Pregunta ña̱ kéʼé na̱ káʼvi tutu yóʼo

¿Ndáa na̱ káʼa̱n ña̱ va̱xi nu̱ú Salmo 144:12-15 xa̱ʼa, á na̱ ñuu Ndióxi̱ á na̱ ndi̱va̱ʼa-ini na̱ káʼa̱n versículo 11 káʼa̱nña xa̱ʼa?

Tu̱ʼun hebreo kúú ña̱yóʼo ta kivi ka̱ʼa̱nña xa̱ʼa ku̱a̱ʼání ña̱ʼa. Xíʼin ña̱yóʼo, kunda̱a̱-iniyó ndáaña kúni̱ kachi ña̱yóʼo:

1. Kaʼvi ndiʼi ña̱ káʼa̱n Salmo. Ña̱ xíniñúʼuna tu̱ʼun “tasaá” nu̱ú versículo 12 káʼa̱nña xa̱ʼa bendición ña̱ káʼa̱n versículo 12 nda̱a̱ 14 xa̱ʼa, ña̱ ndákiʼin na̱ kéʼé ña̱ va̱ʼa: na̱yóʼo ndúkúna nu̱ú Ndióxi̱ ná saka̱kurana ndaʼa̱ na̱ ndi̱va̱ʼa-ini (versículo 11). Ña̱yóʼo káʼa̱ntu versículo 15 nu̱ú va̱xi u̱vi̱ yichi̱ ña̱ tu̱ʼun “si̱íní” ta u̱vi̱ saáña káʼa̱n xa̱ʼa: na̱ ñuu Jehová.

2. Kítáʼanña xíʼin inka texto ña̱ káʼa̱n xa̱ʼa ña̱ va̱ʼa taxi Ndióxi̱ ndaʼa̱ na̱ íyo nda̱kú-ini xíʼinra. Ña̱ Salmo yóʼo káʼa̱nña xa̱ʼa ña̱ xi̱kandíxaní ta̱ David ña̱ saka̱ku Ndióxi̱ na̱ ñuu Israel ndaʼa̱ na̱ kúni̱ sandiʼi-xa̱ʼana, ta taxira ña̱ va̱ʼa ndaʼa̱ na̱ ñuura saátu taxira ña̱ kusi̱í-inina (Lev. 26:9, 10; Deut. 7:13; Sal. 128:1-6). Nu̱ú Deuteronomio 28:4 káchiña: “Va̱ʼaníva koo se̱ʼún, va̱ʼaní koo ña̱ chiʼún, va̱ʼaní koo se̱ʼe kití sa̱na̱ún, se̱ʼe tí si̱ndi̱ki̱ xíʼin se̱ʼe tí ndikachi”. Tá xa̱ʼndachíñu ta̱ Salomón se̱ʼe ta̱ David, va̱ʼaníva xi̱ndoo na̱ ñuu ta xi̱kusi̱íní-inina. Ña̱ ke̱ʼé ta̱yóʼo iin kítáʼanña xíʼin ña̱ kaʼndachíñu ta̱ Jesús (1 Rey. 4:20, 21; Sal. 72:1-20).

Xíʼin ña̱yóʼo kúnda̱a̱-iniyó ña̱ káʼa̱n Salmo 144 xa̱ʼa, ña̱ káʼa̱nña xa̱ʼa ña̱ xa̱a̱ ku̱a̱ʼání tiempo ndátu na̱ ndásakáʼnu Jehová: ña̱ sandiʼi-xa̱ʼara ndiʼi na̱ ndi̱va̱ʼa-ini tasaá va̱ʼaníka kundoo na̱ kéʼé ña̱ va̱ʼa (Sal. 37:10, 11).