Ta̱ Jesús sándáʼara na̱ yiví ki̱vi̱ sábado

Na̱ fariseo sáa̱-inina xínina ta̱ Jesús ta kúni̱na tiinnara. Xi̱ka̱ʼa̱nna ña̱ va̱ása va̱ʼa sándáʼa ta̱ Jesús na̱ yiví ki̱vi̱ sábado chi ki̱vi̱ ndákiʼinndéena kúúña. Iin ki̱vi̱ sábado, ta̱ Jesús xi̱nira iin ta̱ kǒo túvi nu̱ú ta ndúkúra xu̱ʼún xíkara. Ta ni̱ka̱ʼa̱nra xíʼin na̱ discípulora: “Kotondó nda̱saa chindeé táʼan Ndióxi̱ xíʼin ta̱ ta̱a yóʼo”. Ta̱ Jesús ki̱ʼinra ta̱siía xíʼin ñuʼú ta ke̱ʼéra nda̱ʼyi̱. Tándi̱ʼi chi̱núndaara loʼo nda̱ʼyi̱ nu̱ú ta̱ ta̱a yóʼo ta ni̱ka̱ʼa̱nra: “Kúaʼan ta ndakataún nu̱ún nu̱ú ti̱kui̱í Siloam”. Ke̱ʼéra ña̱ ni̱ka̱ʼa̱n ta̱ Jesús tasaá nda̱nuná nu̱úra.

Na̱ yiví iin nda̱kanda̱-inina ta ni̱ka̱ʼa̱nna: “¿Á su̱ví ta̱yóʼo kúú ta̱ xi̱ndukú xu̱ʼún?”. Ta̱yóʼo ni̱ka̱ʼa̱nra xíʼinna: “Yi̱ʼi̱ kúúva ta̱ ta̱a ta̱ kǒo níxi̱tuvi nu̱ú”. Na̱ yiví ni̱ka̱ʼa̱nna: “¿Nda̱chun va̱ʼa túvi nu̱ún?”. Ta̱yóʼo ni̱ka̱ʼa̱nra xíʼinna ndiʼi ña̱ ndo̱ʼora. Ta nda̱kiʼinnara ku̱a̱ʼa̱n xíʼinna ña̱ ka̱ʼa̱nra xíʼin na̱ fariseo.

Ta̱ ta̱a yóʼo ni̱ka̱ʼa̱nra xíʼin na̱ fariseo: “Ta̱ Jesús chi̱núndaara nda̱ʼyi̱ nu̱úi̱ ta ni̱ka̱ʼa̱nra xíʼi̱n ná ndakatai̱ nu̱úi̱. Ta ke̱ʼíi̱ ña̱ ni̱ka̱ʼa̱nra ta vitin túviva nu̱úi̱”. Na̱ fariseo ni̱ka̱ʼa̱nna: “Tá ki̱vi̱ sábado sándáʼara, su̱ví Ndióxi̱ ta̱xi ndée ndaʼa̱ra”. Soo inkana ni̱ka̱ʼa̱nna: “Tá su̱ví Ndióxi̱ ta̱xiña, ¿nda̱chun va̱ʼa sa̱ndáʼara na̱ kúúmií kue̱ʼe̱?”.

Na̱ fariseo ka̱nana yivá ta̱ ta̱a yóʼo ta ni̱ka̱ʼa̱nna xíʼinna: “¿Nda̱chun va̱ʼa túvi nu̱ú se̱ʼendó vitin?”. Na̱ yivá ta̱ ta̱a yóʼo ni̱yi̱ʼvína chi na̱ fariseo káʼa̱nna tavána na̱ kándíxa ta̱ Jesús nu̱ú sinagoga. Ta ni̱ka̱ʼa̱nna: “Kǒo xíni̱ndi̱. Nda̱ka̱tu̱ʼun miíndóra”. Na̱ fariseo ni̱nda̱ka̱tu̱ʼunnara, ta ta̱yóʼo ni̱ka̱ʼa̱nra: “Xa̱a̱ ni̱ka̱ʼi̱n ndiʼiña xíʼinndó. ¿Nda̱chun ndáka̱tu̱ʼunkandó yi̱ʼi̱?”. Na̱ fariseo ni̱sa̱a̱ní-inina ta ta̱vána ta̱yóʼo.

Tándi̱ʼi, ta̱ Jesús ni̱xa̱ʼa̱nra xi̱tora ta̱ ta̱a yóʼo ta ni̱nda̱ka̱tu̱ʼunrara: “¿Á kándíxaún ta̱ Mesías?”. Ta̱yóʼo ni̱ka̱ʼa̱nra: “Tá ná kunda̱a̱-inii̱ yukúra kandíxavai̱ra”. Ta̱ Jesús ni̱ka̱ʼa̱nra xíʼinra: “Yi̱ʼi̱ kúú ta̱ Mesías”. ¿Á su̱ví va̱ʼa ni̱xi̱yo ini ta̱ Jesús xíʼin ta̱ ta̱a yóʼo? Sa̱ndáʼarara ta chi̱ndeérara ña̱ kandíxara Ndióxi̱.