Ukulingana ne Mateyo
14 Pe yoyo impindi e Herodi, e kateka wa citungu ca Galili, wivwile amalyasi pe Yesu, 2 swinya wanenile awawomvi wakwe ukuti: “We-e we Yohani kabadizya. Akatusile ku wafwe, Awuli umulandu wuno awezile na maka yakucitila vyo-o ivizungusyo.” 3 E Herodi* walemile Yohani nu kumuwika mu cifungo pa mulandu wa kwe Herodiya. Pakutalika, e Herodiya walinji we muka Filipi, swinya e Filipi walinji we songo wa kwe Herodi. 4 E Yohani wanenanga Herodi ukuti: “Ukulingana ni sundo, utazipizile ukumutwala.” 5 Lelo nanti acakuti Herodi walondanga ukumukoma, watinanga awantu, amuno awantu walolanga Yohani ukuti we kasesema. 6 Pano wazevyanga uwanda wa nkwatwa ya kwe Herodi, umwana umwanaci uwa kwe Herodiya wacinile nkaninye swinya Herodi watemilwe, 7 icakuti walafile ukuti walinji nu kumupa consinye cino walenga. 8 Walile umwana wivwa vino e mama wakwe walondanga, wayile anena Herodi ukuti: “Mpa nombanye umutwe wa kwe Yohani kabadizya pa mbale.” 9 E Herodi wivwile uwulanda nkaninye, lelo pa mulandu wa mulapo wuno walafile pa wantu wano walyanga nawo,* wazumizile ukuti wakome Yohani. 10 Acino watumile uwakuya mukuputula Yohani umutwe mu cifungo. 11 Umusilika walesile umutwe wa kwe Yohani pa mbale nu kupa umukazyana, nawe wayilepa mama wakwe. 12 Pa nsizi ya kwe co-o awasambi wakwe wayile awasenda umuwili wakwe nu kumuzika; apano wayile awanena Yesu vino vyacitisile. 13 Pano Yesu wivwile vyo-o, wakwezile uwato nu kuya ku cifulo kuno kutalinji awantu pakuti awekovye wenga. Lelo walile awantu wivwa vyo-o, wafumile mu misumba nu kumukonka pansi.
14 Walile Yesu wika mu wato, waweni awantu awavule, swinya wawivwizile uluse, nu kupozya wonsinye wano walwile. 15 Nomba pano kwayanga kukufita, awasambi wayile kwe Yesu nu kumunena ati: “Ko-o kuno tuli akutali swinya kukuya kukwila; lekani awantu wapite pakuti waye wakakaleko ivyakulya mu twaya.” 16 Lelo e Yesu wawanenile ukuti: “Watazipizile ukupita; mwemwenye wapani ivyakuti walye.” 17 Nawo wamwasusile ukuti: “Tusi nanti cimwi, suka vye imikate 5 ni nswi ziwili.” 18 Nawe watili: “Letani ko-o.” 19 Nga Yesu anena awantu ukuti wikale pi sote. Asenda imikate 5 ni nswi ziwili, alolecesya mupela, apepa. Walile wamontolanya imikate, wapile awasambi wakwe, nawo awapa awantu. 20 Wonsinye walile nu kwikuta, akusyala na vimwi, swinya walile walonganika vino vyasyazilepo, vizwile ivise 12.* 21 Wano walile walinji awonsi ku ma 5000, ukufumizyako awanaci na wana awatici. 22 Ukwasowa nu kusumba impindi, e Yesu wanenile awasambi wakwe ukuti wakwele uwato wakolele, lelo weni wasyazile pakuti asinincizye ukuti awantu wapita.
23 Walile wanena awantu ukupita, wayile ku mwamba mukupepa. Pano cafisile amangunzi, walinjiko vye wenganye. 24 Pe yo-o impindi uwato walinji ukutali na ku mulundu, swinya wayingananga ku mawimbi amuno umuza wafumililanga kuno wayanga. 25 Lelo pano kwati kwaya mukuca,* e Yesu wayile ku wasambi wakwe lyo akupita pe sumbi papela. 26 Walile awasambi wa kwe Yesu wamulola akupita pa minzi, wivwile intete, awalanda awati: “Cikuloleka ngati amuntu!” Acino wapunzile pa mulandu wakuti walinji ni ntete. 27 Nga Yesu awanena ukuti: “Mutatina! Anene.” 28 Nga e Petro ayasuka ukuti: “Tatakulu, awewe? Fwandi leka mpite pa minzi, pakuti injize kwe wewe.” 29 Ne Yesu amunena ati: “Nzanga! Nga Petro afuma mu wato nu kutalika ukupita pa minzi akuya kwe Yesu. 30 Lelo walile walola icimuza, wivwile intete. Swinya pano watalisile ukusiwila, wapunzile ukuti: “Tatakulu mpususya!” 31 Paponye Yesu atambalika ikasa lyakwe nu kumulema nga amunena ati: “We wi suwilo ilitici, nga cani cino utate wansuwila?” 32 Walile winjila mu wato, icimuza calesile na paponye. 33 Apano awasambi wakwe awamufukamila,* awamunena ukuti: “Molimonye we Mwana wa kwe Lesa.” 34 Awalamba sumbi nu kuya ku Genesareti.
35 Walile awantu wano wikalanga kwe yoyo incende wamumanya ukuti we Yesu, wanenileko wano wikalanga mu twaya tuno twalinji mupipi, swinya awantu wamuletezile wonsinye wano walwile. 36 Ne nawo wayile mukumulambilizya ukuti walemevye ku cizwalo cakwe ica kulonde, na wonsinye wano walemile ku cizwalo cakwe wapozile.