Mwacindama Nkaninye kwe Yehova

1-2. Avyani vino vingatwavwa ukusinincizya ukuti twacindama nkaninye kwe Yehova?

AWAWOMVI wa kwe Yehova wacindama nkaninye kwe Yesu na kwe weliwe. Lelo wamwi wakalola ukuti e Yehova atawakunda. Nce mpamwi cino cingalenga apa mulandu wa kuti kuli wamwi wano wacitanga vino vyalanjizyanga ukuti watacindama. Uzye ivya musango wo-o vyamiciticilapo? Nga vyamiciticipo, lyo avyani vino vingamyavwa ukusincizya ukuti e Yehova wamikunda?

² Conga cino cingamyavwa akuwawazya pa ma lyasi ya mu Baibolo yano yakalanda pe vino e Yehova akalonda awantu watulola. E Yesu wacindisile awantu swinya walinji ni cikuku kwe woliwo. Wo-o vino wacitanga, walanjizizye ukuti wonsinye wano wayilolanga ukuti watacindama, wacindama kwe weliwe na ku mukwasi wakwe e Yehova. (Yoha. 5:19; Hebe. 1:3) Mwe co-o icipande twandi tusambilile pe vino: (1) e Yesu wavwizye awantu ukulola ukuti wacindama kwe Yehova na (2)  vino tungasinincizya ukuti twacindama nkaninye kwe Yehova.​—Haga. 2:7.

VINO E YESU WAVWIZYE AWANTU UKUTALIKA UKUYILOLA UKUTI WACINDAMA

3. Uzye e Yesu walanjizizye wuli icikuku ku wantu wa mu Galili wano wizanga kwe weliwe ukuti awavwe?

³ Pano e Yesu wawizyanga mu Galili, awantu awavule wizanga kwe weliwe mukuteyelezya nu kuti awapozye. Watili, ‘watamikanga nukululumba, ngati ang’onzi zino zisi numuchemi.’ (Mat. 9:36.) Intunguluzi zya simapepo zyawa lolanga ukuti awantu wapansi, icakuti wawitanga nu kuti awantu “watipwe.” (Yoha. 7:47-49) Lelo e Yesu weni walinji ni cikuku kwe woliwo swinya wa walolanga ukuti wacindime ukupitila mukuwasambilizya nu kuwapozya. (Mat. 9:35) Ukulunda pe co-o, pakuti ayavwe awavule, wasambilizizye awatumwa wakwe ivyakulawomba umulimo wakuwizya nu kuwapa amaka yakupozya awalwale.​—Mat. 10:5-8.

4. Avyani vino mwasambililako kwe vino e Yesu walanjizizye icikuku kwe wano walondanga ukusambilila kwe weliwe?

⁴ E Yesu walanjizizye vino weliwe nu mukwasi wakwe wakalola wano wakayilola ukuti awapansi, ukupitila mukuwalanjizya icikuku nu kuti wacindama. Nga cakuti mukawombela e Yehova nomba mukavwilika nga cakuti wamikunda, mwakwelenganya pe vino e Yesu walanjizizye icikuku kwe wano walondanga ukusambilila pe weliwe. Nga mukucita wo-o cingamyavwa ukulola vino mwacindama kwe Yehova.

5. Avyani vino mwasambililako kwe vino e Yesu walanjizizye icikuku kwe wano walondanga ukusambilila kwe weliwe?

⁵ E Yesu atasambilizyangavye iwumba lya wantu, lelo wawikanga amano na ku muntu wenga na wenga. Kucakulolelako, pano wawizyanga mu Galili mwalinji umwanaci wino waculanga kundwala ya kufuma uwazi pa myaka 12. (Mar. 5:25) Ukulingana ni sundo walinji amukombele swinya wensinye wino wamulemamo walinji nu kukombela. Acino atalinji nu kuwawa ponga na wantu. Ukulunda pe co-o atalinji nu kuwalongana ponga na wanji pitempile nanti ukuzanwa ku muteweto. (Lev. 15:19, 25) Ukwasowa nu kuvwilika we-e umwanaci atapelezilevye pa kulwala lelo wayilolanga nu kuti atacindama.​—Mar. 5:26.

6. Avyani vino umwanaci wacisile pa kuti apole?

⁶ We-e umwanaci wino waculanga nkaninye walondanga ukuti e Yesu amupozye, lelo atamulenzile. Amulandu ci? Nce mpamwi wayilolanga ukuti wasulwa pa mulandu ni ndwala yino walwile. Nanti nce mpamwi watinanga ukuti e Yesu andi akane, pa mulandu wakuti wayile pi wumba lyo amukombele. Acino walemile ku cakuzwala cakwe, amuno wasuwizile ukuti nga walemakovye, walinji nu kupola. (Mar. 5:27, 28) Isuwilo lyakwe lyamupozizye. E Yesu wakolowozizye wino wamukumizye. Apano we-e umwanaci wasokolozile ukuti weliwe. Uzye e Yesu wacisile wuli?

7. Avyani vino e Yesu wacisile ku mwanaci wino waculanga nkaninye? (Marko 5:34)

⁷ Vino e Yesu wacisile vyalanjizizye ukuti walinji ni nkumbu kwe we-e umwanaci swinya wacindime. E Yesu waweni ukuti we-e umwanaci ‘wazakazanga swinya walinji nintete.’ (Mar. 5:33) Wamulanjizizye inkumbu swinya wamuwomelezizye. Wamwisile nu kuti “Mwanane.” Wo-o vino e Yesu wawomvizye lyo-o izwi, atamulanjizizyevye ukuti wacindime, lelo wamulanjizizye inkumbu nu lukundo. (Wazyani Marko 5:34.) Yo-o ayili impindivye mu Baibolo pano Yesu wisile umwanaci ukuti “mwanane.” Wawomvizye lyo izwi lya cikuku amuno we-e umwanaci wivwile intete nkaninye. We umwanaci afwile wivwile icete nkaninye. Wanga e Yesu atalanda ya-a amazwi ya kuwomelezya, we-e umwanaci nga wapisile lyo apozile lelo e kampingu nga yasyazile ikumucuzya pe wo-o vino wayile pi wumba nu kulema ku cizwalo ca kwe Yesu lyo amukombele. Lelo Yesu wamwavwizye ukuwayilola ukuti wacindama nkaninye kwe Yehova.

8. Antazi ci zino e nkazi wa ku Brazil walinji nazyo?

⁸ Na mweyanye amanda, awawomvi wa kwe Yehova wakalwala indwala zino zikalenga wasakamikwa nu kuyilola ukuti watacindama.E Maria,a e payiniya wa ku Brazil wakwasilwe amulemale. Atakweti amanama ni kasa lya kwe kamani. Watili: “wansekanga pamulandu na wo-o vino nalinji. Watalisile nu kumbuntulila amazina. Mpindi zimwi na wa lupwa lwanenye walandanga nu kucita vino vyalenganga nayilola ukuti ntacindama.”

9. Avyani vino vyavwizye e Maria ukumanya ukuti wacindama kwe Yehova?

⁹ Avyani vino vyavwizye e Maria? Pano wizile awa Inte ya kwe Yehova, awanawitu na wankazi wamuwomelezyanga nu kumwavwa ukuti ayilola ndi vino e Yehova akamulola. Watili: “Ntange nkumanisye ukulumbula wonsinye wano wanjavwa. Acino nkasalifya nkaninye e Yehova pa kumbika mu lupwa lwa wanawitu na wankazi.” Wa-a awanawitu na wankazi wavwizye e Maria ukumanya ukuti wacindama kwe Yehova.

10. Antazi ci zino e Mariya uwa ku Magadala wakweti? (Lolani ni vikope.)

¹⁰ Lekani tulande pe winji wino e Yesu wavwizye, e Mariya uwa ku Magadala. Walinji ni mizimu miwipe 7! (Luka 8:2) Imizimu miwipe yalenzile acita ivintu munzila iyipusaneko yino yalenzile awantu wamutaluke. Waculanga nkaninye, afwile wivwanga intete swinya afwile walolanga ukuti pasi wino wamukunda na wino angamwavwa. E Yesu wawinzile imizimu miwipe yino walinji nayo, swinya wizile awa amusambi wakwe.

11. Uzye e Yesu wavwizye wuli e Mariya uwa ku Magadala ukumanya ukuti wacindime kwe Yehova? (Lolani ni vikope.)

¹¹ Anzila ci na yinji yino e Yesu wavwizye e Mariya uwa ku Magadala ukumanya ukuti wacindama kwe Yehova? E Yesu wapile e Mariya uwa ku Magadala ulongo ulwakuwomba nawe mu mulimo wakuwizya mu twaya utupusane pusane.b Nacino cafumilemo acakuti, watwalilizile ukuteyelezya vino e Yesu wasambilizyanga wanji. Swinya e Yesu walolecezile kwe weliwe uwanda wuno wazyulupusile. Walinji pa wasambi wakutalicila wano e Yesu walanzile nawo pewowo uwanda. E Yesu wamupile nu mulimo wakumanyisya awatumwa wakwe ukuti azyulupusile. Mwe vyonsinye vyo-o, e Yesu wamwavwizye ukumanya ukuti wacindama kwe Yehova.​—Yoha. 20:11-18.

12. Avyani vino vyalenzile e Lidia ayilola ukuti atacindama?

¹² Ndi vino calinji kwe Mariya uwa ku Magadala, namwe yanye amanda awantu wakayilola ukuti watacindama. E nkazi Lidia uwaku Spain walanzile ukuti, pano atani akwatwe e mama wakwe welenganyanga pa kuponya uwula. E Lidia walanzile nu kuti, pano wacilinji amutici akakwizuka vino e mama wakwe atamuwikangako amano. Swinya walandanga amazwi amawipe yano yalenzile ayivwa uwuwi. Watili: “Pamulandu wakuti e mama atalanjizyanga ukuti wankunda, nalondesyanga ukuti awantu wanji wankunde swinya wawe iviwuza vyane. Natinanga ukuti pasi wino alitela ankundepo amuno e mama walenzile nayilola ukuti ne muntu umuwipe.”

13. Avyani vino vyavwizye Lidia ukutalika ukuyilola ukuti wacindama kwe Yehova?

¹³ Pano e Lidia wasambilizile icine ivintu vyapilusile. Ipepo, ukuyisambilizya Baibolo nga na mazwi ya cikuku yano awanawitu na wankazi wamunenanga, vyamwavwizye ukutalika ukulola ukuti wacindama kwe Yehova. Walanzile ukuti: “Lyonsinye e wakwane akalanda pa miwele mizima yino nawa nayo. Wonye avino ni viwuza vyane vikacita.” Ndi wulyanye vino calinji kwe Lidia, nce mpamwi mwi wungwe mwawa wano wakalondekwa ukuwavwa ukusinincizya ukuti wacindama kwe Yehova swinya mungawavwa ukupitila mukuwa ni cikuku pano mukulanda nawo namwe vino mukucita.

VINO TUNGACITA PA KUTI TWAYILOLA NDI VINO YEHOVA AKATULOLA

14. Uzye iwaliko lya kwe 1 Samueli 16:7 likatwavwa wuli ukuwayilola ndi vino e Yehova akalola awantu? (Lolani na kambokosi ka kuti “Amulandu ci wuno e Yehova akalola awantu ukuti wacindama?”)

¹⁴ Muwakwizuka ukuti e Yehova asimilola ndi vino awantu wa mwe yo-o insi wakamilola. (Wazyani 1 Samueli 16:7.) Awantu awavule awa mwe yo-o insi, wakalola awantu ukuti wacindama ukulingana na vino wakaloleka, indalama zino wawa nazyo nga na masambililo. (Ayize. 55:8, 9) Acino mwayilola ndi vino e Yehova akamilola asa vino awantu wa mwe yo-o insi wakacita. E Baibolo yalandako pa wantu wamwi wano mpindi zimwi wayivwanga ukuti watacindama ponga ngati we Eliya, Naomi ne Hana. Pano mukuwazya pe ya-a amalyasi mwawika amano kwe vino e Yehova wawakunzile. Cinji mwalembako vino vyamiciticila mu wumi vino vikalanjizya ukuti e Yehova wamikunda swinya mwacindama kwe weliwe. Nga swinya mungawazya ama lyasi yano yakalanda pe lyo-o ilyasi mu ma buku yitu.c

15. Amulandu ci wuno e Yehova wanenezile e Daniel ukuti “Wakundikwa nkaninye”? (Daniel 9:23)

¹⁵ Lyonsinye mwakwizuka ukuti pa mulandu wakuti mwawa na wucisinka mwacindama kwe Yehova. Kwalinji impindi yimwi pano e kasesema Daniel atalinji na ‘maka’ swinya wafupusile. Pe yoyo impindi lyo ali ni myaka mu ma 90. (Dan. 9:20, 21) Uzye e Yehova wamuwomelezizye wuli? E Yehova watumile umungeli e Gabriel mukunena e Daniel ukuti “Wakundikwa nkaninye” swinya wateyelezizye amapepo yano wapefile. (Wazyani Daniel 9:23.) Acani cino calenzile e Yehova akunde nkaninye e Daniel? Amuno wakunzile nkaninye uwulungamane na wucisinka. (Ezek. 14:14) E Yehova walenzile vyo-o ukulembwa pa kuti twasambililako. (Roma. 15:4) E Yehova akateyelezya na ku mapepo yinu swinya mwacindama nkaninye amuno mukacita ivizima swinya mukamuwombela mu wucisinka.​—Mika 6:8;Hebe. 6:10.

16. Avyani vino vingamyavwa ukuwalola Yehova ukuti Amukwasi wa lukundo?

¹⁶ Mwalola e Yehova ukuti Amukwasi wino wamikunda. Akalonda ukumyavwa asakuvwamba iviluwo mwe mwemwe. (Amalu. 130:3; Mat. 7:11; Luk. 12:6, 7) Ukwelenganya pe co-o, kukakwavwa awavule wano wakayilola ukuti watacindama. Kucakulolelako lekani tulande pe nkazi e Michelle, uwa ku Spain wino wayivwanga ukuti atakundikwa swinya atacindama pa mulandu wakuti e wakwakwe wamunenanga amazwi amawipe. Walanzile ukuti, “Nga nayivwa ukuti pasi vino nawa nkakwelenganya ukuti e Yehova ambisile mu mapa yakwe, ne mucinjililwe swinya akundanjizya ulukundo.” (Amalu. 28:9) E nkazi e Lauren, uwa ku South Africa, akakwizuka ukuti, “Wo-o vino e Yehova wampalamika kwe weliwe, wanjavwa ukutwalilila ukuwa e ciwuza wane pa myaka yonsinye yo-o, swinya wo-o vino wambomvya ukusambilizyako wanji, calenga nsinincizye ukuti nacindama kwe weliwe.”​—Hos. 11:4.

17. Avyani vino vingamyavwa ukusinincizya ukuti e Yehova wamikunda? (Amalumbo 5:12) (Lolani ni cikope.)

¹⁷ Sinincizyani ukuti e Yehova wamikunda. (Wazyani Amalumbo 5:12.) E Devedi walanzile ukuti e Yehova wakunda awantu awalungamane swinya akawacinjilila ndi vino ‘inkwela’ ikacinjilila. Ukumanya ukuti e Yehova wamikunda swinya akamitunjilila, kungalenga mutayilola ukuti mutacindama. Mungamanya wuli ukuti e Yehova wamikunda? Watupa e Baibolo muno tukazana vino akayivwa pe sweswe. Cinji aca kuti, akawomvya wa eluda, iviwuza ivipalamisye apano na wanji ukumizusyako ukuti mwacindama kwe Yehova. Nomba avyani vino mungacita nga cakuti wamwi waminena ukuti mwacindama kwe Yehova?

18. Amulandu ci wuno muzipizile ukusuwila nga ca kuti wamwi waminena amazwi amazima?

¹⁸ Nga cakuti wamwi wakulanda ivizima pe mwemwe, mutalola ukuti wakuwipavye. Mwakwizuka ukuti e Yehova angawawomvya ukumyavwa ukumanya ukuti wamikunda.E Michelle, wino tulanzilepo kali watili: “Katici katici nkaya nkasamabilila ivya kusuwila ukuti, vino wanji wakunena avya cisinka. Kweni cikambomela ukusuwila, lelo namanya ukuti avino e Yehova akalonda nacita.” Wa eluda nawonye wamwavwa ukuwalola ukuti wacindama nkaninye kwe Yehova. Akawomba wupayiniya swinya akakwavwilizyako pa Bethel.

19. Acani cino cingalenga musinincizye ukuti mwacindama kwe Yehova?

¹⁹ E Yesu watwizusizye ukuti twacindama nkaninye ku Mukwasi witu uwa kwi yulu. (Luk. 12:24) Acino tungasinincizya ukuti e Yehova akatulola ukuti twacindama. Tutazipizile ukwiwilila co-o icisinka. Swinya lekani tutwalilile ukuwakwavwa wanji ukuwayilola ukuti wacindama kwe Yehova.