Ukulingana ne Mateyo

21 Pano wayanga wakupalamila ku Yerusalemu, wimilizile pa Betifage pa Mwamba wa Miolife, Yesu atuma awasambi wakwe wawili, 2 awanena ati: “Yanji mwe kako akaya kano mukulola pa nkolelo. Nga mwafika mukaya, mwandi mukazane indokwe yino wanyepezile ponga na kana. Muzisapule mundetele. 3 Ndi wumwi wamikolowozya, mulande muti, ‘We Tatakulu atutumile.’ Nawe wandi akamizumilizye ukusenda.”

4 Vyo-o vyacitisile pakuti amazwi yano yalandizilwe mwe kasesema yaficiliswe, ayakuti: 5 “Nena umwana umwanaci e Zioni: ‘Lola! Imfumu yako yikwiza kwe wewe, iyicefizye swinya yikwezile pa ndokwe, pa mwana wa ndokwe.”

6 Acino wa-a awasambi wayile awacita vino Yesu wawanenile. 7 Walesile indokwe na kana, awasambi awawikapo ivizwalo vyawo ivyakulonde, nga Yesu ayikala penepo. 8 Awantu awavule wano walinjiko wanzile ivizwalo vyawo ivya kunzi mu musewo, ne wanji nawo wapambulanga insamba zya vimiti wakwanza mu nzila. 9 Awantu awavule wano walinji pa nkolelo, na ku nsizi wapundanga wakuti: “We Leza, tukulenga, pususya Mwana Devedi! Wapalwa umuntu wino akwizila mwi zina lya kwe Yehova!* Acino tukupepa kwe wewe we muno wikala mwi yulu tukuti mupususye”!

10 Pano Yesu winjizile mu Yerusalemu, awantu wonsinye watalisile ukuwuzya ukuti: “Nga wenye we-e weweni?” 11 Awantu watwalilizile vye ukulanda ukuti: “We-e we Yesu wa ku Nazareti wa mu Galili! We kasesema wino walandizilwe lyankani.”

12 Nga Yesu ayinjila mwi tempile nu kuwinga wonsinye wano wakazyangamo nu kukala, apenulanya amatebulo ye wano wakawulanga indalama, apenulanya ni vilimba vye wano wakazyanga inkunda. 13 Awanena ati: “Amawaliko yakati, ‘Ing’anda yane yiliwa yakwitwa ing’anda yakupepelamo,’ nomba mwemwe mwayipanga ukuwa ang’anda yakwikalamo ivipondo.” 14 Swinya pano Yesu walinji mwi tempile, intonko na wantu awalemale wayile kwe weliwe, nawe wawapozizye.

15 Pano wa simapepo na wakasambilizya wa masundo waweni ivizungusyo vino Yesu wacisile na wana wano wapundanga pi tempile wakuti, “Tukupepa tukuti pususya Mwana Davedi!” cawalumile nkaninye 16 awamunena awati: “Uzye utakwivwa vino awana wakulanda?” Ne Yesu awasuka ukuti: “Njivwile. Uzye mutawazya amazwi yano yakati, ‘Waleka imilomo ya wana nu tunya ukukulumbanya’?” 17 Afuma mu Yerusalemu, nu kuya ku kaya ka Betani, kuno wayile alala.

18 Uwanda wuno wakonsilepo pano wanyocelanga ku Yerusalemu umutondotondo wivwile inzala. 19 Acino wayile ku cimuti ca mukunyu cino waweni mu nzila lelo wayile azanakovye amafwa, nga anena icimuti ati: “Ukufuma ilelo lyo-o utalikomapo icikomwa cimwi.” Nga icimuti acikala na paponye. 20 Walile awasambi walola co-o, wazungusile nkaninye, awati: “Nga icimuti co-o cakala wuli panye pa-a?” 21 Ne e Yesu awanena ukuti: “Nkuminena icisinka nkuti, nga muli ni suwilo swinya musakuvwilika, namwenye mungacita wonye vino nacita kwe co-o icimuti, swinya munganena nu mwamba muti, ‘Katuka pa-a ukayisumbile mwe sumbi,’ nawo wungacita wowonye. 22 Swinya ivintu vyonsinye vino mwalenga mwi pepo, nga muli ni suwilo, mulipocelela.

23 Walile Yesu winjila mwi tempile, intunguluzi zya simapepo na wasongo wizile kwe weliwe lyo akusambilizya. Awamunena awati: “Aku maka ya kwe weni kuno ukacitila vyo-o? Weni wakupile ya-a amaka?” 24 Nga Yesu awasuka ati: “Nandi mikolowozye iwuzyo lyonga. Nga mwanjasuka, naninye nkuminena kuno nkafumya amaka yano nkacitila vyonsinye vyo-o: 25 Weni watumile Yohani ukwiza mukubadizya? Uzye we Leza wa mwiyulu nanti awantu?”* Nawo awatalika ukulanzyanya wakuti: “Nga twati, ‘We Leza wa mwiyulu,’ wandi ati, Nga cani cino mutamusuwilizile?’ 26 Ne nga twati ‘Awantu,’ awantu wano wali pa-a wasakutuleka, amuno wamanya ukuti Yohani walinji we kasesema.” 27 Acino wasusile Yesu ukuti: “Tutamanyile.” Nawe wawanenile ukuti: “Naninye ntakuminena nkuno nkafumya amaka yano nkacitila vyonsinye vyo-o.

28 “Mukutipo wuli? Yelenganyani ukuti umuntu wumwi ali na wana wawili awonsi. Nga wanena uwakutalicila wati, ‘Yanga, kawombeko mu calo* ilelo.’ 29 Nu mwana wakana, wanena yisi wati, ‘Ne nsakuyako,’ nomba pansizi, wasyala walanguluka, waya ku vyalo. 30 Yisi aya ku mwana winji nu kumunena icili conganye. Weni wanena yisi ukuti, ‘Nandi inje.’ Lelo wakana ukuya. 31 Weweni pe wa-a wawili wino wivwizile yisi?” Nawo wasusile awati: “Awakutalicila.” Nga Yesu awanena ati: “Nkuminena nkuti wakasoncezya wa misonko na wazelele waliyinjilapo zuwa* mu Wufumu wa kwe Leza pe mwemwe. 32 Amuno e Yohani wizile kwe mwemwe mukumilanjizya ivya kwikala ukulingana na vino Leza akalonda, lelo mutamusuwizile. Nomba wakasoncezya wa misonko na wazelele weni wamusuwizile, na pano mwaweni vyo-o mutivwile uwulanda pakuti mumusuwile.

33 “Yivwani icilanjililo na cinji ica monsi wino walinji ni calo. Mwe co-o icalo* walembesilemo ivikomwa, azenga ni linga ukuliwilizya icalo. Mukasi wawisile apakufinila ivikomwa pakuti wapanga waini. Swinya wazenzilemo nu lupungu. Asila awalimi ukuti wasakamala icalo. Nga aya kunsi yinji. 34 Pano impindi yakusombola yafisile, wanenile awawomvi ukuti waye wakasende ivikomwa ku walimi. 35 Lelo wa-a awalimi wasenzile awawomvi wakwe, wenga awamuma, wumwi awamukoma, ne winji awamutama amawe. 36 Swinya watumile awazya na wanji, weni wavuzile pa wakutalicila, lelo nawonye wa wacisile icili conganye. 37 Mukulecelezya watumile umwana wakwe, amuno welenganyanga ukuti, ‘Wandi wakacindike umwana wane.’ 38 Walile awalimi walola umwana, awalanzyanya awati, ‘We-e awino alipyana co-o icalo. Lekani tumukome pakuti cize cisyale acitu!’ 39 Acino wamusenzile nu kumufumizya kulonde ya calo awamukoma nu kumukoma. 40 Uzye pano umweni calo alinyoka, aliwacita wuli wa-a awalimi?” 41 Intunguluzi zya simapepo na wasongo awati: “Pa mulandu wakuti awawipe, aliwakoma* nu kupa icalo kwe wanji wano waliwamupa ivikomwa nga impindi yakusombola yafika.”

42 Nga Yesu awanena ati: “Amawaliko yakati, “Iliwe lino wakazenga wakanile, alino liza lyawa pakoona. Amuno lyo-o iliwe lyafumile kwe Yehova,* swinya co-o acizungusyo kwe sweswe’. Uzye mutawazya ya-a amawaliko? 43 Awuli umulandu wuno nkuminenela nkuti, e Leza alimipoka Uwufumu wakwe nu kupa awantu wanji wano wakacita vino akalonda ukuti wacite. 44 Swinya wensinye wino waponela pe lyo-o iliwe alicisika nkaninye. Na wensinye wino lyaponela, lilimukoma.”

45 Zyalile intunguluzi zya simapepo na Wafalisi wivwa co-o icilanjililo, wilusile ukuti awano walandangapo. 46 Nanti acakuti walondanga ukulema Yesu, watinanga awantu, amuno wamulolanga ukuti we kasesema.