregazzjonijiet jieqaf mill-inkarigu tiegħu, tistaʼ tgħinhom isibu post fejn joqogħdu? Jekk se jkun hemm konvenzjoni reġjonali jew speċjali fejn tgħix int, tistaʼ toffri biex tgħin qabel jew wara l-konvenzjoni jew biex tilqaʼ d-delegati?
LEST BIEX TGĦALLEM LIL DAWK LI JIRXOXTAW?
Minn dak li naqraw f’Atti 24:15, aħna nistennew li biljuni taʼ nies se jiġu rxoxtati. Ħafna minnhom ma kellhomx l-opportunità li jsiru jafu lil Ġeħova qabel mietu. Imma se jkollhom dan iċ-ċans wara li jiġu rxoxtati.a Qaddejja leali u tal-esperjenza se jgħinu biex jgħallmuhom. (Is. 11:9) Charlotte, li ppritkat fl-Ewropa, fl-Amerika t’Isfel, u fl-Afrika, qed tħares ’il quddiem biex tagħmel dan. B’ferħ hi tgħid: “Jien inħares ’il quddiem biex ngħallem lin-nies wara li jirxoxtaw. Meta naqra dwar xi ħadd li għex fil-passat, kemm-il darba naħseb: ‘Kieku din il-persuna kienet taf lil Ġeħova, ħajjitha setgħet tkun vera differenti.’ Jien inħares ’il quddiem biex ngħid lil dawk li se jirxoxtaw dwar Ġeħova u kemm ħajjithom se tkun aħjar jekk jaqduh.”
Anki l-qaddejja leali taʼ Ġeħova li għexu qabel Ġesù kien fuq l-art se jkollhom ħafna x’jitgħallmu. Immaġina kemm se nieħdu pjaċir u xi privileġġ se jkun li nispjegaw lil Danjel kif twettqu l-profeziji li kiteb u li hu stess ma fehemx. (Dan. 12:8) Immaġinak tgħid lil Rut u Nagħomi li l-Messija ġie mill-familja tagħhom. Kemm se nieħdu pjaċir ngħallmu lin-nies mad-dinja kollha mingħajr it-tfixkil li nsibu fid-dinja llum!
X’tistaʼ tagħmel minn issa biex tkun lest li tgħallem lil dawk li se jiġu rxoxtati? Ħaġa waħda li tistaʼ tagħmel hi li tipprova ssir għalliem aħjar u tipprietka b’mod regolari. (Mt. 24:14) Anki jekk ma tistax tipprietka daqskemm tixtieq minħabba l-età jew xi ħaġ’oħra, int tistaʼ turi li qed tħares ’il quddiem biex tipprietka lil dawk li se jiġu rxoxtati. Dan tistaʼ tagħmlu billi tagħmel l-aħjar li tistaʼ minn issa.
Hu importanti li naħsbu dwar dawn il-mistoqsijiet: Qed tħares ’il quddiem biex tgħix għal dejjem fuq l-art? Qed tħares ’il quddiem biex tgħin fix-xogħol ħalli l-art terġaʼ ssir ġenna u tgħin u tgħallem lil dawk li se jiġu rxoxtati? Int tistaʼ turi li lest biex tgħix għal dejjem fuq l-art billi tagħmel affarijiet simili għal dawk li se tagħmel fid-dinja l-ġdida!
a Ara l-artiklu “Iwasslu lill-Ħafna Lejn is-Sewwa” f’It-Torri tal-Għassa taʼ Settembru 2022.