ÑA̱ KÚNI̱NA KUNDA̱A̱-ININA XA̱ʼA̱ BIBLIA
¿Á kivi ixakáʼnu-ini Ndióxi̱ xa̱ʼa̱ ku̱a̱chiyó?
Kiviva sakúsi̱íyó-ini Ndióxi̱
Ña̱ Biblia káʼa̱nña xíʼinyó ña̱ ndiʼiyó na̱ yiví ku̱a̱chi kúúyó. Ndiʼiyó xa̱ʼa̱ ña̱ kúúyó se̱ʼe ta̱ Adán sa̱ndákoora ku̱a̱chi ndaʼa̱yó. Ña̱kán sava yichi̱ kéʼéyó ña̱ va̱ása va̱ʼa ta tándi̱ʼi ndíkó-iniyó xa̱ʼa̱ ña̱yóʼo. Soo ta̱ Jesucristo, ta̱ kúú se̱ʼe Ndióxi̱ ni̱xi̱ʼi̱ra xa̱ʼa̱yó ña̱ va̱ʼa chaʼvira xa̱ʼa̱ ku̱a̱chiyó ta xa̱ʼa̱ ña̱yóʼo va̱ʼa ndoo ku̱a̱chiyó vitin. Iin ña̱ va̱ʼaní kúú ña̱ ke̱ʼé Ndióxi̱ xa̱ʼa̱yó (kaʼvi Romanos 3:23, 24).
Savana ndeéní ku̱a̱chi ni̱ki̱ʼvina ta ndáka̱tu̱ʼunna miína á ixakáʼnu-ini Ndióxi̱ xa̱ʼa̱na. Soo ña̱ Biblia káʼa̱nña xíʼinyó: “Ni̱i̱ se̱ʼera ta̱ Jesús kúú ña̱ ndákata ku̱a̱chiyó” (1 Juan 1:7). Jehová íxakáʼnu-inira xa̱ʼa̱yó ni ndeéní ku̱a̱chi ni̱ki̱ʼviyó tá ndixa xíʼin ndinuʼu-iniyó ndíkó-iniyó xa̱ʼa̱ña (kaʼvi Isaías 1:18).
¿Ndáaña xíniñúʼu keʼéyó ña̱ va̱ʼa koo káʼnu-ini Ndióxi̱ xa̱ʼa̱yó?
Tá kúni̱yó ña̱ ná koo káʼnu-ini Jehová xa̱ʼa̱yó xíniñúʼu sakúaʼayó xa̱ʼa̱ra: xíniñúʼu kunda̱a̱-iniyó ndáa ki̱ʼva kéʼéra, ndáa consejo kúú ña̱ táxira ndaʼa̱yó, ta ndáaña kúni̱ra ná keʼéyó (Juan 17:3). Jehová íxakáʼnu-inira xa̱ʼa̱ na̱ ndixa ndíkó-ini xa̱ʼa̱ ku̱a̱china ta chíka̱a̱na ndee̱ ña̱ va̱ása keʼékanaña (kaʼvi Hechos 3:19).
Kiviva sakúsi̱íyó-ini Ndióxi̱. Saáchi ta̱yóʼo kúnda̱a̱-inira ña̱ kúúyó na̱ yiví ku̱a̱chi. Jehová va̱ʼaní-inira xíʼinyó ta kúndáʼviní-inira xínira miíyó. ¿Á kúni̱ún sakúaʼakaún xa̱ʼa̱ra ña̱ va̱ʼa kunda̱a̱-iniún ndáaña xíniñúʼu keʼún ña va̱ʼa sakúsi̱íún-inira? (kaʼvi Salmo 103:13, 14).