Ukulingana ne Luka
17 Acino wanenile awasambi wakwe ukuti: “Kweni ivintu vino vikalenga wanji ukuwembuka viliyiza. Lelo acawulanda ku muntu wino walenga wanji ukuwembuka! 2 Cingazipavye wamunyepelele iciliwe icikulu mu nsingo nu kuya musumbila mwe sumbi. 3 Muwacenjela. Nga cakuti umunyonko wacita uluwembu, mukalipile, lelo nga walapila mutetele. 4 Nanti acakuti wawembuka imiku 7 mu wanda wonga nga wakunena ati, ‘Ntetela,’ uzipizile ukumutetela.”
5 Acino awasambi wanenile Tatakulu Yesu ati: “Twavwe pakuti tuwe ni suwilo iliwome.” 6 Naswinyanye e Tatakulu watili: “Mwange muwe ni suwilo ngati ambeyu ya muti uwukulu, munganena icimuti co-o muti, ‘Nyunkuka uye ukayisimpe mwe sumbi!’ Naco cingivwa nu kucita wowonye.
7 “Weweni pe mwemwe wino wawa nu muwomvi wakulima mu calo nanti umuwomvi wakucema ing’onzi, wino nga winuka mu calo angamunena ati, ‘Nzanga tulye ivyakulya pi tebulo?’ 8 Kusi nanti wumwinye. Angamunena ati, ‘Mpekanizizya ivyakulya swinya uzwale ni cizwalo cakupekanizizyamo ivyakulya apano uyize mukupekanya, nga namala ukulya nu kumwa apano nawenye wandi uyize ulye nu kumwa.’ 9 Uzye angasalifya umuwomvi pe vino wawomba umulimo wuno wamulembela? Awe. 10 Acili conga na kwe mwemwenye, nga cakuti mwawomba umulimo wuno Leza wamipa ukuwomba, mwalanda amuti: ‘Swe wawomvi vye. Amuno vino twawomba avino tuzipizilevye ukuwomba.’”
11 Pano wayanga ku Yerusalemu, wapisile pakasi ka musumba wa Samariya ne Galili. 12 Swinya pano winjizilevye mu kaya, wazanile awonsi 10 wano walinji na mambombo, lelo wimilile akatalamucila. 13 Acino wamupundilizile awati: “Yesu, musambilizya, twivwile uluse!” 14 Walile e Yesu wawalola, wawanenile ati: “Yanji kayilanjizyani kwa simapepo.” Nomba pano walinji munzila wakuya, wapozile. 15 Apano wenga pe wa-a walile walola ukuti wapola, wanyosile kwe Yesu lyo akulumbanya ne Leza. 16 Wayile afukama ku matamba ya kwe Yesu awamusalifya. Swinya walinji amwina Samariya. 17 Ne Yesu wamunenile ati: “Uzye wonsinye 10 watapozile? Nga wawuyo 9 weni walikwinye? 18 Amulandu ci wuno watanyocezile mu kusalifya Leza, sukavye we-e umonsi wino wafuma ku nsi yinji?” 19 Nga amunena ati: “Katuka pitanga; amuno isuwilo lyako likupozizye.”
20 Pano Awafalisi wamukolowozizye pa mpindi yino Uwufumu wa kwe Leza wuliyiza, wawanenile ukuti: “Uwufumu wa kwe Leza wutaliyiza mu nzila yakuti mwensinye muwulole; 21 swinya na wantu watalilanda ukuti, ‘lolani Uwufumu wa kwe Leza wuli ko-o,’ nanti ‘wuli koko!’ Amuno Uwufumu wa kwe Leza muli nawo.”
22 Apano Yesu wanenile awasambi wa kwe ukuti: “Impindi yikwiza pano muliwalonda ukulola uwanda uwa Mwana wa muntu, lelo mutaliwulola. 23 Swinya awantu waliwaminena ati, ‘lolani ali koko’ nanti ‘ali pa-a!’ Lelo mutize muye nanti akuwakonka. 24 Amuno wulyanyene vino imvula yikamesya ukufuma ku luwali lumwi ulwi yulu ukufika ku luwali lunji ulwi yulu, avyo ciliwa na pano Umwana wa muntu aliyiza. 25 Alitalicilapo ukucula swinya na wantu wa pe yo-o impindi walimukana. 26 Ndi wulyanyene vino calinji mu mpindi ya kwe Noa, avino ciliwa na mu manda ya Mwana wa muntu. 27 Awantu walyanga, wamwanga, awonsi watwalanga, na wanaci watwalwanga ukuficila na pa mpindi yino Noa winjizile mu wato, mpaka ni mvula iyikulu ayiza nu kuwonona wonsinye. 28 Wonye wo-o avino calinji na mu manda ya kwe Loti: awantu walyanga, wamwanga, wakalanga, wakazyanga, walimanga ivyakulya swinya wazenganga. 29 Lelo uwanda wuno Loti wafumile mu Sodomu, umulilo watonyile na mawe ukufuma mwi yulu swinya wononile vyonsinye. 30 Wonye avino ciliwa na pano Umwana wa muntu aliyilanjizya ku wantu.
31 “Pe yoyo impindi umuntu wino aliwa pa musonje papela atize ayike ukuya mukusenda ivintu mu ng’anda, nu muntu wino aliwa mu calo atize anyocele mukusenda ivintu vino tewasya. 32 Yizukani vino vyaciticizile e muka Loti. 33 Wensinye wino akalonda ukupususya uwumi wa kwe aliwulovya, lelo wino walovya uwumi wa kwe aliwa nu wumi naswinya. 34 Nkuminena nkuti, uwandanye wowo uwusiku, awantu wawili walilanga walazile; lelo e Leza alisendapo wenga nu kusya winji. 35 Kuliwa awanaci wawili wano waliwasya piwe, e Leza alisendapo wenga nu kusya winji.” 36* —— 37 Nawo wamwasusile ati: “Tatakulu kwinye?” Ne wawanenile ati: “Kuno kuli icitumbi akuno kukawa amawimba.”