Ti̱inna ta̱ Jesús

Ta̱ Jesús xíʼin na̱ apóstolra ku̱a̱ʼa̱nna chí yuku̱ Olivo ta ni̱ya̱ʼana chí yosó Cedrón. Sava ñu̱ú kúúña, ta ki̱ta tí yo̱o̱. Tá ni̱xa̱a̱na jardín ña̱ Getsemaní, ta̱ Jesús ni̱ka̱ʼa̱nra xíʼinna: “Yóʼo kundoondó ta kǒo ku̱su̱nndó”. Tándi̱ʼi ta̱ Jesús ku̱xíkara nu̱úna ta xi̱kuxítíra ta ni̱ka̱ʼa̱nra xíʼin Jehová: “Ná koo ña̱ kúni̱ miíún”. Tasaá Jehová chi̱ndaʼára iin ángel ña̱ nda̱sandakúra-ini ta̱ Jesús. Tándi̱ʼi ndi̱kóra nu̱ú ndóo u̱ni̱ na̱ apóstolra ta xi̱nira kísi̱nna. Ta ni̱ka̱ʼa̱nra xíʼinna: “Kunditondó. Su̱ví tiempo ku̱su̱nndó kúúña. Xa̱a̱ ki̱xa̱a̱ tiempo ña̱ ndataxina yi̱ʼi̱ ndaʼa̱ na̱ sáa̱-ini xíni yi̱ʼi̱”.

Tasaá ki̱xa̱a̱ ta̱ Judas xíʼin ku̱a̱ʼání na̱ yiví ta níʼina yuchu̱ xíʼin yitu̱n. Xa̱a̱ xíni̱vara míí ndíka̱a̱ ta̱ Jesús chi xa̱a̱ ku̱a̱ʼá yichi̱ ni̱xa̱ʼa̱nra kán. Ta̱ Judas xa̱a̱ ni̱ka̱ʼa̱nra xíʼin na̱ soldado ña̱ na̱ʼa̱ra nu̱úna ndáa ta̱ kúú ta̱ Jesús. Ta ni̱xa̱a̱ra ni̱ka̱ʼa̱nra xíʼin ta̱ Jesús: “Maestro á íyo va̱ʼún”, ta chi̱tura nu̱úra. Ta̱ Jesús ni̱ka̱ʼa̱nra: “Judas, ¿á xíʼin ña̱ chi̱tún nu̱úi̱ ndátaxiún yi̱ʼi̱ ndaʼa̱na?”.

Ta̱ Jesús ni̱ka̱ʼa̱nra xíʼin na̱ yiví: “¿Ndáana nándukúndó?”. Na̱yóʼo ni̱ka̱ʼa̱nna: “Ta̱ Jesús ta̱ ñuu Nazaret”. Ni̱ka̱ʼa̱nra xíʼinna: “Yi̱ʼi̱ kúúra”. Na̱yóʼo ndi̱kóna ta xi̱kuxítína nda̱a̱ nu̱ú ñuʼú. Ta̱ Jesús tuku ni̱nda̱ka̱tu̱ʼunra: “¿Ndáana nándukúndó?”. Na̱yóʼo ni̱ka̱ʼa̱nna: “Ta̱ Jesús ta̱ ñuu Nazaret”. Ta̱ Jesús ni̱ka̱ʼa̱nra: “Xa̱a̱ ni̱ka̱ʼi̱n xíʼinndó yi̱ʼi̱ kúúra. Ña̱kán taxindó ná ku̱ʼu̱n na̱yóʼo”.

Tá xi̱ni ta̱ Pedro ña̱yóʼo, ta̱vára yuchu̱ra ta xa̱ʼndara so̱ʼo iin ta̱ naní Malco, ta̱ xi̱kachíñura nu̱ú iin ta̱ su̱tu̱ káʼnu. Soo ta̱ Jesús ti̱inra so̱ʼora ta sa̱ndáʼaraña. Tasaá ni̱ka̱ʼa̱nra xíʼin ta̱ Pedro: “Ndachika̱a̱ va̱ʼa yuchu̱ún. Chi tá ná kanitáʼún xíʼin yuchu̱, xíʼin yuchu̱ kaʼnína yóʼo”. Na̱ soldado ti̱inna ta̱ Jesús ta ka̱túnna ndaʼa̱ra, ta na̱ apóstol xi̱nuvana. Tándi̱ʼi, níʼina ta̱ Jesús ku̱a̱ʼa̱nna xíʼinra nu̱ú ta̱ su̱tu̱ Anás. Ta̱yóʼo ni̱nda̱ka̱tu̱ʼunra ta̱ Jesús ta chi̱ndaʼárara nu̱ú ta̱ su̱tu̱ káʼnu, Caifás. Soo, ¿ndáaña ku̱u xíʼin na̱ apóstol?