Ukulanda Ivivwike

1 Wakorinte 14:9

IVISINKA VYA KWIZUKA: Yavwani iwumba ukwivwicisya cino mukulandapo.

IVYA KUCITA:

• Yivwicisyani ilyasi linu. Mufwile ukwivwicisya ilyasi linu nu kulilanda mu mazwi yinu mu nzila impepuke.

• Womvyani amazwi amapepuke ukwivwa. Cingatenga citawipa ukulanda ivitali, muzipizile ukulanda ivisinka mu mazwi amapepuke yano awantu wangivwa zuwa.

• Londololani amazwi amawome. Mutawomvya amazwi amawome yano yatamanyikwa kwi wumba. Nga ca kuti capinda ukuti muwomvye izwi lino litamanyikwa, nanti umuntu wa mu Baibolo, nanti vino wapimilangako kali nanti intambi, muzipizile ukulondolola icete pa kuti vivwike.