Awanawitu Wawili Wano Wasonsilwe Ukuwa mwi Wumba Lino Likatungulula
PE CITATU pa 18 January, 2023, pa jw.org palinji icakuwilizya iciyiwele ica kuti umwanawitu Gage Fleegle ne Jeffrey Winder wasonsilwe ukuwa mwi Wumba Lino Likatungulula ilya Nte zya kwe Yehova. Wa-a awanawitu wawombela e Yehova ni cisinka pa myaka imivule.
E Gage Fleegle nu muci e Nadia
Umwanawitu Fleegle wakulizile ku western Pennsylvania ku U.S.A. Swinya awakwasi wakwe awano wamusambilizizye icine. Pano walinji amulumendo, awakwasi wakwe wacintizile ku ncende yimwi kuno wakawizya wacepa. Swinya patazimvile nu kuzimba pa 20 November mu 1988 wizile abatizwa.
Awakwasi wa mwanawitu Fleegle, wamuwomelezyanga lyonsinye ukutalika ukuwomba umulimo wa mpindi zyonsi. Swinya witangako wakangalila wa miputule na wano wakawombela pa Bethel ku ng’anda. Wo-o vino wacitanga, calenzile umwanawitu Fleegle alola vino wa-a awanawitu na wankazi walinji ni nsansa pa mulandu wa kuwombela Yehova. Patazimvile ukufumilila pano wabatizizwe, pa 1 September, 1989 wizile atalika ukuwomba wu payiniya wa mpindi zyonsi. Swinya pansizi ya myaka vye yiwili, wizile aya mukuwombela pa Bethel ndi wulyanye vino wapanzile kaali lyo acili ali vye ni myaka 12. Acino mu October 1991, watalisile ukuwombela pa Bethel ya ku Brooklyn.
Umwanawitu Fleegle wawombezile kwe dipatimenti yino wakapulintilako amabuku pa myaka 8. Pa nsizi wizile awamutwala kwe Dipatimenti ya Mulimo. Swinya pe yilyanye impindi, wawomvileko ni myaka mitici kwi wungwe lino likawomvya ululimi lwa ci Russia. Mu 2006 watwazile e Nadia, swinya watalisile ukuwomba nawe pa Bethel. Wawomvile nawe mwi wungwe lino likawomvya ici Portuguese ne pa myaka ukucila 10 wawomvile mwi wungwe lino likawomvya ici Spanish. Pansizi yakuwomba imyaka imivule mwe Dipatimenti ya Mulimo, wizile awamupa ukuwomba mwe Komiti ya Kusambilizya na mukupita kwa mpindi, wizile atalika ukuwombela mwe Komiti ya Mulimo. Mu March 2022, wasonsilwe ukuwa we kavwa mwe Komiti ya Mulimo iyi Wumba Lino Likatungulula.
E Jeffrey Winder nu muci e Angela
Winji, amwanawitu e Winder wino wakulizile ku Murrieta mu California ku U.S.A. Awakwasi wakwe awano wamusambilizizye icine ukufuma kuwutici swinya wabatizizwe pa 29 March , 1986. Umwezi wuno wakonsilepo, watalisile wu payiniya wakwavwilizya. Wivwile icete nkaninye icakuti watwalilizile ukuwomba wo-o umulimo. Mukupita kwa mpindi, wizile atalika wu payiniya wa mpindi zyonsi pa 1 October, 1986.
Impindi yimwi lyo acili amulumendo, wizile aya mukutandalila wamukulu wakwe wawili awonsi wano wawombelanga pa Bethel. Ukutandala pa Bethel kwalenzile awavwambisya sana ukuti nawe ayize awombeko. Acino mu May 1990, wizile awamwita ukuya mukuwombela pa Bethel ku Wallkill.
Umwanawitu Winder wawombela ku ma dipatimenti amapusane pusane, ndi vino kwe Dipatimenti ya Wusaka, iya Wulimi, na mu Bethel Ofesi. Mu 1997 wizile atwala e Angela swinya watwalilila ukuwombela ponga pa Bethel. Mu 2014 wamutumile ku Warwick, mukwavwilizyako ukuzenga ama ofesi makulu. Ne mu 2016 wizile awaya mukuwombela ku Patterson, mwe dipatimenti yino wakakwita ukuti Audio/Video Services. Pa nsizi ya myaka 4, wamunyocezizye ku Warwick, kuno wayile atalika ukuwombela mwe Komiti Yino Yikasakamala Wano Wakawombela pa Bethel. Mu March 2022, wizile awamusonta ukuwa we kavwa wi Wumba Lino Likatungulula mwe yonye komiti.
Tukupepa ukuti e Yehova awapaala wa-a awonsi wano wawa ‘avyawila’ mu wantu, pano wakutwalilila ukuwomba umulimo wakulundulula ivya Wufumu.—Efes. 4:8.