Ukulingana ne Marko
4 Naswinyanye e Yesu watalisile ukusambilizya mu mbali ye sumbi, na wantu awavule wayile awawungana mupipi nawe. Acino winjizile muwato amuno ayikala, nu wato wasezilevye katici ukufuma mu mbali ye sumbi. Lelo iwumba lya wantu wonsinye wasyazile ku cituntu. 2 Watalisile ukuwasambilizya ukuwomvya ivilanjililo swinya pano wawasambilizyanga wawanenile ukuti: 3 “Yivwani, kwalinji umuntu wino wayile mukutanda imbeyu. 4 Pano akutanda, zimwi zyaponezile pa musewo, ni vinyunyi vizile nu kusompa zyozyo imbeyu. 5 Zimwi na zyo zyaponezile mu mawe, lelo pa mulandu wakuti patalinji nkani umusili zyamezile zuwanye. 6 Nomba pano umusanya wawazile, zyakazile amuno zitalinji nu kwakutwala imisisi. 7 Zinji zyaponezile pa myunga, ni myunga yakuzile nu kuzitawilila. 8 Ne zinji zyaponezile pa musili uwuzima,* swinya zyakuzile icete nu kutalika ukufumya imbeyu na zinji izizima. Zimwi zyafumizye 30, zinji 60 ne zinji 100.” 9 Swinya wawanenile ukuti “wino akulonda ukwivwa, ayivwe.”
10 Wano wasyazile ne Yesu ponga na wasambi wakwe 12, wasyazile wakumukolowozya vino ivilanjililo vyapiliwulanga. 11 Nawe awanena ati: “Mwemwe, e Leza wamyavwa ukumanya inkama ya mu Wufumu wakwe, lelo awantu wanji lyonsinye nkawasambilizya ukuwomvya ivilanjililo, 12 pakuti nanti walolanye vyo nkucita watamanya nanti cimwi, nanti wivwanye vyo nkulanda watakwiluka. Swinya watalipiluka pakuti wawatetele.” 13 Wakonkinyepo nu kuwanena ati: “Nga musakwivwicisya muno co-o icilanjililo cikusula, lyo muliyivwicisya wuli ivilanjililo vinji?
14 “E katanda aweyo wino akawizya* ilyasi lizima pe Leza. 15 Imbeyu, zino zyaponezile mu musewo, awantu wano wivwa ilyasi lizima, nga Satana ayiza nu kusenda izwi lino lyatanzilwe mwe woliwo. 16 Ne zino zyaponezile pa mawe, awantu wano wivwa ilyasi lizima swinya paponye awalipocelela ni nsansa. 17 Lelo pa mulandu wakuti watalinji ni misisi, wasuwizilevye pa mpindi ntici; nomba pano wawa ni ntazi swinya watalika nu kuwacuzya pa mulandu ni zwi lya kwe Leza, awaleka ukusuwila mwi zwi. 18 Kuli na zinji zino zyaponezile pa myunga. Zyo-o awantu wano wivwa ilyasi lizima, 19 lelo pa mulandu wa masakamika ya munsi,* ukuzembelekwa ni vyuma nu kuvwambisya ukuwa ni vintu ivivule ivya mwe yo-o insi, avititicizya izwi, alituza icakuti awapotwa nu kukoma ivikomwa. 20 Na mukulecelezya, zino zyatanzilwe pa musili uwuzima awantu wano wakakwivwa izwi nu kulipocelela, awakoma ni vikomwa 30, 60 ne 100.”
21 Wawanenile nu kuti: “Kusi wino akakwasya ulukozyo* nu kulukupicila nanti ukuluwika mwisika mwi tebulo lelo akaluwika pi tebulo papela. 22 Amuno consinyene cino cavwama cilisokoloka; na consinye cino cafiswa cilimanyikwa. 23 Wensinye wino akulonda ukwivwa ayivwe.”
24 Wawanenile nu kuti: “Mwawikako amano kwe vino mukwivwa. Amuno cino mukupimilako wanji acino namwenye walimipimila, swinya walimilundilapo. 25 Wensinye wino wakwata walimupa na vinji, na wensinye wino atakwata walimupoka na kano wawa nakonye.”
26 Wakonkinyepo ukulanda ati: “Uwufumu wa kwe Leza tungawukolanya ku monsi wino watanda imbeyu mu calo. 27 Akaya mukulala uwusiku akatuka umutondotondo, lelo vino imbeyu zikamela nu kukula asimanya. 28 Zikaya zikukula katici katici, zikatalicila ukufumya amaluwa, nga azipanga utumitwe, na mukulecelezya zikaca. 29 Nga zyacavye, umweneco akaya mukusinza, amuno lyo impindi yakusombola yafika.”
30 Swinya wawanenile nu kuti: “Uzye Uwufumu wa kwe Leza tungawukolanya ku cani? Acilanjililo ci cino tungawomvya pakuwulondolola? 31 Wawa ngati akalupumba akatici ake muzimwa, kano nga wakomela kakawa akacepesye pa mbeyu zyonsinye munsi. 32 Lelo pano kamela, kakakula ukucila ivimiti vyonsinye ivya musalu, ni vinyunyi vyamupela vikapangako ivinsalanzo,* nu kucinjililwa ku musanya.”
33 Wawomvyanga ivilanjililo ivivule ndi vino vyo-o, pakuwasambilizya izwi lya kwe Leza ukulingana na vino wangivwa. 34 Atawasambilizyanga ukwasowa ivilanjililo, lelo wayanga mukulondolela awasambi wakwe kumbali vyonsinye.
35 Pe wulyane uwanda pano cafisile amanguzi wawanenile ukuti: “Tuyani tulambile ku mbalama yinji iya luzi.” 36 Pano awasambi walesile awantu wapita, wamusenzile mu wato wuno walinjimo, swinya kwalinji amawato na yanji yano yalinji ponga na wo-o uwato. 37 Nomba kwizile icimuza icikulu pa luzi, swinya aminzi yatalisile ukuma nkaninye na maka ku wato. 38 Lelo e Yesu walazile ku nsizi ya wato, lyo aseyamizile na pe pilo. Acino wamuziwusizye nu kumunena ukuti: “Musambilizya uzye utaweni ukuti twandi tufwe?” 39 Acino wakatusile akalipila icimuza nu kunena sumbi ati: “Myalala!” Paponye umuza walesile, akumyalala nu kumyalala. 40 Acino wawanenile ukuti: “Nga cani cino mukutinila? Uzye mutani muwe ni suwilo?” 41 Lelo wazungusile nkaninye, awatalika ukunenana ati: “Nga wenye we-e amuntu wamusango ci? Uwakuti umuza ne sumbi vyamutontela.”