Ka̱ʼa̱n va̱ʼa xa̱ʼa ley Jehová

Jehová kúú ta̱ ta̱xi ley ña̱ keʼéyó ña̱ va̱ʼa. Ta̱yóʼo kúú ta̱ ta̱xi ley ña tindaʼa̱ iin ta̱a xíʼin iin ñaʼá (Mt 19:4-6, 9). Ndióxi̱ va̱ása kútóora ña̱ kini kéʼé na̱ yiví (1Co 6:9, 10). Chi̱ndúʼúra ley ña̱ káʼa̱n ndáa ki̱ʼva kundixiyó xíʼin ña̱ ndasaviíyó miíyó ña̱ va̱ʼa síín kuna̱ʼa̱yó nu̱ú na̱ ñuyǐví (Dt 22:5; 1Ti 2:9, 10).

Ña̱ tiempo vitin, ku̱a̱ʼání na̱ yiví kǒo xíínna kuniso̱ʼona ña̱ káʼa̱n ley Jehová (Ro 1:18-32). Ndíxina ti̱ko̱to̱ ña̱ kána tiempo vitin, ndásaviína miína ta kéʼéna táki̱ʼva kéʼé na̱ yiví. Náʼa̱na ña̱ ni̱nuní kúnina tá kéʼéna ña̱ kini ta káʼa̱nndaana xa̱ʼa na̱ yiví na̱ kéʼé ña̱ va̱ʼa (1Pe 4:3, 4).

Miíyó na̱ testigo Jehová xíniñúʼu ka̱ʼa̱nyó xa̱ʼa leyra ña̱ káʼa̱nra keʼéyó ña̱ va̱ʼa (Ro 12:9). ¿Ndáa ki̱ʼva keʼéyóña? Miíyó na̱ testigo xíniñúʼu na̱ʼa̱yó nu̱ú na̱ yiví ndáaña kúú ña̱ kútóo Ndióxi̱, ta vií ná sanáʼa̱yóna. Ná ka̱ʼa̱nyó xa̱ʼa ña̱ ndíxiyó xíʼin ña̱ ndásaviíyó miíyó, kivi nda̱ka̱tu̱ʼun xíʼin miíyó: “¿Ndáaña kúni̱i̱ keʼíi̱: ña̱ káʼa̱n Jehová á ña̱ káʼa̱n na̱ yiví? ¿Á náʼa̱ chiñu kéʼíi̱ ña̱ káchíñui̱ nu̱ú Ndióxi̱?”. Tá ndáka̱xinyó programa á película ña̱ kotondeʼéyó, kivi ndakanixi̱níyó á kútóo Jehová ña̱yóʼo, chi sava ña̱ xítoyó kivi sandákavaña miíyó (Sl 101:3). Ná ndakanixi̱níyó na̱ veʼeyó xíʼin inka na̱ yiví xítona ña̱ kéʼéyó (1Co 10:31-33).

¿Nda̱chun ndáyáʼviní keʼéyó ña̱ káʼa̱n ley Jehová? Saáchi ta̱ Jesús xa̱a̱ kuyatin sandiʼi-xa̱ʼara ñuyǐví xíʼin ña̱ kini ña̱ íyo nu̱úña. Na̱ yiví na̱ xíniso̱ʼo ña̱ káʼa̱n Ndióxi̱ kúú na̱ ka̱ku (Eze 9:4-7; 1Jn 2:15-17). Xa̱ʼa ña̱yóʼo, ná chika̱a̱yó ndée ña̱ keʼéyó ña̱ káʼa̱n ley Jehová ta na̱ xíni tá kéʼéyóña ka̱ʼa̱n va̱ʼana xa̱ʼara (1Pe 2:11, 12).

TÁNDI̱ʼI XI̱TONDÓ ÑA̱ VIDEO VA̱ʼA KOÚN MIGO JEHOVÁ: IIN TA̱A XÍʼIN IIN ÑAʼÁ, NDAKUIINDÓ ÑA̱ PREGUNTA YÓʼO:

• ¿Nda̱chun va̱ʼaníka ña̱ kuniso̱ʼoyó ña̱ káʼa̱n ley Jehová?

• ¿Nda̱chun xíniñúʼu sanáʼa̱ na̱ íyo se̱ʼe na̱ va̱lí se̱ʼena ña̱ káʼa̱n ley Jehová tá válíkana?

• ¿Nda̱saa kivi chindeé ndiʼiyó na̱ yiví ña̱ sakuaʼana xa̱ʼa Ndióxi̱?