Indwimbo zya Wufumu Zikatuwomya

E Paulo nu Sila walumbanyanga e Leza mu lwimbo pano walinji mu cifungo. (Imili. 16:25) Na mu myaka ya kanonzinye awanawitu wano wanyefilwe mu nkambi ya mu Sachsenhausen ku wuteko wa ci Nazi mu Germany wimbilanga indwimbo zya Wufumu na pano wasenzilwe mu wuzya ku Siberia. Ivyakulolelako vyo-o vikulanjizya vye vino indwimbo zingawomya awina Klistu pano wakupita mu ntazi.

Nombanye twandi tupocelele ulwimbo ulupya luno lukuti Muleimbila Yehova no kusekelela mu mvwango na zinji. Nga twiza twapocelela vye indwimbo impya, twize twapitulukamo sana pa mapepo ya lupwa pakuti tukazisunjile ku mutwe. (Efes. 5:19) Ndi twacita wo-o, pano twawa ni ntazi umuzimu uwutele wulitwavwa ukwizuka indwimbo. Indwimbo zya Wufumu zingatwavwa ukuwika amano pi suwilo litu. Zingatuwomya pano tukupita mu ntazi. Swinya nga tuli ni nsansa, amazwi amazima yano yawamo yakalenga “twakwimbila ni cimwemwe”. (1 Imila. 15:16; Amalu. 33:1-3) Acino lekani twize twelezye namaka yitu yonsinye ukumanya indwimbo zya Wufumu!

TAMBANI E VIDYO YAKUTI ULWIMBO LUNO LWAWOMIZYE WANO WANYEFILWE MU CIFUNGO. APANO MWASUKE AMAWUZYO YANO YAKONKAPO:

• Uzye acani cino calenzile ukuti Umwanawitu Frost apange ulwimbo?

• Uzye ulwimbo lwawomizye wuli awanawitu mu nkambi ya Sachsenhausen?

• Amwinye muno indwimbo zya Wufumu zingamiwomya cila wanda?

• Andwimbo ci zino mungatemwa ukuti mwakwizuka sana?