Vino Vyacitisile

Ukulanjizya Inkumbu kwe Wonsinye

Wanda wumwi e nkazi uwa ku New Zealand watamvile e vidyo yino yalandanga pe vino Yehova akakwivwila wanji inkumbu na vino akazilanjizya. (Ayize. 63:​7-9) Walile watamba, wasozilepo ukulola inzila zino angawomvezyamo vino wasambilizile. Pe wulyanye uwanda pano wayanga mukukala ivyakuwomvya pa ng’anda, wasunkinye umwanaci wumwi wino atakweti umwakwikala swinya wamukolowozizye nga cakuti angakunda ukumukalilako ivya kulya. We-e umwanaci wazumizile. Pano e nkazi waletezile we-e umwanaci ivya kulya, wawomvizye lonye ulongo pakulanzyanya nawe iwuzyo lya pe trakiti yakuti Uzye Uwuyimvi Wulitela Wusile?

We-e umwanaci wizile atalika ukulila. Walondolozile ukuti awakwasi wakwe walinji awa Nte swinya wamusambilizizye ni cine, lelo atalundulukanga icakuti wizile aleka nu kulongana. Nomba wapepanga kwe Yehova ukuti amwavwe atalike ukulongana na swinya. Acino e nkazi wamupile e Baibolo nu kulanzyanya nawe ukuti watalike ukusambilila.a

Na sweswenye tungakolanya e Yehova ukupitila mukulanjizya inkumbu kwe wanji, ponga ngati akwa lupwa na ku wanawitu na wankazi. Swinya tungalanjizya ukuti twawa ni nkumbu ukupitila mu kulola inzila zino tungawomvya pa kuwizizyako wanji.