Twalililani Ukuwa ni Suwilo Iliwome

1. Alisuwilo ci lino Yehova watupa?

E YEHOVA watupa isuwilo ilizima nkaninye. Wamwi wawa ni suwilo lya kwikala kwi yulu ngati avyelewulwa vya kumuzimu. (1 Kor. 15:50, 53) Ne wamwi wawa ni suwilo lyakwikala munsi umuyayaya nukuwa nuwumi uwupwililike ni nsansa. (Ukuwu. 21:3, 4) Isuwilo lino twakwata lyacindama nkaninye, asamulandu nampo nga alyakuya kwi yulu nanti alyakwikala monye munsi.

2. Uzye isuwilo litu lyeyamila pinye swinya amulandu ci wuno tungalandila wo-o?

² Izwi lyakuti “isuwilo” lino Baibolo yalandapo, tungalilondolola ukuti “akwenecela ukuti ivintu ivizima vilicitika.” Twamanya ukuti isuwilo litu ilyakuti ivintu vilizipa ku nkolelo lilificiliswa, amuno lyafuma kwe Yehova. (Roma. 15:13) Twamanya vino watulaya swinya twamanya nukuti akaficilisya vyonsinye vino walaya. (Impe. 23:19) Cinji acakuti twamanya ukuti e Yehova akavwambisya swinya wawa na maka yakuficilisya vyonsinye vino walanda ukuti alicita. Isuwilo litu liteyamila pevino tukakwelenganya nanti pevino tukalonda ukuti vize vicitike, lelo lyeyamila pevino twasuwila ukuti avya cisinka.

3. Avyani vino twandi tusambilile mwe co-o icipande? (Amalumbo 71:5)

³ Umukwasi witu uwa kwi yulu watukunda swinya akalonda ukuti tumusuwile. (Wazyani Amalumbo 71:5.) Nga cakuti twawa nisuwilo iliwome swinya twasuwila mwe Yehova, tuliwasipicizya intazi zino tukupitamo. Tutaliwatina intazi zino tungiza tupitemo ku nkolelo. Cinji acakuti tuliwasecelela. Twasambilila pevino isuwilo likatucinjilila. Nomba lekani tutalicile ukulanda pevino isuwilo lyawa ngati ananga navino lyawa ngati acisote ca musilika. Apano mukulecelezya twakwiza tulande pevyo tungacita pakuti tuwomye isuwilo litu.

ISUWILO LITU LYAWA NGATI ANANGA

4. Uzye isuwilo lyawa wuli ngati ananga? (Waheberi 6:19)

⁴ Mwe kalata yino umutumwa Paulo walembezile awaHeberi, wakolinye isuwilo ku nanga. (Wazyani Waheberi 6:19.) E Paulo wamanyile icete nkaninye vino inanga yikalenga uwato ukukana sendwa, amuno wapitanga paluzi imiku imivule. Impindi yimwi pano wakwezile mu wato, kwizile akukatuka icimuza icikulu nkaninye. Pano kwalinji co-o icimuza, waweni kuno wakapisya wawato wasenda inanga nukuzisumbila mu luzi pakuti uwato wutakasendwe nukuyumizya pa vimawe iviwipisye nkaninye. (Imili. 27:29, 39-41) Ndi wulyanye vino inanga yikalenga uwuto ukukana sendwa, isuwilo litu likatwavwa ukupalamila kwe Yehova pakuti tutakasendwe ku ntazi zino zyawa ngati acimuza icikulu. Likatwavwa ukuteka umwezo pano tukupita mu ntazi, amuno tukamanya ukuti ivintu vyandi viwe icetenye. Mwakwizuka ukuti e Yesu watusosile ukuti waliwatucuzya. (Yoha. 15:20) Fwandi ukwelenganya pa malayo ya kunkolelo kukatwavwa ukutwalilila ukuwombela Yehova.

5. Uzye isuwilo lyawomizye wuli e Yesu pano walinji mupipi nukufwa?

⁵ Lekani tulande pevino isuwilo lyavwizye e Yesu ukutwalilila ukuwa uwa cisinka nanti acakuti wamanyile ukuti walinji nukufwa imfwa imbipe. Pa wanda wa Pentecositi 33 C.E., umutumwa Peter walanzile pa wusesemo wuno wawa pa Amalumbo wuno wukalanjizya icete cete vino e Yesu watesile umwezo navino walinji ni suwilo. Watili: ‘Ndiwapuza nisuwilo lyakulolela amuno utalisya umuwili wane kumbo. Utalileka umuwomvi wako uwacisinka ayize alowe. Pano wiza wiza ulinjizuka nicimwemwe.’ (Imili. 2:25-28; Amalu. 16:8-11) Nanti acakuti e Yesu wamanyile ukuti walinji nukufwa, wasuwizile ukuti e Yehova walinji nukumuzyulupula swinya walinji nukusecelela ukuwa ponga numukwasi wakwe uwa kwiyulu na swinya.​—Hebe. 12:2, 3

6. Avyani vino umwanawitu wumwi walanzile pi suwilo?

⁶ Isuwilo lino awanawitu na wankazi awavule wakwata, lyawavwa ukusipicizya intazi. Lekani tulandeko pa cakulolelako ca mwanawitu e Leonard Chinn wino akakwikala ku England wino walanjizizye vino wawa ni suwilo. Pano kwalinji Inkondo Yakutalicila iya nsi Yonsi, we-e umwanawitu wamunyefile pamulandu wakuti wakanile ukwinjila uwusilika. Pa myezi yiwili wizile awa musunjila mu kamuputule akatici apano wiza wamupingula nukumupa imilimo imiwome. Walanzile ukuti. “Vino napisilemo vyanjavwizye ukwiluka ukuti tuzipizile ukuwa nisuwilo pakuti lyatwavwa ukusipicizya. Twakwata ivya kulolelako ivivule ponga ngati we Yesu, awatumwa na kasesema. Swinya twakwata na malayo amazima aya mu Baibolo. Vyonsinye vyo-o vikalenga twawa ni suwilo lya kunkolelo nukutwavwa ukusipicizya.” Isuwilo lyalinji ngati ananga kwe Leonard, nasweswenye avino lingawa.

7. Uzye intazi zikawomya wuli isuwilo litu? (Waroma 5:3-5; Jemusi 1:12)

⁷ Nga cakuti twasipicizya intazi nukulola vino Yehova watwavwa, tukasinincizya ukuti watukunda, na co-o cikalenga isuwilo litu ukuwomelako. (Wazyani Waroma 5:3-5; Jemusi 1:12.) Fwandi isuwilo litu lyawomelako pe yo-o impindi ukucila vino lyalinji pano twatalisile vye ukusambilila Baibolo. Nomba e Satana akalonda intazi zino tukapitamo ukutonsya isuwilo litu, lelo e Yehova nga watwavwa tungazicimvya zyonsinye.

ISUWILO LITU LYAWA NGATI ACISOTE CA MUSILIKA

8. Uzye isuwilo lyawa wuli ngati acisote ca musilika? (1 Watesalonika 5:8)

⁸ Cinji cino Baibolo yakolanyako isuwilo, acisote ca musilika. (Wazyani 1 Watesalonika 5:8.) Umusilika akazwala icisote cakumucinjilila pakuti imivwi yino awalwani wakwe wakusumba yitakamulase ku mutwe. Nasweswenye mu wulwi witu uwa kumuzimu, tuzipizile ukucinjilila amelenganyo yitu kuviteyo vya kwe Satana. Akawomvya amelezyo ni vintu ivilekane lekane pakuti ayononye amelenganyo yitu. Ngati awulyanye vino icisote cikacinjilila umutwe wa musilika, avino nisuwilo likacinjilila amelenganyo yitu pakuti tutwalilile ukuwa awa cisinka kwe Yehova.

9. Avyani vino vikacitika nga cakuti umuntu atakweti isuwilo?

⁹ Isuwilo lyakuwa nuwumi wamuyayaya ku nkolelo lilitwavwa ukucita ivintu na mano nukwiluka. Lelo nga cakuti isuwilo litu lyatonta swinya twatalika nukucita ivintu ukulingana navino sweweneco tukulonda, tungiwilila kwi suwilo lino twawa nalyo ilyakuti tuliwa nuwumi wamuyayaya. Lekani tulandeko pe vimwi vino vyacitisile ku wina Klistu wa ku kaali wamwi wano wikalanga mu Korinti. Walesile ukusuwila mu wulayo wa kwe Leza uwucindame nkaninye uwakuti kuliwa ukuzyulupuka. (1 Kor. 15:12) E Paulo wawomelezizye wa-a awina Klistu ukuti wano watazumila mukuzyulupuka wakakwikala vye ukulingana navino aweneco wakulonda. (1 Kor. 15:32) Napeyonye impindi awavule wano watazumila mu malayo ya kwe Yehova, wakacita ivili vyonsinye vino aweneco wakulola ukuti vingawaletela insansa. Lelo sweswe twapusanako na wa-a awantu, amuno twasuwila mu malayo ya kwe Yehova aya ku nkolelo. Isuwilo litu lyawa ngati acisote ca musilika, likacinjilila amelenganyo yitu nukutwavwa ukukanacita ivintu vino sweweneco tukulonda vino vingonona na wuciwuza witu ne Yehova.​—1 Kor. 15:33, 34.

10. Uzye isuwilo lingamyavwa wuli ukuleka ukwelenganya ivya wufi?

¹⁰ Isuwilo lingatucinjilila na kukukana yelenganya ukuti tutalitela tusecelesyepo e Yehova. Ku cakulolelako, wamwi wangakwelenganya ukuti: ‘Ntalitela mbepo pewano waIiwa nuwumi wamuyayaya. Ntayana ukuwa penepo. Ntalikumanisya ukukonka amasundo ya kwe Yehova.’ Mwakwizuka ukuti amazwi amakolaneko na ya-a, ayano ne Elifazi e kasansamusya wa wufi walanzile pano wasansamusyanga e Job. Walanzile ukuti: “Uzye kungawa umuntu wino angawa umutele-mpe?” Walanzile nukuti: ‘Ngavyo Leza atasuwila nawangeli wakwenye ni yulunye lisilolekapo ilitele muminso yakwe.’ (Job 15:14, 15) Vino walanzile walinji awufi uwutifi! Mwakwizuka ukuti wino akalonda mwakwelenganya vyo-o we Satana. Wamanya ukuti nga mwatwalilila ukwelenganya wo-o mulileka ukuwa ni suwilo. Acino mwakana wo-o uwufi nukuwikavye amano ku malayo ya kwe Yehova. Mutavwilika nanti katicinye ukuti e Yehova akalonda mwize muwe nuwumi wa muyayaya swinya alimyavwa ukucita wo-o.​—1 Tim. 2:3, 4.

TWALILILANI UKUWA NI SUWILO ILIWOME

11. Amulandu ci wuno tuzipizile ukuwela awatekanye pano tukulindilila ukuti e Yehova aficilisye vino watulaya?

¹¹ Asa welyonsi pano cikapepuka ukuwa ni suwilo iliwome. Manda yamwi tungapotwa ukutekanya pano tukulindilila ukuti e Yehova ayize aficilisye vino watulaya. Nomba pamulandu wakuti e Yehova akuno wawa ukufuma umuyayaya ukuya umuyayaya, impindi yino sweswe tukalola ukuti ayitali kweweliwe ayifupinye. (2 Pet. 3:8, 9) Alificilisya vyonsinye vino watulaya mu nzila iyizima, lelo atalificilisya pampindi yino sweswe tukwenecela ukuti aficilisizyepo. Acani cino cingatwavwa ukutwalilila ukuwa ni suwilo iliwome pano tukulindilila ukuti e Yehova aficilisye vino watulaya?​—Jemu. 5:7, 8.

12. Ukulingana na Waheberi 11:1, 6, uzye ukulolela kwalemenkana wuli ni suwilo?

¹² Tulitwalilila ukuwa nisuwilo iliwome nga cakuti twapalamila sana kwe Yehova wino alificilisya vyonsinye vino watulaya. Ukulolela kwacindama nkaninye pakusuwila ukuti e Yehova akuno wawa nukuti “akulambulanga wensi wino akumuvwamba.” (Wazyani Waheberi 11:1, 6.) Nga cakuti twazumila ukuti e Yehova akuno wawa apano cilitupepucila ukusuwila ukuti alificilisya vyonsinye vino watulaya. Lekani tulande panzila zimwi zino zingatwavwa ukupalamila kwe Yehova nu kutwalilila ukuwa nisuwilo iliwome.

13. Tungapalamila wuli kwe Yehova?

¹³ Mwapepa kwe Yehova nukuwazya Baibolo. Nanti acakuti tutanga tulole e Yehova, tungapalamila kwe weliwe. Tungalanda nawe mwi pepo nukusuwila ukuti wandi atwivwe. (Jere. 29:11, 12) Tungateyelezya kwe Yehova nga cakuti tukuwazya Baibolo nukwelenganyapo. Nga tukuwazya pevino e Yehova wasakamalanga awantu wakwe awa cisinka ku nsizi, isuwilo litu liliwawomelako. Amuno vyonsinye vino vyawa mwizwi lya kwe Leza “vyawalisilwe kukutusambilizya sweswe, alyakuti tuwalolela nuwuchimyamya mbali ninsimpo zino Amawaliko Matele yatupa.”​—Roma. 15:4.

14. Amulandu ci wuno tuzipizile ukwelenganizizya pe vino Yehova wacitizile wanji?

¹⁴ Mwakwelenganya pevino Yehova akaficilisya vino walaya. Katulande pevino Yehova wacisile kwe Abrahamu ne Sara. Wafisile pa cimo cino watanga wakwete awana. Lelo e Yehova wawalayile ukuti walikwata umwana. (Inta. 18:10) Uzye e Abrahamu wacisile wuli pano wawalayile vye ukuti walikwata umwana? E Baibolo yikalanda ukuti: “Abrahamu walemasyanga isuwilo . . . Achaleka wawa amukwasi wamyiko mivule.” (Roma. 4:18) Nanti acakuti e Abrahamu atamanyile inzila yino Yehova walinji nukuwomvya pakuficilisya vino wamulayile, wasuwizile ukuti e Yehova alificilisya vino wamulayile. We-e umonsi wisuwilo atafupusile. (Roma. 4:19-21) Amalyasi ya musango wo-o yakatusambilizya ukuti lyonsinye tungasuwila mwe Yehova ukuti alificilisya vino watulaya nanti acakuti sweswe tukulola ngati vitanga vicitike.

15. Amulandu ci wuno muzipizile ukwelenganizizya pe vino Yehova wamicitila?

¹⁵ Mwakwelenganya pe vino Yehova wamicitila. Teyelenganyani pa malayo ya mu Baibolo yano mwalola ukuti yaficiliswa mu wumi winu. Ku cakulolelako, e Yesu wamilaya ukuti Umukwasi wakwe uwa kwi yulu aliwamipa vyonsinye vino mukulonda mu wumi. (Mat. 6:32, 33) Swinya walanzile nukuti e Yehova aliwamipa nu muzimu wutele nga cakuti mwamulenga. (Luk. 11:13) E Yehova atapotwapo ukuficilisya vyonsinye vyo-o vino wamilaya. Ukwasowa nukuvwilika, mungelenganya na pamalayo nayanji yano wamilayile pa lwinu swinya yano waficilisya. Ku cakulolelako, wamilayile ukuti wandi awamitetela, ukumisansamusya nukumipa ivyakuwomya wuciwuza winu na weliwe. (Mat. 6:14; 24:45; 2 Kor. 1:3) Nga cakuti mukwelenganya pe vino Yehova wamicitila pe yo-o impindi, mulisuwila ukuti alificilisya vyonsinye vino wamilaya ku nkolelo.

UKUSECELELA MWI SUWILO

16. Amulandu ci wuno isuwilo lyawela acawila icizima nkaninye?

¹⁶ Isuwilo lya kuwa nu wumi wamuyayaya kunkolelo, lyawa acawila icizima nkaninye ukufuma kwe Yehova. Tukavwambisya sana ukwiza mukulolako pano ivintu vilizipa kunkolelo vino twasuwila ukuti vilicitika. Isuwilo lino twawa nalyo lyawa ngati ananga, likatwavwa ukusipicizya pano tukupita mu ntazi, po wakutucuzya nanti pano twasunkanya imfwa. Swinya lyawa ngati acisote ca musilika, likacinjilila amelenganyo yitu pakuti tutacita iviwipe lelo twacita ivizima. Lyo-o isuwilo lya mu Baibolo lino twawa nalyo likatwavwa ukumanya icete cete e Yehova swinya likatulanjizya navino watukunda. Tukazanamo ivizima ivivule nga cakuti twatwalilila ukuwa nisuwilo iliwome.

17. Amulandu ci wuno isuwilo likalenga twasecelela?

¹⁷ Umutumwa Paulo wawomelezizye awina Roma mwe kalata yino wawalembezile ukuti “lekani isuwilo linu liwawapa ukusansamuka.” (Roma. 12:12) E Paulo walinji nukuwaseselela amuno wamanyile ukuti nga watwalilila ukuwa uwa cisinka apano angize awe nu wumi wamuyayaya kwi yulu. Nasweswenye tungasecelela mwi suwilo amuno twamanya ukuti e Yehova alificilisya vino watulaya. E kimbila wilumbo wumwi walemvile ukuti, ‘awalongo wino . . . wasuwila mwe Yehova e Leza wakwe, . . . Wino akasunga ilayilizyo lyakwe penye.’​—Amalu. 146:5, 6.