Pregunta ña̱ kéʼé na̱ káʼvi tutu yóʼo

¿Ndáaña káʼa̱n tu̱ʼun Ndióxi̱ xa̱ʼa̱ ña̱ chinaʼáyó?

Iin diccionario káʼa̱nña ña̱ chinaʼáyó kúni̱ kachiña “kindo̱oyó keʼéyó iin ña̱ʼa, ta káʼa̱nyó ña̱ mií Ndióxi̱ kúú testigo […] xa̱ʼa̱ ña̱ káʼa̱nyó á xa̱ʼa̱ ña̱ kíndo̱oyó keʼéyó” (Diccionario de uso del español, de María Moliner). Ña̱ chinaʼáyó kivi ka̱ʼa̱n kuitíyóña á kivi kaʼyíyóña nu̱ú tutu.

Savana ndákanixi̱nína ña̱ va̱ása va̱ʼa chinaʼáyó saáchi ta̱ Jesús ni̱ka̱ʼa̱nra: “Kǒo chinaʼún”. Ta ni̱ka̱ʼa̱ntura ña̱yóʼo: “Tá xa̱a̱ káʼa̱nndó keʼéndó iin ña̱ʼa, keʼéndóña. Tá xa̱a̱ káʼa̱nndó ña̱ kǒo keʼéndóña, va̱ása keʼéndóña. Nda̱a̱ ndáaka tu̱ʼun ná chinúundó ka̱ʼa̱nndó xa̱ʼa̱ ña̱yóʼo xa̱a̱ kuenta ta̱ Ndi̱va̱ʼa kúúña” (Mat. 5:33-37, nota). Ta̱ Jesús xi̱kunda̱a̱-inira ña̱ ley ña̱ xi̱kuumií ta̱ Moisés xi̱ka̱ʼa̱nña ña̱ va̱ʼava chinaʼá na̱ ñuu Israel sava yichi̱, ta sava na̱ xi̱ndasakáʼnu Ndióxi̱ ke̱ʼévana ña̱yóʼo (Gén. 14:22, 23; Éx. 22:10, 11). Ta saátu xi̱kunda̱a̱-inira ña̱ nda̱a̱ mií Jehová chi̱naʼá sava yichi̱ (Heb. 6:13-17). Xíʼin ña̱yóʼo kúnda̱a̱-iniyó ña̱ va̱ása níka̱ʼa̱n ta̱ Jesús ña̱ nda̱a̱ ni iin yichi̱ va̱ása kivi chinaʼáyó. Chi ña̱ xi̱kuni̱ kachira kúú ña̱ ná va̱ása chinaʼáyó xa̱ʼa̱ nda̱a̱ ndáaka ña̱ʼa ña̱ va̱ása ndáyáʼvi. Ndiʼi yichi̱ xíniñúʼu saxínuyó ña̱ káʼa̱nyó, saáchi ña̱yóʼo kúú ña̱ kúni̱ Jehová ná keʼéyó.

Tá saá, ¿ndáaña keʼún tá ná ka̱ʼa̱n iinna xíʼún chinaʼún? Siʼna kiʼún kuenta á kuchiñún saxínúnña. Soo tá xítoún ña̱ va̱ása kuchiñún saxínúnña, va̱ʼaka va̱ása keʼúnña. Tu̱ʼun Ndióxi̱ káʼa̱nña ña̱yóʼo xíʼinyó: “Va̱ʼaníka kúú ña̱ va̱ása kindo̱ún keʼún iin ña̱ʼa nu̱úka ña̱ kindo̱ún keʼúnña ta va̱ása saxínúnña” (Ecl. 5:5). Tándi̱ʼi kotoún ndáaña káʼa̱n tu̱ʼun Ndióxi̱ xa̱ʼa̱ ña̱ chi̱naʼún keʼún, ta kotoún á taxi ña̱ xínitúni̱ún keʼúnña. ¿Ndáaña kúú sava texto ña̱ kivi chindeétáʼan xíʼún?

Kúsi̱íva-ini Ndióxi̱ xíʼin sava ña̱ chínaʼáyó keʼéyó. Tá kúú tá tíndaʼa̱ na̱ testigo Jehová, kíndo̱ona iin ña̱ʼa xíʼin táʼanna ta nda̱a̱ táki̱ʼva íyo na̱ chínaʼá saá íyona. Ta̱ ta̱a xíʼin ñá ñaʼá kíndo̱ona nu̱ú Ndióxi̱ xíʼin nu̱ú inkaka na̱ yiví ña̱ kuʼvi̱ní-inina kunitáʼanna, viíní kundaatáʼanna ta ixato̱ʼó-táʼanna ndiʼi tiempo ña̱ kutakuna. (Sava na̱ tíndaʼa̱ va̱ása káʼa̱nna mií táʼan tu̱ʼun yóʼo, soo ni saá kíndo̱ovana nu̱ú Ndióxi̱ ña̱ kundaatáʼanna). Tasaá kúú ña̱ xáa̱na tíndaʼa̱ va̱ʼana, ta xíniñúʼu koona xíʼin táʼanna ndiʼi tiempo (Gén. 2:24; 1 Cor. 7:39). Kúsi̱íva-ini Ndióxi̱ xíʼin tu̱ʼun ña̱ káʼa̱nna xíʼin táʼanna tá sa̱kán tíndaʼa̱na.

Va̱ása kúsi̱í-ini Ndióxi̱ xíʼin ña̱ chínaʼá savana. Tá kúú, na̱ ndásakáʼnu Ndióxi̱ va̱ása chínaʼána ña̱ kuniñúʼuna tu̱xi̱í ña̱ kanitáʼanna xa̱ʼa̱ na̱ ñuuna, ta ni va̱ása chínaʼána ña̱ sandákoona kandíxanara. Tá saá ná keʼéna ya̱ʼandosóvana ña̱ káʼa̱n tu̱ʼunra. Na̱ ndásakáʼnu Ndióxi̱ su̱ví na̱ ñuyǐví yóʼo kúúna, ña̱kán va̱ása xáʼa̱nyó nu̱ú ku̱a̱chi (Juan 15:19; Is. 2:4; Sant. 1:27).

Sava yichi̱ miívayó kúú na̱ ndaka̱xin á chinaʼáyó xa̱ʼa̱ iin ña̱ʼa á va̱ása. Sava yichi̱, na̱ ndásakáʼnu Ndióxi̱ tá kúma̱níka chinaʼána xa̱ʼa̱ iin ña̱ʼa, siʼna vií xíniñúʼu ndakanixi̱nína xa̱ʼa̱ consejo ña̱ ta̱xi ta̱ Jesús tá ka̱chira: “Taxindó ndaʼa̱ ta̱ César ña̱ʼa ña̱ kúú kuentara, ta taxindó ndaʼa̱ Ndióxi̱ ña̱ʼa ña̱ kúú kuenta Ndióxi̱” (Luc. 20:25).

Ná kachiyó ña̱ iin na̱ hermano kúni̱na nduuna na̱ inka país á kúni̱na ndukúna iin pasaporte ta na̱ chíñu káʼa̱nna xíʼinna ña̱ xíniñúʼu chinaʼána ña̱ chindeétáʼanna xíʼin na̱ ñuu kán. Soo tá káʼa̱nna xíʼinna chinaʼána xa̱ʼa̱ iin ña̱ʼa ña̱ ku̱a̱ʼa̱n contra ley Ndióxi̱, va̱ása taxi ña̱ xínitúni̱na keʼéna ña̱yóʼo. Sana na̱ chíñu kán kivi taxina ña̱ nasamana sava tu̱ʼun ña̱ ka̱ʼa̱nna tá ná chinaʼána, tasaá va̱ása ndi̱ʼi̱-ini na̱ hermano kán xa̱ʼa̱ ña̱ ka̱ʼa̱nna.

Tá ta̱xi na̱ chíñu ña̱ nasamana sava tu̱ʼun ña̱ ka̱ʼa̱nna tá ná chinaʼána, ña̱yóʼo kivi kitáʼanña xíʼin ña̱ káʼa̱n Romanos 13:1, nu̱ú káchiña: “Xíniñúʼu kuniso̱ʼoyó ndiʼi ña̱ káʼa̱n na̱ chíñu na̱ xáʼndachíñu nu̱úyó”. Sava na̱ hermano kivi xa̱a̱na ndakanixi̱nína ña̱ su̱ví ku̱a̱chiví kúú ña̱ chinaʼána xa̱ʼa̱ iin ña̱ʼa ña̱ xa̱a̱ káʼa̱n Ndióxi̱ xíʼinna keʼéna.

Tá káʼa̱nna xíʼinyó ña̱ kuniñúʼuyó iin ña̱ʼa á ña̱ keʼéyó iin seña tá ná chinaʼáyó, ña̱ xínitúni̱yó kúú ña̱ ka̱ʼa̱n xíʼinyó á kivi keʼéyó ña̱yóʼo á va̱ása. Tá tiempo xi̱naʼá, na̱ ñuu Roma xíʼin na̱ escita xi̱chinaʼána xa̱ʼa̱ espadana, ña̱yóʼo kúni̱ kachiña ña̱ xi̱chinaʼána xa̱ʼa̱ ndióxi̱na ña̱ xi̱chindeétáʼan xíʼinna tá xi̱xikana nu̱ú ku̱a̱chi ta xíʼin ña̱yóʼo xi̱na̱ʼa̱na ña̱ ndixa saxínuna ña̱ káʼa̱nna. Ta na̱ ñuu Grecia xi̱ndaniʼina ndaʼa̱na chí ndiví tá xi̱chinaʼána. Xíʼin ña̱yóʼo xi̱na̱ʼa̱na ña̱ xi̱kunda̱a̱-inina ña̱ íyo iin ndióxi̱ ta̱ kíʼin kuenta xíʼin ña̱ káʼa̱nna ta saátu xíʼin ña̱ kéʼéna, ta ta̱yóʼo kúú ta̱ ndatiin ku̱a̱chi xíʼinna xa̱ʼa̱ ña̱ kéʼéna.

Iin na̱ ndásakáʼnu Jehová va̱ása chitóna á kuxítína nu̱ú iin bandera ta ni va̱ása keʼéna ña̱yóʼo xíʼin nda̱a̱ ndáaka ña̱ʼa ña̱ kítáʼan xíʼin iin religión vatá. Soo, ¿ndáaña keʼéna tá káʼa̱n na̱ chíñu ña̱ ná chinúuna ndaʼa̱na sa̱tá iin Biblia ta chinaʼána ña̱ ka̱ʼa̱nna nina ña̱ nda̱a̱? Sana keʼévana ña̱yóʼo saáchi Biblia káʼa̱nña xa̱ʼa̱ na̱ xi̱ndasakáʼnu Ndióxi̱ tiempo xi̱naʼá ña̱ xi̱keʼéna iin seña tá xi̱chinaʼána (Gén. 24:2, 3, 9; 47:29-31). Tá ña̱yóʼo ná ndaka̱xinyó keʼéyó, ná ndakaʼányó ña̱ nu̱ú Ndióxi̱ kúú ña̱ chínaʼáyó ña̱ ka̱ʼa̱nyó ña̱ nda̱a̱. Ña̱kán, nda̱a̱ ndáaka ña̱ʼa ná nda̱ka̱tu̱ʼunna miíyó, nina ña̱ nda̱a̱ ná ndakuiinyó.

Xa̱ʼa̱ ña̱ chíndayáʼviníyó ña̱ kítáʼanyó xíʼin Jehová xíniñúʼu ka̱ʼa̱nyó xíʼinra ta ndakaniníxi̱níyó ndáaña keʼéyó tá kúma̱níka chinaʼáyó xa̱ʼa̱ iin ña̱ʼa. Va̱ása kúni̱yó ya̱ʼandosóyó ña̱ káʼa̱n ña̱ xínitúni̱yó xíʼinyó ni ña̱ káʼa̱n tu̱ʼun Ndióxi̱. Tá chínaʼáyó xa̱ʼa̱ iin ña̱ʼa, ná chika̱a̱yó ndee̱ ña̱ saxínuyóña (1 Ped. 2:12).