Ukulingana ne Mateyo
18 Pa mpindi yilyanye, awasambi wizile kwe Yesu nu kumuwuzya ukuti: “Amuntu ci wino aliwa we songo mu Wufumu wa mwi yulu?” 2 Nga Yesu ayita umwana umutici nu kumwimilika pano walinji, 3 apano awanena ati: “Nkuminena nkuti, muzipizile ukupiluka nu kuwa ngati awana awatici, apano muliyinjila mu Wufumu wa mwi yulu. 4 Wensinye umuyicefye, wino akayilola ngati awe-e umwana umutici, awino aliwa we songo mu Wufumu wa mwi yulu. 5 Wensinye wino wapocelela umuntu wino ali ngati awe-e umwana umutici pa mulandu wane, lyo wampocelela na nenenye. 6 Nomba wensinye wino walenga wumwi pe wa-a awayicefye wano wansuwila, ukufuma mwi suwilo,* cingazipa vye nga wamunyefile iciliwe icikulu mu nsingo,* nu kumusumbila naco mwe sumbi umuzike.
7 “Acawulanda ku wa munsi wano wakalenga wanji ukuwembuka! Kweni ivintu vino vikalenga wanji ukuwembuka viliyiza, lelo acawulanda ku muntu wino walenga wanji ukuwembuka! 8 Acino nga cakuti ikasa lyako nanti itamba likukulenga ukuwembuka,* liputule nu kulisumba. Cazipapo ukupocelela uwumi lyo wemulemale, ukucila ukuti wize wakonone umuyayaya na makasa yako yonsinye yowili na matamba ku mulilo. 9 Swinya nga cakuti ilinso lyako likukulenga uwawembuka, lifumye nu kulisumba. Cazipapo ukuwa nu wumi ni linso lyonga ukucila ukuti wize wakusumbile na minso yako yonsinye mu Gehena.* 10 Mutalola wamwi pe wa-a awayicefye ukuti watacindama, amuno awangeli wawo wakakwimilila lyonsinye pa nkolelo pa kwe Tata wino wawa mwi yulu. 11 ——
12 “Uzye mwemwe mukutipo wuli? Tuti umuntu ali ni ng’onzi 100 nga pasowa yonga, uzye atanga asye ing’onzi 99 mu myamba nu kuya mukuvwamba yonga yino yisovile? 13 Nga cakuti wayizana, nkuminena nkuti akasecelela nkaninye ukucila na pa ng’onzi 99 zino zitate zisovile. 14 Wonye wo-o avino nu Mukwasi wane uwa mwi yulu asilonda ukuti wenga pe wa-a wano wawa ngati awana awatici alowe.
15 Nga cakuti umunyonko wakuluvyanya, yanga kwe weliwe ukamunene vino aluvinye lyo mulivye wawili. Nga wakwivwa, lyo wanyosya munyonko mu nzila. 16 Lelo nga wakana, sendapo umuntu wenga nanti wawili wakakwimilileko wukamboni amuno pano pali awantu wawili nanti watatu, umulandu wungamanyikwa. 17 Nga cakuti napanye wakana ukuwivwa, twala umulandu kwi wungwe. Lelo nga wakana ukwivwa na kwi wungwenye, uwamulola vino mukalola wano asa waYuda na wakasoncesya wamisonko.
18 “Nkuminena nkuti, consinye cino mwanyepa* mu nsi, lyo na mwiyulu nye wacinyefile, na consinye cino mwasapula munsi lyo na mwiyulu nye wacisapuzile. 19 Swinya cinji, nkuminena nkuti, nga cakuti wawili pe mwemwe munsi mwazumilizyanya ukupepela pe cimwi icicindame, Umukwasi wane uwa mwi yulu alicita ukulingana na vino mwalenga. 20 Nga cakuti awantu wawili nanti watatu walongine mwi zina lyane, ndiwa nawo.”
21 Nga Petro aya kwe Yesu nu kumuwuzya ukuti: “Tatakulu, umwanawitu nga wanduvyanya, amiku yinga yino nzipizile ukumutetela? Uzye amiku 7?” 22 Yesu amunena ukuti: “Awe, asa miku 7, lelo akufika ku miku 77.”
23 “Awuli umulandu wuno tungakolanizizya Uwufumu wa mwi yulu ku mfumu yino yalondanga awawomvi ukunyosya inkongole. 24 Pano yatalisile ukupoka inkongole, awawomvi wakwe wamuletezile umonsi wino wamukongozile indalama amatalanti 10,000. 25 Lelo pa mulandu wakuti atakweti indalama zyakunyosya, Imfumu yatili wamukazye kumwi nu muci, na wana, na vyonsinye vino wakweti pakuti anyosye inkongole. 26 Nga umuzya apona pa nsi atalika ukulambilizya Imfumu ukuti: ‘Nazina ndindililako vye katici, ndinyosya inkongole zyonsinye.’ 27 Imfumu yamwivwizile uluse, acino yamunenile ukuti atize anyosye inkongole. 28 Pano we-e umuwomvi wafumile ku mfumu, wayile mukuvwamba umuwomvi muwuye wino wamukongozile indalama ama denari 100. Walile wamuzana, wamulemile, amufina pa nsingo, amunena ati ‘Nyosezya indalama zyane zyonsinye zino wankongola.’ 29 Acino umuwomvi muwuye waponile pansi atalika ukumulambilizya ukuti: ‘Nazina ndindililako vye katici, ndinyosya inkongole zyonsinye.’ 30 Lelo wakanile ukwivwa, asenda umuwuye aya amunyepesya mu cifungo* pakuti ayize anyosye indalama zyakwe zyonsinye. 31 Walile awawomvi wawuye walola vino vyacitika, wafuzilwe nkaninye, awaya awanena imfumu vyonsinye vino vyacitisile. 32 Nga imfumu ayimwita nu kumunena ukuti: ‘We muwomvi muwipe wee! Tenasulako ku nkongole zyako zyonsinye pano tewandambilizya. 33 Uzye wonye asa vino te uzipizile ukutetela umuwuyo ndi vino tenakutetela?’ 34 Imfumu yafuzilwe nkaninye ayimwinjizya mu cifungo,* pakuti ayize anyosye inkongole zyonsinye. 35 Wonye avino nu mukwasi wane uwa mwi yulu alicita kwe mwemwe nga cakuti musakutetela awawuyo ni myezo yinu yonsinye.”