Zifyaniko Ivya Kuwomba Umulimo wa Kuwizya—Mwawomvya Icete Amawuzyo

CINO KWACINDAMILA: Nga cakuti “amelenganyo ya mu mwezo wa muntu yawa ngati aminzi mu cifula icizike,” lyo fwandi amawuzyo yawa ngati acakusembela aminzi mu cifula. (Imilu. 20:5) Amawuzyo yakalenga wino tukulanzyanya nawe awalandapo. Ndi tukuwuzya amawuzyo amazima, ciliwatwavwa ukumanya vino umuntu akwelenganya. E Yesu wawomvyanga icete sana amawuzyo. Uzye tungamukolanya wuli?

IVYA KUCITA:

• Mwawuzya amawuzyo yano yangalenga walande vino wakwelenganya. E Yesu wawuzyanga awasambilizi wakwe amawuzyo amalekanelekane pa kumanya vino wakwelenganya. (Mat. 16:13-16; be-CW 238 amapara. 3-5) Amawuzyo ci yamwi yano mungawuzya?

• Mwawuzya amawuzyo yano yangalenga aweneco wayizanile icasuko. E Yesu pa kulunjika Peter, wamuwuzizye amawuzyo yano yalenzile e Peter ayizanile icasuko. (Mat. 17:24-26) Amawuzyo ci yamwi yano mungawuzya umuntu pa kuti umweneco ayizanile icasuko?

• Mwawasalifya. Pano Yesu waweni ukuti e kalemba “wasuka na mano” wa musalifizye. (Mar. 12:34) Uzye mungasalifya wuli umuntu wino wasuka iwuzyo lino muwuzizye?

TAMBANI ULUWALI LWA KUTALICILA MWE VIDYO YA KUTI MWAWOMBA UMULIMO WUNO YESU WAWOMVILE—MWASAMBILIZYA, APANO MWASUKE AMAWUZYO YANO YAKONKAPO:

• Cingatenga uwulondolozi wuli icete, amulandu ci wuno tungalandila ukuti yo-o asa misambilizizye mizima?

• Amulandu ci wuno tutazipizile ukupelela vye pa kulondolola ivyewo?

TAMBANI ULUWALI LWA CITI WILI ULWE VIDYO, APANO MWASUKE AMAWUZYO YANO YAKONKAPO:

• Uzye umwanawitu te wawomvya wuli icete amawuzyo?

• Avyani vinji vino mungasambililako ku misambilizizye yakwe?