Ukulingana ne Luka
8 Patazimvile e Yesu watalisile ukupita mu misumba na mutwaya akuwizya ilyasi ilizima pa Wufumu wa kwe Leza. Walinji ponga na wasambi wakwe 12 2 na wanaci wano wafumizye imizimu miwipe, nga na wanji wano wapozizye indwala zinji: E Mariya umwina Magadala wino wafumizye imizimu imiwipe 7; 3 E Joana e muka Kusa, e songo wa wawomvi wa kwe Herodi; e Susana apano na wanaci wanji awavule wano wakonkanga Yesu wakumwavwilizyako imilimo yimwi ukuwomvya vino wakweti.
4 Nomba pano awantu ukufuma mu misumba imipusanepusane wayile kwe Yesu awawungana ponga, Yesu watalisile ukulanda nawo ukuwomvya icilanjililo, watili: 5 “Umuntu wumwi wayile mukutanda imbeyu. Nomba pano watandanga zimwi zyaponezile mu musewo na wantu wazilyasile, ni vinyunyi vya mupela vizile nu kusompa. 6 Ne zinji zyaponezile piwe, lelo pano zyamezile, zyakazile pa mulandu wakuti patalinji nkani umusili. 7 Zinji nazyo zyaponezile pa myunga ni myunga yino yakuzile ponga nazyo yazitawilizile. 8 Lelo zinji zyaponezile pa musili wamuvundo, zyakuzile nu kukoma ivikomwa 100 ukulusya pa mbeyu zino watanzile.” Walile wamala ukulanda vyo-o, wapunzile nizwi ikulu ati: “Wino ali na makutwi ayivwe.”
9 Apano awasambi wakwe wamukolowozizye muno mwasuzile icilanjililo. 10 Nga awanena ukuti: “Mwemwe e Leza, wamyavwa ukumanya inkama ya mu Wufumu wakwe lelo awantu wanji lyonsinye nkawasambilizya ukuwomvya ivilanjililo pakuti nanti wakulola nye vyo nkucita watamanya nanti cimwi swinya nanti wivwanye vyo nkulanda watakwiluka. 11 Co-o icilanjililo cikusula mo-o: Imbeyu, alizwi lya kwe Leza. 12 Zino zyaponezile mu musewo, awantu wano wivwa apano umulwani ayiza nu kusompola izwi lino lyatanzilwe mu myezo yawo pakuti watasuwila nu kupusuka. 13 Ne zino zyaponezile pa mawe, awantu wano wivwa ilyasi ilizima nu kulipocelela ni nsansa. Nomba pa mulandu wakuti watalinji ni misisi wasuwizile pa kampindivye katici. Walile welezwa, walesile ukusuwila. 14 Ne zino zyaponezile pa myunga, awantu wano wivwa ilyasi ilizima ilya kwe Leza. Nomba pa mulandu wakusendwa na masakamika ya munsi, ukuzembelekwa ni vyuma, nga nu kuvwambisya ukuwa ni vintu ivivule ivya mwe yo-o insi, awapotwa ukukoma ivikomwa pa mulandu wakuti vyatuzya izwi. 15 Ne zino zyaponezile pa musili uwuzima, awantu wamyezo imizima awakuti nga wivwa izwi, awalipocelela nu kutalika ukukoma ivikomwa pano wakusipicizya intazi.
16 Kusi wino akakwasya ulukozyo nu kulukupicila nanti ukuluwika mwi tebulo mwisika, lelo akaluwika pi tebulo papela pakuti awantu wonsinye walola uluswepo. 17 Amuno kusi icili consinye cino cavwama cino citalimanyikwa na consinye cino wafisa cino citalisokoloka. 18 Acino mwawika amano kwe vino nkulanda, amuno wensinye wino wakwata walimupa na vinji, na wensinye wino atakwata walimupoka na kano wawa nakonye.”
19 Nomba e mama wakwe na wanyina wayile kuno walinji, lelo waposilwe ukufika pe weliwe pa mulandu wakuti awantu wavulisizye. 20 Acino wumwi wayile amunena ati: “E mama wako na wanyonko wali palonde wakulonda ukukulola.” 21 Nawe wawasusile ukuti: “E mama wane, wasongo wane, na wazuna wane, awawo wano wakakwivwa izwi lya kwe Leza nu kucita vino wakwivwa.”
22 Acino wanenile awasambi wakwe ukuti: “Tuyani tulambile mbalama yinji.” Awatalika uwulendo. 23 Nomba pano wapitanga nu wato, e Yesu walazile utulo. Nga pe sumbi apakatuka icimuza icikulu icakuti aminzi yatalisile ukwinjila mu wato, kwasyazilevye katici ukuti uwato wusiwile. 24 Acino awasambi wayile kwe Yesu nu kumuziwula awamunena awati: “Musambilizya! Musambilizya twandi tufwe!” Ne Yesu wakatusile, akalipila icimuza na minzi yano yakatukanga pe sumbi navyo vyalesile paponye apamyalala nu kumyalala. 25 Nga pano Yesu awanena ukuti: “Uzye mutawa ni suwilo?” Lelo pa mulandu wakuti intete zyawalemile, watalisile ukulanzyanya wakuti: “Nga wenye we-e amuntu wamusango ci uwakuti umuza na minzi vyamutontela.”
26 Apano walambizile mbala yinji iye sumbi ku citungu ca Gerasa, cino calozyanya ne sumbi we Galili. 27 Pano Yesu wafumanga mwe wo-o umusumba wasunkinye umonsi wumwi wino walinji nu muzimu uwuwipe. We-e umonsi wikalanga vye tupu, swinya casenzile impindi inkulu ukwasowa ukuzwalapo ivizwalo. Atikalanga na mung’anda lelo wikalanga mu manda. 28 Acino pano waweni e Yesu, wapunzile, amufukamila nga alanda ati: “Ngu kulonda cani kwe nene we Yesu Mwana wa kwe Leza wa Mwi Yulu? Nkukulambilizya nkuti utancuzya.” 29 (We-e umonsi walanzile wo-o, amuno Yesu wanenile umuzimu wuwipe ukuti wufume mwe weliwe. Umuzimu wuwipe wamuponyanga pansi pa miku imivule icakuti wamunyepangavye na maceni swinya kwawanga na wakumulonda, lelo waputulanga, nu muzimu wuwipe wamutwalanga kuno kusi awantu.) 30 Nga Yesu amukolowozya ati: “We weni izina?” Nawe wasusile ukuti: “Izina lyane ne liwumba,” Amuno imizimu imiwipe imivule yinjizile mwe weliwe. 31 Yatalisile ukulambilizya Yesu ukuti atakayiwinjile mu cizinji icitali. 32 Acino imizimu imiwipe yalambilizizye Yesu ukuti ayizumilizye yikinjile mwa kapoli, nawe wayizumilizizye. 33 Acino yafumile mwe we-e umonsi nu kuya mwa kapoli, nawo wasamalizile ku mutentemuko nu kuponela mwe sumbi, awamwela. 34 Lelo pano wakacema waweni vino vyacitisile, wasamazile nu kuya mukaya swinya wayile awanena awantu vyonsinye vino vyacitisile.
35 Apano awantu wizile mukulola vino vyacitisile. Acino wizile kwe Yesu awazana nu monsi wino walinji ni mizimu imiwipe azwite, ayisile ne Yesu icakuti awantu wivwile intete nkaninye. 36 Wano waweniko wawasimicizile vino calinji pa kuti umonsi wa mizimu imiwipe apole. 37 Awantu awavule awa mu citungu ca Gerasa wanenile Yesu ukuti afume mu citungu cawo amuno walinji sana ni ntete. Acino Yesu wakwezile uwato apita. 38 Nomba umonsi wino Yesu wafumizye imizimu imiwipe watwalilizile ukumulambilizya ukuti awamukonka lelo e Yesu wakanile amunena ati: 39 “Nyocela ku ng’anda uye ukanene awantu vyonsinye vino Leza wakucitila.” Nawe wapisile swinya wayile akuwizya mu musumba wonsinye pe vino Yesu wamucitizile.
40 Pano Yesu wanyocezile ku Galili awantu wamupocelezile icete amuno wamulindililanga. 41 Paponye umonsi uwizina lyakuti Jailo e songo wi sinagogi wizile, ayafukama pa matamba ya kwe Yesu atalika ukumulambilizya ukuti wapite ku ng’anda, 42 amuno umwana wakwe wenganye wino walinji ni myaka 12 walwile nkaninye icakuti walinji na mukufwa.
Pano Yesu wapitanga awantu awavule wamutiticizyanga. 43 Nomba kwalinji umwanaci wino walwile indwala yakufuma uwazi pa myaka 12 swinya patalinji nanti wenganye wino wamupozizye. 44 Acino walemile Yesu ku nsongo zya ku cizwalo cakwe icakunzi swinya wapozile na paponye ku ndwala yakwe. 45 Nga Yesu ati: “Weni wandema?” Wonsinye wakanile, Nga Petro amunena ukuti: “Musambilizya awantu wonsinyene wano wali pa-a wakukusunka nu kukutiticizya, ngu ngalanda wuli ukuti weni wandema!” 46 Nga Yesu amwasuka ati: “Pali wino tewandema amuno njivwile amaka yasila.” 47 Pano we-e umwanaci wilusile ukuti e Yesu wamanya vino wacisile wivwile intete, swinya wayile amufukamila alanda na pa wantu wonsinye umulandu wuno tewalemela Yesu na vino tewapola paponye. 48 Lelo e Yesu wamunenile ati: “Mwanane, isuwilo lyako lyakupozya. Upite umutende.”
49 Pano acili akulanda, umonsi wino wafumile ku ng’anda ya kwe Jailo wizile nu kumunena ukuti: “Umwana wako afwile kali, lekavye utacuzya Umusambilizya.” 50 Pano Yesu wivwile wo-o wanenile e Jailo ukuti: “Utatina, wavye ni suwilo, umwana wako wandi awe icetenye.” 51 Pano wafisile ku ng’anda atalondanga uwili wensinye ukumukonka acino wasenzile vye Petro, e Yohani, e Jemusi, e yisi wa mwana, ne mama wakwe. 52 Nomba wonsinye wano walinjipo walilanga nkaninye nu kulosya we-e umwana. E Yesu wawanenile ati: “Lekani ukulila amuno umwana atafwile alazilevye.” 53 Acino watalisile ukumuseka nu kumutumfya, amuno weni wamanyile ukuti umwana afwile. 54 Lelo e Yesu wamulemile pi kasa nga munena ati: “We mwana, nkuti katuka!” 55 Nu mukazyana wazyulupusile paponye, akatuka nu kukatuka, nga Yesu awanena ukuti wamupe ivyakulya. 56 Awakwasi wa mwana wivwile icete nkaninye icakuti walolanga vye nge wufi, lelo e Yesu wawanenile ukuti watize wanenepo uwili wensinye pe vino vyacitisile.