Ukulingana ne Luka

10 Pa nsizi ye vyo-o, Yesu wasozile awasambi na wanji 70 nu kuwatuma wawili wawili ukuti wamukolelele mu misumba yonsinye na mu vifulo vino walinji nu kuyamo. 2 Nga awanena ati: “Umulimo wakusombola wukuzile, nomba awawomvi wacefile. Acino lengani umweneco wa mulimo wakusombola ukuti atume awawomvi na wanji. 3 Pitanji! Lelo mwacenjela amuno nkumituma ngati ang’onzi mwa mumbwe. 4 Mutasenda icola ca ndalama, icavyakulya nanti andyatu, swinya mutazipizile ukulamuka uwili wensinye mu nzila. 5 Mu ng’anda iyili yonsinye yino mwinjilamo, mwatalicila amulamuka amuti: ‘Umutende wuwe namwe.’ 6 Nga cakuti mwe yoyo ing’anda muli umuntu wa mutende, umutende winu wuliwa pe weliwe. Lelo nga musi, umutende winu wulinyocela kwe mwemwe. 7 Mwakwikala mwe yoyo ing’anda, mwalya nu kumwa vino wamipekanizizya, amuno umuwomvi wazipila ukumulipila. Mwakwikala momonye mutaya mukuvwamba ama ng’anda yanji ayakwikalamo.

8 “Nga cakuti mwinjila mu musumba swinya wamipocelela, mwalya vino wamipekanizizya 9 mwapozya awalwale swinya mwawanena ukuti: ‘Uwufumu wa kwe Leza wuli mupipi namwemwe.’ 10 Lelo nga cakuti mu musumba wuno mwayamo wakana ukumipocelela, mwaya mu misewo nu kulanda ukuti: 11 ‘Twamikuntila ni tukumbunye lino telilemile ku matamba yitu mu musumba winu. Lelo mumanye ukuti Uwufumu wa kwe Leza wupalamizile.’ 12 Acino nkuminena nkuti cilipepukapo pe wowo uwanda ku musumba we Sodomu ukulusya wo-o umusumba.

13 “Acawulanda kwe mwemwe mwe wina Korazini ne Betisaida! Amuno ivizungusyo vyonsinye vino vyacisilwe mwa kwe mwemwe vyanga vicitwe mwe Turi ne Sidoni, awantu nge walapizile wekali, swinya nga wazwite insamu* nu kuyisansa amatoyi. 14 Amuno cilipepukapo kwe Turi ne Sidoni pa wanda wa wupinguzi ukulusya pe mwemwe. 15 Ne nawe Kapernahumu watalikucindamika ukuti uyize uye kwi yulu, lelo uliya ku nkungwe.*

16 “Wensinye wino wivwa kwe mwemwe lyo wivwa na kwe nene. Na wensinye wino wamikana lyo wakana na nenenye. Lelo, wensinye wino wankana lyo wakana na wino wantumilenye.”

17 Apano awasambi 70 wanyosile wakusecelela, wakuti: “Tatakulu, ni mizimu imiwipenye teyikututontela nga twawomvyavye izina lyako.” 18 Nga awanena ati: “Mbweni e Satana akupona mwi yulu ngati akumesya kwa mvula. 19 Lolani! Namipa amaka yakulyata pa nzoka na pa makalayili, na maka yakucimvya umulwani, swinya pasi cino cilimicisa. 20 Nomba mutasecelela pa mulandu wakuti imizimu teyikumitontela, lelo secelelani amuno amazina yinu yalemvilwe mwi yulu.” 21 Pe yilyanyene impindi, umuzimu wa kwe Leza walenzile ukuti e Yesu asecelele nkaninye, swinya walanzile ati: “Nkukulumbanya pa wantu awavule, Tata, Tatakulu uwa mwi yulu na munsi, amuno wafisa vyo-o ivintu ku wantu wa mano na ku wasambilile nu kuvisokolola ku tunya. Nkukulumbanya Tata, amuno wonye avino wazumilizya. 22 E Tata wampa amaka pa vintu vyonsinye, kusi wino wamanya Umwana suka Yisi. Swinya kusi wino wamanya Yisi suka Umwana nu wili wensinye wino Umwana wasolapo ukumusokololela.”

23 E Yesu wanyocezile ku wasambi nu kuwanena ukuti: “Ayansansa aminso yano yakalola vino mukalola. 24 Amuno nkuminena nkuti, wakasesema awavule wano walinjiko, na wa zyamfumu, walondesyanga ukulola vino mukulola lelo wataviweni, swinya walondesyanga ukwivwa vino mukwivwa, lelo watavivwile.”

25 Paponye umonsi wumwi wino wamanyile amasundo wakatusile ukuti amwelezye, wamunenile ukuti: “Musambilizya! Avyani vino nzipizile ukucita pakuti njize mbe nu wumi wamuyaya? 26 Nawe Yesu wamunenile ukuti: “Avyani vino wivwa pano ukawazya mu masundo?” 27 Nawe watili: “‘Uwakunda e Yehova* e Leza wako nu mwezo wako wonsinye, nu wumi wako wonsinye, na maka yako yonsinye na melenganyo yako’ yonsinye swinya uwakunda ‘umuwuyo ndi vino wayikunda.’” 28 E Yesu wamunenile ukuti: “Wasuka icete sana; uwacita wowonye apano uliwa nu wumi wa muyayaya.”

29 Nomba pa mulandu wakuti we-e umonsi walondanga ukuyilungamika, wakolowozizye e Yesu ukuti: “Nge fwe wunji weweni?” 30 E Yesu pa kumwasuka watili: “Umonsi wumwi wafumanga ku Yerusalemu akuya ku Jeriko, nga ivipondo avimulema, avimuzula ivizwalo, avimuma, asyala afensile,* avimusya nu kumusya. 31 Lelo e simapepo wapitanga mwe wulyanye umusewo akufuma ku Yerusalemu, walile walola we-e umuntu alambalile, amupambata, apita mu mbali. 32 Pakonsile umwina Levi, lelo nawenye walile wamulola wapisile kumbali. 33 Nomba kwalinji umwina Samariya wumwi wino wapitanga mwe wulyanye umusewo, walile wamulola, wamwivwizile uluse. 34 Acino wapalamizile pano walinji, aya amunyepa ivilonda, ayitilapo amafuta ne wayini. Apano amusenda amukwezya pa ndokwe, nga mutwala mu ng’anda muno mukaficilila aweni, atalika ukumusakamala. 35 Uwanda wuno wakonsilepo wasenzile indalama ama denali* yawili, apa umweni wa ng’anda, nga amunena ukuti: ‘Uwamusakamala swinya vyonsinye vino uliwomvya pe weliwe ndiyiza kunyosezye nga nanyoka.’ 36 Uzye weweni pe wa-a watatu wino ukulola ukuti walinji amuwuye wa kwe wino ivipondo vyumile?” 37 Nawe watili: “Aweyo wino wamwivwizile uluse.” Nga Yesu amunena ati: “Pitanga nawewenye uwacita wowonye.”

38 Apano e Yesu na wasambi wakwe wayile awinjila mu kaya kamwi. Ko-o wazanile umwanaci uwizina lyakuti Marita wino wawapocelezile mu ng’anda yakwe. 39 Walinji nu muzuna wakwe uwizina lyakuti Mariya, wino wisile akuteyelezya vino Yesu wasambilizyanga. 40 Pe yoyo impindi e Marita walinji ni vyakucita ivivule swinya impindi yamucepezile. Acino wayile kwe Yesu nu kumunena ukuti: “Tatakulu! Nkulenga unene e Mariya ukuti anjavweko imilimo yimwi, ansizile nenganye.” 41 Ne Tatakulu wamunenile ukuti: “Marita, Marita, usakamile nkani, ku vintu ivivule. 42 Vino vikulondekwa aviticivye, nanti conganye. E Mariya asozile icintu icicindame nkaninye, swinya pasi wino alimupoka.”