September

E Yehova wapa e Yesu amaka yakumala intazi zyonsinye zino awantu wakapitamo. Ivizungusyo vino e Yesu wacitanga, vikalanjizya apatiswenye ukuti wawa na maka yakufumyapo intazi zino tutanga tufumyepo pa lwitu. Ku cakulolelako, wawa na maka yakutuluwula kwe vino vikalenga awantu wacula ponga ngati aluwembu luno twapyana lo lukalenga twalwala nu kufwa. (Mat. 9:​1-6; Roma. 5:​12, 18, 19) Fwandi ivizungusyo vino Yesu wacisile vikatupa vye uwusinincizyo wakuti alifumyapo indwala “zyamisangomisango zyonsi” nu kuzyulupula awafwe. (Mat. 4:23; Yoha. 11:​43, 44) Cinji acakuti, wawa na maka yakumyalalika icimuza nu kucimvya ivimizimu viwipe. (Mar. 4:​37-39; Luk. 8:2) Tukakwivwa icete nkaninye wo-o vino Yehova wapa Umwana wakwe ya-a amaka! Tungasuwila ukuti ivizima vyonsinye vino Yehova watulaya mu Wufumu wakwe vilificiliswa. Ivizungusyo vino e Yesu wacisile pano walinji munsi, vikalanjizya vye ukuti kunkolelo alicita ivikulu nkaninye pamulandu wakuti Amfumu mu Wufumu wa kwe Leza. w23.04 3 ¶5-7

Nga cakuti mwawa mwi wungwe ikulu swinya mukulola ngati watakumisonta, mungatalika nu kwelenganya ukuti mwandi muleke ukutumpula nu kuwateyelezya vye pano wanji wakwasuka. Lelo wo-o, asa vino cizipizile ukuwa. Mwemwe muzipizile vye ukupekanya ivyasuko ivivule pakuti nanti watamisonsile pakutalika, mungasukapo impindi yinji pano ukulongana kucili kutwalilizile. Swinya pano mukupekanya Isambililo lya Ulupungu lwa kwe Malonda, mwakwelenganya pe vino cila paragrafu yilemenkine nu mutwe wa cipande. Nga mukucita wo-o, muliwawa nivyasuko ivizima vino mungasukapo mwi sambililo lyonsinye. Cinji acakuti, mwapekanya nu kwasukapo mu ma paragrafu muno muli ivisinka vya mu Baibolo vino vyatala ukulondolola. Amulandu ci? Amuno ncepamwi kutanga kuwe awavule wano wangakunda ukwasukapo mwe yayo amaparagrafu. Nomba mungacita wuli, nga cakuti naponye mutakukwatapo ulongo lwa kwasukapo?, Munganena wino wandi awatungulula nu kumulanjizya e paragrafu yino mupekinye ukuti ayino mukulonda ukuti mwize mwasukepo. w23.04 21-22 ¶9-10

E Jozefu wayikundilanga ukukonka uwutunguluzi wa kwe Yehova, na co-o calenzile awe umulume umuzima. Mupipi ni miku yitatu, wapocelezile uwutunguluzi ukufuma kwe Yehova wuno wakumile ulupwa lwakwe. Peyonsinye yo-o imiku, atalemanga na kwisote ukwivwila, na palyanye pano camutalilanga ukucita wo-o. (Mat. 1:20; 2:​13-15, 19-21) Ukukonka uwutunguluzi wa kwe Leza kwalenzile acinjilile Mariya nga nu kumusakamala. Ukwasowa nu kuvwilika, wo-o vino e Jozefu wacitanga, vyalenzile e Mariya amukunde nu kumucindika nkaninye. Awalume wangakolanya e Jozefu, nga wakukonka uwutunguluzi wa kwe Yehova pano wakusakamala indupwa zyawo. Nga wacita wo-o, wakalanjizya ukuti wakunda awaci swinya wakalenga ni twala lyawo ukuwomelako. E nkazi wumwi uwa ku Vanuatu wino wamala imyaka ukucila 20 mwitwala, watili: “Nkatwalilila ukucindika e wakwane nga wakonka uwutunguluzi wa kwe Yehova. Nkayivwa ukuti na cinjililwa swinya nsivwilika vino akapingulapo.” w23.05 21 ¶5

AwaYuda wano walinji nu kunyocela ku Israeli ukufuma ku Babiloni walinji nu kuwa “awantu watele” kwe Leza wawo. (Ayize. 62:12) Co-o cikutulanjizya apatiswenye ukuti wano walinji nu kufuma mu Babiloni nu kuya ku Israeli walondekwanga ukupilukako mwe vimwi pa kuti wasecelesya Yehova. Awa Yuda awavule wakwatizilwe mu Babiloni swinya intambi ni vintu vinji ivivule vino wamanyile vyalinji avya mu Babiloni nye. Pa nsizi ya myaka imivule ukufumilila pano awaYuda wano watalicizile ukucinta ukunyocela ku Israeli, Umulasi e Nehemia wizile ayivwa uwulanda nkaninye pano wazanile ukuti na wana nye wano wakwatizilwe mu Israeli, watasambilizile iciHebere cino awaYuda walandanga. (Amasu. 6:​6, 7; Nehe. 13:​23, 24) Calinji nu kuwomela nkaninye wa-a awana, ukutalika ukupepa e Yehova nu kumukunda. Amuno pe yoyo impindi Izwi lya kwe Leza lyalemvilwe vye mu ciHebere, icitundu cino watamanyile. (Ezra 10:​3, 44) Lelo nanti ciwe wo-o, calinji nu kuwapepucilako ukupiluka mwe vimwi, amuno lyo wanyocela kaali ku Israeli kuno ukupepa Yehova kwayanga kukunyoka katici katici.—Nehe. 8:​8, 9. w23.05 15 ¶6-7

Asa mulandu na vino twawa nanti vino tukavwambisya ukuwomba, mpindi zimwi kukawa vino vikalenga acituwomela ukuficilisya vino twapanga ukucita. Ku cakulolelako, “umukosi nanti ivintu ivyasowa ukwenecela,” vingatusendela impindi yakuwombela pe vino twapanga ukucita. (Ekawi. 9:11) Ne mpindi zimwi tungapita vye mu ntazi iziwome zino zingalenga twakwivwa uwuwi icakuti na maka ayatusowela kumwi. (Imilu. 24:10) Swinya ukukanapwililika nako kungalenga tucite vimwi vino vingalenga cituwomele ukuficilisya vino twapanga. (Roma. 7:23) Cinji acakuti, mpindi zimwi ukutonta akuno kungalenga. (Mat. 26:43) Nomba uzye acani cino cingatwavwa, nga cakuti kwawa vimwi vino vyalenga cituwomele ukuficilisya vino twapanga ukucita? Nga kwawa vimwi vino vyalenga cituwomele ukuficilisya vino twapanga, lyo citakusula mukuti tuzipizile ukuleka ukwelezya na maka ukuficilisya. E Baibolo yikatunena ukuti mpindi zimwi tungapita mu ntazi izivule. Swinya yikatunena nu kuti, tungatalika na swinyanye ukwelezya ukuficilisya vino twapanga. Nga twatwalilila ukwelezya na maka ukuficilisya vino twapanga asa mulandu nu kuti ivintu vitazile, tukalanjizya apatiswenye ukuti tukalonda ukusecelesya Yehova. Ukwasowa nu kuvwilika, akakwivwa icete nkaninye nga walola mukwelezya na maka ukuficilisya vino mwapanga ukucita. w23.05 30 ¶14-15

Awanawitu awavule wasongo mu vya kwe Leza wakatalika ukuwomba umulimo wa mpindi zyonsi lyo wacili awatici. Wupayiniya awuno wukawavwa ukusambilila ivyakuwomba na wantu awalekane lekane. Swinya wukawavwa ukutantika icete ivyakuwomvya indalama nu kukonka vyovyonye vino watantika. (Flpi. 4:​11-13) Fwandi icicindamisye cino muzipizile ukutalicila ukucita pano mutani muwe mu mulimo wa mpindi zyonsi, akuwombako wupayiniya wakwavwilizya. na co-o cikawavwa ukutalika ukuwomba wupayiniya wa mpindi zyonsi. Wupayiniya awuno wukakwiyula inzila zya kuwombako na vinji mu mulimo wa mpindi zyonsi, ndi vino ukuwombako mu wuzengo nanti pa Bethel. Umwanawitu wensinye azipizile awavwambisya ukufikapo ukwavwa awanawitu na wankazi mwi wungwe, akuli ukuti ukufikapo ukuwa we eluda. E Baibolo yikalanda ukuti umonsi wino akuwombesya ukufikapo, lyo “akulonda umulimo wuzima nkani.” (1 Tim. 3:1) Icakutalicila umwanawitu azipizile ukutalicila ukufikapo ukuwa amuwomvi wino akatumicila. Awawomvi wano wakatumicila wakakwavwa wa eluda mu milimo imivule. Swinya wonsinye ponga na wa eluda wakayikundila ukuwombela awanawitu na wankazi nu kuwombako mu mulimo wakuwizya. w23.12 28 ¶14-16

Imfumu Josia yatalisile ukuvwamba Yehova lyo yili ni myaka 16. Yalondanga ukusambilila pe Yehova nu kucita ukulonda kwakwe. Lelo citalinji acipepepuke ukucita wo-o. Amuno pe yoyo impindi awantu awavule wapepenga twa leza twa wufi. Acino e Josia walondekwanga ukusipa pa kuti awalesye. Icizima acakuti wakumanisizye ukucita wo-o. Pano atani afisye ni myaka 20, watalisile ukufumyapo ukupepa kwa wufi mu luko. (2 Imila. 34:​1, 2) Na mwemwenye nanti acakuti mwe watici mungakolanya e Josia ukupitila mukuvwamba Yehova nu kusambilila pa miwele yakwe. Nga mwacita wo-o, muliwalondesya sana ukuyipa. Uzye ukuyipa kwe Yehova kulimyavwa wuli mu wumi winu? E Luke wino wabatizizwe lyo ali ni myaka 14, watili, “Pe yo-o impindi nandi nawika ukuwombela Yehova pa nkolelo mu wumi wane swinya nandi nakwelezya na maka ukumusecelesya.” (Mar. 12:30) Mulipaalwa nga cakuti mwasolapo ukuyipa ngati avino we-e uwacitici wacisile. w23.09 11 ¶12-13

Pano Paulo walembanga yo-o e kalata, lyo iwungwe lya mu Tesalonika litani limale nu mwaka. Fwandi pe yoyo impindi lyo ncepamwi na wanawitu wano watungululanga watani wamanye ni vivule swinya waluvyanyanga nu kuluvyanya. Lelo nanti ciwe wo-o, awa mwi wungwe wazipizile ukuwawacindika. Nga cakuti uwucuzi wukulu wiza watalika, tungiza twalondekwa ukusuwila nkaninye wa eluda ukucila na pe vino cawa pe yo-o impindi. Amuno ncepamwi tutaliwapocelelapo nu wutunguluzi ukufuma ku musambo nanti ku maofesi makulu. Fwandi pe yonye impindi apano cicindime sana ukukunda nu kucindika wa eluda. Asa mulandu ni cili consinye cino cingacitika, lekani tutwalilile ukuwa awacenjele. Mutazipizile ukuwika vye mano pa viluwo vino wa eluda wakacita, lelo mwakwizuka lyonsinye ukuti e Yehova awino wawasonta ukupitila mwe Klistu wino akawatungulula. Ndi wulyanye vino icisote cacinjililanga umutwe wa musilika, avino ni suwilo likacinjilila amelenganyo yitu. tukamanya ukuti ivya munsi avyavye. (Flpi. 3:8) Isuwilo lingatwavwa ukuwa awatekanye swinya awacenjele. w23.06 11-12 ¶11-12

Wonsinye wano ‘umwanaci’ umutumpe akakwita, wazipizile ukupingulapo: nampo nga akuzumila nanti ukukana. Kwawa imilandu imicindame yino yikalenga tutacita uwuzelele. ‘Umwanaci umutumpe’ wamulondolola ngati akulanda ukuti “aminzi yakwiwa” yanonelela. (Imilu. 9:17) Nomba uzye yanye “aminzi yakwiwa” avyani? E Baibolo yakolanya ukusunkana kwa mwitwala ukwa mulume nu muci ku minzi yakumala ulusala. (Imilu. 5:​15-18) Awatwalane vye ukulingana ni sundo, awano wazumilizwa ukuyitopwa ukusunkana kwa mwitwala. Ko-o ukusunkana kwapusanako nkaninye na kuno Baibolo yikakwita ukuti “aminzi yakwiwa.” Amuno ya-a “aminzi yakwiwa” yafwile yakakwimililako wano wakasunkana mu wumfisolo swinya wano wasitwalana ukulingana na masundo. Cinji acakuti wakavwama kwe wanji ngati awulyanye vino umung’o akacita pakwiwa. Wa-a awantu wangalola ngati ukucita wo-o kukakwivwika icete, maka maka nga wakwelenganya ukuti pasi uwili wensinye wino alimanya. Nomba ukwelenganya kwa musango wo-o kutazipa nanti katicinye. Amuno lyo wakuyiwipa vye, e Yehova akalola vyonsinye. Ukumala wuciwuza ne Yehova acili cintu iciwipe nkaninye cino tutazipizile twakwelenganyapo. Fwandi patawa nanti pamwi pano uwuzelele wazipila, wungatuletelela vye.—1 Kor. 6:​9, 10. w23.06 22 ¶7-9

Mpindi zimwi mungalola ngati mutakupepa ukufuma pansi ya mwezo nanti mutakuyitopwa ukuwomba umulimo wakuwizya ndi vino calinji pa kutalika. Mutazipizile ukulola ngati e Yehova alesile ukumipa umuzimu wakwe. Muzipizile mwakwizuka ukuti mutapwililika, swinya ni vintunye vikapiluka cila mpindi. Nga cakuti mwatalika ukunyocela insizi, mwakwelenganya pa mutumwa Paulo. Nanti acakuti e Paulo welezyanga ukukolanya e Yesu, wamanyile ukuti asa welyonsi pano aliwacita ivintu ukulingana na vino akulonda. E Paulo walondesyanga ukuwomba umulimo wa kuwizya, asa mulandu na vino wayivwanga pe yoyo impindi. Namwemwenye mutazipizile mwapingula pa vintu ukulingana na vino mukuyivwa. Mwavwambisya ukucita ivizima na palyanye pano mukulola ukuti mutanga mukumanisye. Nga cakuti mwacita wo-o, mutaliwayivwilika.—1 Kor. 9:16. w24.03 11-12 ¶12-13

Tungalanizya ukuti twakunda awanawitu na wankazi ukupitila mukuwitako ukwizizya caponga nawo. (2 Kor. 6:​11-13) Swe wavule twawa mu ma wungwe muno mwawa awanawitu na wankazi awa nkulilo ni vikwatilwe ivipusane pusane. Nomba tungatwalilila ukuwakunda nga cakuti tukuwika sana amano pa miwele yawo imizima. Swinya tungalanjizya ukuti twawakunda nga cakuti tukuwalola ndi vino Yehova akawalola. Mu wucuzi wukulu, tuliwalondekwa ukukunda nkaninye awanawitu na wankazi. Uzye e Yehova alitucinjilila wuli nga cakuti uwucuzi wukulu watalika? Lekani tulande pe vino wanenile awantu wakwe ukuti avino wazipizile ukucita nga cakuti awalwani wasansa umusumba wa Babiloni. Wawanenile ukuti: “Yinjilani mu ng’anda zinu muyiyalile nivisakati. Mutele muvwame katichi wusuke uwukali wakwe Leza wusile.” (Ayize. 26:20) Cikaloleka ngati ya-a amazwi yaliwomba na kwe sweswenye mu wucuzi wukulu. w23.07 6-7 ¶14-16

Mwacita vino vikulanjizya ukuti mwawa nu mutembo. Mwayikolowozya ukuti: ‘Uzye awantu wanji wamanya ukuti nawa nu mutembo, natontelela swinya nkateyelezyako na kwe vino wanji wakulanda? Nanti uzye wamanya ukuti nsipetululwa, nawoma umutwe swinya ne wacilumba? Uzye nkateyelezyako kwe wanji nu kukonka vino wakulanda pano cayana? Pano tukuya tukuwelako nu mutembo, apano twandi twaya tukukolanya e Yehova ne Yesu. Tuzipizile ukuwa nu mutembo nga cakuti ivintu vyapiluka mu wumi. Amuno nga cawa wo-o, tungapita mu ntazi zino tutenecelangapo nu kwenecela ukuti tungakwata. Ku cakulolelako, ncepamwi tungalwala nkaninye. Nga sawowo, ncepamwi awa muwuteko wangatuwomezya uwikalo. (Ekawi. 9:11) Cinji acakuti mpindi zimwi wungawa ngati awelezyo nga cakuti iwungwe lya kwe Yehova lyatunena ukuti tutalike ukuwomba umulimo wunji nanti nga watunena ukuya mukuwombela ku ncende yinji. Nga twakonka ivintu 4 vino vyakonkapo vingatwavwa ukusipicizya. Akuli ukuti: (1) ukuzumila ukuti ivintu vipilusile, (2) ukuwika amano ku vya ku nkolelo, (3) ukulola ivizima mu wumi, ne (4) ukucitila wanji ivizima. w23.07 21-22 ¶7-8

E kasesema Daniel wamusenzile mu wuzya lyo amutici swinya wamufumizye kwa lupwa lwakwe nu kumutwala ku Babiloni kuno kwalinji akutali nkaninye na kunsi ya kumwawo. Lelo nanti acakuti walinji amutici, wizile amanyikwa nkaninye kwa songo wa kwisano. Amuno waweni “umuwili kulonde kutupu”—awati Daniel ‘asi nakasinza kamwi, amuzima mumilolecele’ swinya wafuma mu lupwa uluzima. (1 Sam. 16:7) Vyonye avino vyalenzile watalike ukumusambilizya pa kuti awawombela kwi sano. (Dan. 1:​3, 4, 6) E Yehova wamukunzile Daniel pa mulandu na vino walinji ni cisinka. Ku cakulolelako, waweni ukuti e Daniel walinji amulungamane ndi vino e Noa ne Job lyo alivye ni myaka mupipi ne 20. Acino calenzile amukolanye na kwe wa-a awonsi wano wamuwombezile ni cisinka pa myaka imivule. (Inta. 5:32; 6:​9, 10; Job 42:​16, 17; Ezek. 14:14.) Swinya e Yehova watwalilizile ukukunda Daniel uwumi wakwe wonsinye.—Dan. 10:​11, 19. w23.08 2 ¶1-2

Pano mukulonda ukukala ing’andamungavwamba ukulola vyonsinye vino vilimo na vino yikuloleka. Wonye avino tungacita pano tukuwazya Baibolo. Mutazipizile ukuwazya mu luwilo. Amuno ukucita wo-o, kungalenga mwasambilila vye ivisinka vya papela nanti “intaliko ya vikulu vya kuwumbulika kwakwe Leza.” (Hebe. 5:12) Lelo ndi wulyanye vino mungacita ku ng’anda yino mukulonda ukukala, muzipizile ukuvwambilizya ivisinka ivizike ivya mu Baibolo. Inzila yimwi yino yingamyavwa ukucita wo-o, akulola vino iwaliko lino mukuwazya lilemenkine na mawaliko yanji aya mu Baibolo. Cinji acakuti, mwakwelezya na maka ukwivwicisya ivisinka vino mwazumilamo nu kulola imilandu yino yalenga muvisuwile. Pa kuti twivwicisye vino vyawa mwi Zwi lya kwe Leza, tuzipizile ukuwawikako sana amano pano tukuwazya. Umutumwa Paulo wawomelezizye awina Klistu wawuye ukuwikako sana amano pano wakuwazya Izwi lya kwe Leza pa kuti ‘wiluke . . . cino uwupapatale nu wutali nu wukulu nu wuzike wa lukundo vikusula.’ Nga wacita wo-o, apano walinji ‘nukusimpa imisisi mulufula’ lwi suwilo lyawo. (Efes. 3:​14-19) Wonye avino nasweswe tuzipizile ukucita. w23.10 18 ¶1-3

E Baibolo yalanda na pa wantu na wanji wano walinji awatekanye. Cingazipa sana nga cakuti mwatalisile ukuyisambilizya na pe wa-a awantu. Ku cakulolelako, nanti acakuti e David wamusonsile ukuwa amfumu ya wina Israeli lyo acili amutici, walindilizile pa myaka imivule pa kuti wamuwike pa cilimba ca wufumu. Swinya e Simoni ne Anna watwalilizile ukupepa Yehova ni cisinka pa myaka imivule pano walindililanga ukwiza kwa kwe Mesiya. (Luk. 2:​25, 36-38) Pano mukuwazya amalyasi ya musango wo-o, mwakwelezya ukuvwamba ivyasuko ku mawuzyo ya-a. Acani cino cavwizye we-e umuntu ukutwalilila ukuwa amutekanye? Avizima ci vino wazanilemo? Ningamukolanya wuli? Cinji acakuti, na kwe walyanye wano watalinji awatekanye mungasambililako cimwi. (1 Sam. 13:​8-14) Mungayikolowozya ukuti, ‘Acani cino cingalanga calenzile wa-a awantu wapotwe ukuwa awatekanye? Aviwipe ci vino vyawaciticizile pa mulandu nu kukana tekanya?’ w23.08 25 ¶15

Umutumwa Peter walinji ni cisinka atalesile icili consinye cilenge aleke ukukonka Yesu. Walanjizizye wo-o pano Yesu walanzile vimwi vino awasambi waposilwe ukwivwicisya. (Yoha. 6:68) Awasambi wamwi walesile ukukonka Yesu ukwasowa nu kwivwicisya cino calenzile alande wowo. Lelo e Peter weni atalesile ukumukonka. Amuno wamanyile ukuti e Yesu awino walinji “namazwi yano yakapa uwumi wamuyayaya.” E Yesu wamanyile ukuti awasambi wakwe walinji nu kumukana. Lelo nanti ciwe wo-o, e Yesu wamanyile ukuti e Peter walinji nu kunyoka kwe weliwe nu kutwalilila ukumuwombela na swinya. (Luk. 22:​31, 32) Swinya wamanyile ukuti “umuzimu weni wukulonda, ukuwa umuwili weni watonta.” (Mar. 14:38) Ukumanya co-o icisinka kwalenzile e Yesu ukutwalilila ukumukunda nanti acakuti wamukanile. Cinji acakuti pano wazyulupusile walolesile na kwe Peter. (Mar. 16:7; Luk. 24:34; 1 Kor. 15:5) Teyelenganyani pe vino Peter wayivwile pa kulola Yesu nanti acakuti wayivwanga uwuwi pe vino wacisile! w23.09 22 ¶9-10

E Yehova akatetela nu kuvwimba pa mawembuko yewonsi wano wakasuwila mwe weliwe. Swinya nga watetela akakwiwililako nu kukanasunga vyovyo iviluwo. (Amalu. 32:​1, 2) Cinji acakuti, akatalika ukulola wawo awantu ukuti awazima swinya awalungamane pa mulandu wisuwilo lyawo. E Yehova wisile e Abrahamu, e Davidi, na wawomvi wakwe wanji awacisinka ukuti awalungamane, nanti acakuti walinji awawembu. Wawalolanga ukuti awalungamane pa mulandu ni suwilo lino walinji nalyo, maka maka nga wawalinganya ku wantu wano watalinji ni suwilo. (Efes. 2:12) Mwe kalata yino umutumwa Paulo walembezile awina Roma walanzile ukuti, tuzipizile ukuwa ni suwilo pa kuti tuwe swe viwuza vya kwe Leza. Fwandi e Abrahamu ne Davidi walinji aviwuza vya kwe Leza pa mulandu wakuti walinji ni suwilo. Nasweswenye nga tukulonda ukuwa iviwuza vya kwe Leza, tuzipizile ukuwa ni suwilo. w23.12 3 ¶6-7

Awina Klistu wonsinye pe yo-o impindi wawa nu longo lwa kupepa Yehova, ukupitila mukuwomvya impindi, amaka na vino wawa navyo ku kumuwombela. Tungalanjizya ukuti tukasalifya pe lo-o ulongo lwakupepa luno Yehova watupa nga cakuti tukumuwombela ukufika pano papelezile amaka yitu. Umutumwa Paulo walanzileko pa vintu vimwi vino tuzipizile ukuwikako sana amano. (Hebe. 10:​22-25) Pe vyo-o pawa ukupepa, ukuwizizyako wanji, ukuzanwa mu kulongana, nu kuwomelezyanya ‘nkaninkani pano mwalola kuno uwanda wakwiza kwa Mfumu wapalamila.’ Ne mukulecelezya kwi buku lya Ukuwumbulika, umungeli wa kwe Yehova walanzile mupipi ni miku yiwili ukuti: “Pepanga Leza!” (Ukuwu. 19:10; 22:9) Acino tukumiwomelezya ukuti mutiza mwiwilile vino twasambilila pi tempile lya kwe Yehova ilya mankolanya swinya twalililani ukusalifya pa longo lwa kupepa Yehova luno twawa nalo! w23.10 29 ¶17-18

Swensinye tukalonda ukutwalilila ‘ukukundana.’ Awuli umulandu wuno cacindamila ukwizuka amazwi ya kwe Yesu yano watusosile aya kuti “ulukundo lwa wavule lulitalalila.” (Mat. 24:12) Pano Yesu walandanga ya-a mazwi, atasulanga mukuti awasambilizi wakwe nawo walileka ukukundana. Lelo walanzile ya-a amazwi pakutusoka ukuti tuzipizile ukucenjela pa kuti tutakaleke ukukundana ndi vino awantu wa mwe yo-o insi. Pano tucili tukwelenganya pe co-o icisinka, lekani tulanzyanye iwuzyo ilicindame ilya kuti: Uzye kwawa inzila yimwi yino yingatwavwa ukumanya nga cakuti tucili twakunda awanawitu na wankazi? Conga cino cingatwavwa ukumanya nga cakuti tucili twakunda awanawitu na wankazi, akulola vino tukacita nga cakuti kwawa vimwi vino vyatuciticila mu wumi. (2 Kor. 8:8) Cimwi aco-o cino umutumwa Peter walanzilepo ukuti: “Ukulutulizya ivintu vyonsi, kundananji nkaninye, amuno ulukundo lukavwimbila amawembuko mavule.” (1 Pet. 4:8) Fwandi vino tukacita nga cakuti umwanawitu nanti e nkazi waluvyanya nanti nga watulumisya umwezo avino vikalanjizya nga cakuti twawa nu lukundo. w23.11 10-11 ¶12-13

Tutanga tuti tukakonka isundo lyakuti mwakundana nga cakuti twakunda vye wamwi mwiwungwe. Kweni kungawa wamwi wano wangatupepucila, ngati awulyanye vino calinji na kwe Yesu. (Yoha. 13:23; 20:2) Lelo umutumwa Peter watwizusizyeko ukuti tuzipizile ukukunda awanawitu na wankazi wonsinye, amuno twawa mu lupwa longa. (1 Pet. 2:17) E Peter walemvile ukuti “kundananji nimyezo yinu yonsi.” (1 Pet. 1:22) Mwe lyo-o izwi lya kuti “nimyezo yinu yonsi,” mwasanzyamo ukukunda umuntu wumwi na palyanye pano citazile ukucita wowo. Ku cakulolelako, tungacita wuli nga cakuti umwanawitu nanti e nkazi walanda nanti ukucita cimwi cino catulumisya umwezo? Pa kutalika ncepamwi tungalonda ukuti tumunyocezyemo pe vino acisile ukucila ukumulanjizya ukuti twamukunda. Nomba e Peter wasambilizileko kwe Yesu ukuti, ukulandula kusisecelesya Yehova. (Yoha. 18:​10, 11) E Peter walemvile ukuti: “Ndi wumwi wawawifya mutize namwe mumuwifye; pamwi ndi wumwi wawatuka mutize namwe mumutuke; Ukuwa mwenji muwawapepela.” (1 Pet. 3:9) Nga cakuti mwakunda awantu ni myezo yinu yonsi muliwa ni cikuku swinya mutaliwafulilwa wanji considerate. w23.09 28-29 ¶9-11

Acakuzungusya ukulola vino awana wakakula zuwa. Amuno cikaloleka ngati wakayikulila vye ukwasowa ukucitapo cimwi. Lelo wo-o, asa vino cawa pakuwa we songo mu vya kwe Leza. Peni pakalondekwa ukucitapo cimwi. (1 Kor. 13:11; Hebe. 6:1) Ku cakulolelako, pakalondeka ukuwa na wuciwuza uwuwome ne Yehova. Swinya tuzipizile ukuleka umuzimu wutele wutwavwe ukuwa ni miwele imizima, ukusambilila vimwi vino vingatwavwa nu kuyipekanizizya kucili ku milimo yino tungiza tuwe nayo ku nkolelo. (Imilu. 1:5.) Pano Yehova wapanzile awantu, wawisileko umonsi nu mwanaci. (Inta. 1:27.) Capepuka nkaninye ukumanya uwupusano wuno wawa pa mwanaci nu monsi, lelo kwawa na vinjinye vino vikalanjizya ukuti wapusana. Ku cakulolelako, e Yehova wawapa imilimo iyipusane pusane yino wazipizile ukuwomba. Acino wonsinye pa kuti waficilisye yoyo imilimo, kwawa imiwele yino wazipizile ukuwa nayo ni vintu vimwi vino wazipizile ukumanya vino vingawavwa.—Inta. 2:18. w23.12 18 ¶1-2

E Yesu akalonda na wanji wawomvya izina lya Mukwasi wakwe e Yehova. Intunguluzi zya simapepo zyasuwizile ukuti asa mucinzi ukulumbula izina lya kwe Yehova, amuno lyawa alitele nkani. Lelo e Yesu atalesile vyo-o ivisambilizyo vya wufi vilenge apotwe ukulumbanya izina lya Mukwasi wakwe. Uzye mukwizuka vino vyacitisile pano Yesu wapozizye umonsi wino walinji ni mizimu miwipe mu Gerasa? Awantu watinile swinya watalisile nu kulambilizya Yesu ukuti apite. Acino wizile afumako. (Mar. 5:​16, 17) Lelo nanti ciwe wo-o, walondanga izina lya kwe Leza limanyikwe na kwe yonye incende. Acino wanenile we-e umonsi ukuti awanena awantu ukuti asa weliwe wamupozizye lelo we Yehova. (Mar. 5:19.) Wonye avino akalonda na sweswe twacita mwe ya-a amanda, pa kuti izina lya Mukwasi wakwe limanyikwe insi yonsinye (Mat. 24:14; 28:20) Nga twacita wo-o, tukasecelesya Imfumu yitu e Yesu Klistu. w24.02 10 ¶10

Alongo ulukulu nkaninye ukuwa mwi wungwe lya kwe Yehova mwe ya-a amanda amatale. Asa mulandu nu kuti ivintu vikuya vikuwipilakovye munsi, sweswe e Yehova watuwika mu lupwa ululemenkane muno mwawa awanawitu na wankazi. (Amalu. 133:1) Cinji aca kuti, akatwavwa ukuwa awalemenkane mu ndupwa. (Efes. 5:33–6:1) Swinya akatupa amano yano yakalenga twasipicizya intazi nu kuwa nu mutende wa mumelenganyo. Tuzipizile ukuwombesya nkaninye pa kuti tutwalilile ukuwombela Yehova ni cisinka. Amulandu ci? Amuno mpindi zimwi tungayivwa uwuwi pe vino wamwi walanda nanti ukucita. Nanti ncepamwi tungayivwa uwuwi pe vino twaluvyanya, maka maka nga ca kuti tukunyocezyapo ivili vyonganye. Tuzipizile ukutwalilila ukuwombela Yehova asa mulandu nu kuti (1) umwanawitu nanti e nkazi watuluvyanya, (2) wino twatwalana nawe watuluvyanya, ne (3) nga tukuyivwa uwuwi pe vino tuluvinye. w24.03 14 ¶1-2

Ilivule muliwakwivwa kuno awanawitu na wankazi wakulondolola vino vyawavwizye ukulundulula umulimo wa kwe Yehova. Nce pamwi wamwi wasozilepo ukuya kwi Sukulu lya Kawizya nanti ukuya mukuwombela kuno wakawizya wacepa. Nga cakuti na mwemwenye avino mukalonda, lyo mukalonda ukucita icintu icicindame. Awantu wa kwe Yehova wakalondesya sana ukulundulula umulimo wakuwizya. (Imili. 16:9) Mungacita wuli nga cakuti mukulola ukuti mutanga mukumanisye ukuwomba? Mutazipizile ukuyilinganya kwe wanji nanti ukulola ukuti mutacindama. Icicindame cino muzipizile ukucita, akutwalilila ukusipicizya. (Mat. 10:22) Mwakwizuka ukuti e Yehova akasecelela nga cakuti mukumuwombela ukufika pano papelezile amaka yinu, asa mulandu na vino mukupitamo. Co-o, acino cingamyavwa ukutwalilila ukukonka Yesu nga cakuti mwabatizwa.—Amalu. 26:1. w24.03 10 ¶11

Umukwasi witu uwa kwi yulu watulaya ukututetela nga ca kuti twalapila. (Amalu. 86:5) Fwandi nga ca kuti twalapila ukufuma pansi ya mwezo pe vino twawembusile, tuzipizile ukusuwila ukuti e Yehova watutetela. Tuzipizile twakwizuka ukuti e Yehova akamanya nga cakuti ivintu vyapiluka mu wumi witu. Swinya asikwenecela ukuti twamucitila ivintu vino tutanga tukumanisye. Akasalifya pe vyonsinye vino tukamucitila, cikuluvye nga tukumuwombela ukufika pano papelezile amaka yitu. Cinji aca kuti, mwakwelenganyako na pa wantu wano walembwa mu Baibolo wano wawombelanga e Yehova ni myezo yawo yonsinye. Ku cakulolelako, lekani tulande pe vino calinji ku mutumwa Paulo. Wawombesizye nkaninye pa myaka imivule, wapitanga ukuya ku ncende zya kutali swinya wapanzile na mawungwe amavule. Lelo ivintu vizile avipiluka mu wumi swinya walesile nu kuwombesya ndi vino wawombesyanga pa kutalika. Nanti ciwe wo-o, e Yehova atalesile ukumuwikako amano. Swinya e Yehova wamupaazile pa mulandu wa kuti watwalilizile ukumuwombela ukufika pano papelezile amaka yakwe. (Imili. 28:​30, 31) Nasweswenye ivintu vingapiluka mu wumi ndi wulyanye vino calinji kwe Paulo. Nga cawa wo-o, tuzipizile twakwizuka ukuti cino cacindama asa vino tukumuwombela, lelo acino cikulenga twacita wowo. w24.03 27 ¶7, 9

Awasambilizi wasambililangako kwe vino Yesu wakunzile ukupepa. Wapepanga lyonsinye pano wawombanga umulimo wakwe. Nomba pa kuti acite wo-o, watantisile impindi ya kupepa, amuno ivya kucita vyamuvulilanga nkaninye. Wawanga nawantu awavule icakuti atasyalanga ni mpindi yakucitako vinji. (Mar. 6:​31, 45, 46) Lelo nanti ciwe wo-o, wasinincizyanga ukuti wasyako impindi ya kupepa. Ku cakulolelako, wanda wumwi walawizile umwa kwe pwi ukuya mu kupepa, lyo ali wenganye! Ne impindi yimwi wacesizye akupepa vye kwe Yehova, ukumulenga ukuti amwavwe ukupingulapo icete pa cintu icicindame cino walondanga ukucita. (Luk. 6:​12, 13) Ne uwusiku pano atani afwe, wapefile imiku imivule. Walenganga kwe Yisi ukuti amwavwe ukucita icintu cino calinji acitale pe vyonsinye. (Mat. 26:​39, 42, 44) Cino tukusambililako kwe Yesu acakuti, tuzipizile twasyako impindi yakupepa, asa mulandu nu kuti tuli ni vyakucita ivivule. Swinya ndi wulyanye vino Yesu wacitanga, impindi ya kupepa yizipizile ukuyiwela. Nga tukulonda tungasolapo ukuti twapepa umutondo tondo nanti tungapepa amanguzi, ukulingana na vino sweweneco twatantika. Nga twacita wo-o, tulilanjizya ukuti tukasalifya pe co-o icawila cino Yehova watupa. w23.05 3 ¶4-5

Lekani tulande pi zwi lya kuti “lwitilwa” Lino lili pi waliko. Ibuku limwi lino likalanda pa vya mu Baibolo lyalondolola ukuti “lwiza pe sweswe ngati akaluzi kano kakukonkoloka.” Lyo-o izwi likalanjizya vino Yehova wakunda awapakwe. Awapakwe nawonye wamanya ukuti “wakundwa nu Leza.” (Yud. 1) Umutumwa Yohani walanzile pe vino awapakwe wakayivwa pano walemvile ukuti: ‘Silolani vino Umukwasi watukunda! Ulukundo lwakwe lwakulisya achino tukakwitwa swewanakwe Leza.’ (1 Yoh. 3:1) Lelo nanti ciwe wo-o, e Yehova atakundavye awapakwe, lelo watukunda swensinye. Acani cino Yehova wacita pa kulanjizya ukuti watukunda? Watupa inzuwi. Inzuwi yawa acawila icikulu nkaninye cino Yehova watucitila co umuntu nanti wenganye atanga acicite!—Yoha. 3:16; Roma. 5:8. w24.01 28 ¶9-10

Yo-o vesi papela yalanda pe cino cavwizye e Davidi ukuleka ukwivwa intete, nanti acakuti pe yo-o impindi lyo uwumi wakwe wucili wuli mu wusanso. Yikatulanjizya ukuti e Davidi welenganyanga sana pe vino e Yehova walinji nu kumucitila. Wamanyile ukuti e Yehova walinji nu kumupususya pa mpindi injanane. Cinji acakuti, e Yehova walayile ukuti awino walinji nu kuwa amfumu ya wina Israel yino yalinji nu kukonkapo. (1 Sam. 16:​1, 13) E Davidi wasuwizile ukuti vyonsinye vino Yehova wamulayile vyalinji nu kuficiliswa. Avyani vino Yehova wamilaya? Kweni twamanya ukuti e Yehova atanga alesye intazi ukutuciticila. Lelo nanti ciwe wo-o, alifumyapo intazi zyonsinye zino tukapitamo pe yo-o impindi munsi mpya. (Ayize. 25:​7-9) E Kelewula witu wawa na maka yakuzyulupula awafwe, ukupozya awalwale, nu kufumyapo wonsinye wano wakatucuzya.—1 Yoh. 4:4. w24.01 6 ¶12-13

Mwakwelenganya pe cino calenzile muyipe nu kubatizwa. Mwacisile wo-o pamulandu wakuti mwalondanga ukuwa ku luwali lwa kwe Yehova. Cinji acakuti, mwakwelenganya sana pe cino calenzile musinincizye ukuti cino muzanile acili icisinka. Mwizile amumanya e Yehova nu kutalika ukumucindika ngati Amukwasi winu uwa kwi yulu. Isuwilo linu lizile aliwoma swinya mwatalisile ukuvwambisya ukulapila. Mwalesile ukucita iviwipe nu kutalika ukucita ivya kusecelesya Yehova. Asa vyo-o vitupu, mwivwile icete nkaninye ukumanya ukuti e Yehova amitetezile. (Amalu. 32:2) Ukulunda pa kwe vyo-o, mwatalisile ukulongana nu kunenako wanji pe vino mwasambilizile. Ne pe yo-o impindi pano mwayipa nu kubatizwa, mwatalika ukupita mu nzila yakuya ku wumi swinya mukawombesya ukufika pano papelezile amaka yinu ukutwalilila ukupita mwe yo-o inzila. (Mat. 7:​13, 14) Acino twalililani ukuwombesya ukucita ukulonda kwa kwe Yehova nu kwivwila amasundo yakwe. w23.07 17 ¶14; 19 ¶19

Ukwelenganya pe vino mwanenile e Yehova pano mwayipile kungamyavwa ukucimvya uwelezyo uwuli wonsinye wuno wungiza. Ku cakulolelako, mutanga mutalike ukulanjizya icintemwa kwe muka mweneco, amuno lyo mwanena kaali e Yehova ukuti mutanga mucite icintu camusango wo-o. Nga cakuti musakutwalilila ukwelenganya pa viwipe cilimipepucila ukucimvya uwelezyo pano wutani wukule. Nga mwacita wo-o, ‘muliwafuntuka kuwuwipe.” (Imilu. 4:​14, 15) Acino ukwelenganya pa cakulolelako ca kwe Yesu kungatwavwa. Amuno lyonsinye wacitanga ivyakusecelesya umukwasi wakwe. Nasweswenye ukukolanya e Yesu, tutazipizile ukucita vino vingalenga tufulwisye e Yehova. (Mat. 4:10; Yoha. 8:29) Vino mukacita nga cakuti mwawa ni ntazi nanti nga mwelezwa ukucita iciwipe, vingalanjizya nga cakuti mukalonda ukutwalilila ‘ukukonka’ Yesu. Swinya cingalenga musuwile ukuti e Yehova angamyavwa ukucita wo-o. w24.03 9-10 ¶8-10