12 Ndakanixi̱ní xa̱ʼa̱ ña̱ kúni̱ún keʼún

¿NDÁAÑA KÚNI̱ KACHI ÑA̱YÓʼO?

Iin ña̱ kúni̱ún keʼún va̱ása kúúña iin ña̱ kúsi̱í kuití iniún ná kuu. Ña̱ va̱ʼa saxínuyó iin ña̱ kúni̱yó keʼéyó, xíniñúʼu ndakanixi̱níyó ndáa ki̱ʼva keʼéyóña, kuumiíyó tiempo ta saátu chika̱a̱yó ndee̱ ña̱ keʼéyóña.

Ña̱ va̱ʼa saxínuyó ña̱ kúni̱yó keʼéyó kivi kooña ku̱a̱ʼá tiempo á loʼo tiempo, ña̱yóʼo kúni̱ kachiña ña̱ kivi ya̱ʼa sava ki̱vi̱, yo̱o̱ á ku̱i̱ya̱. Tá ku̱a̱ʼá tiempo xíniñúʼu ya̱ʼa saá saxínuyó iin ña̱ʼa ña̱ kúni̱yó keʼéyó, siʼna loʼo tá loʼoña ná keʼéyó.

¿NDA̱CHUN NDÁYÁʼVINÍ ÑA̱YÓʼO?

Tá ná saxínún ña̱ kúni̱ún keʼún, ña̱yóʼo chindeétáʼanña xíʼún ña̱ kandíxaún ña̱ kuchiñún keʼún inkaka ña̱ʼa, tasaá viíka kutáʼún xíʼin inkana ta kusi̱íka-iniún.

Va̱ása kaka-iniún ña̱ kuchiñún keʼún inka ña̱ʼa. Tá ná kuchiñún saxínún iin ña̱ʼa ña̱ loʼo, saátu kuchiñún saxínún iin ña̱ʼa ña̱ káʼnuka. Ta saátu va̱ása yi̱ʼvíún ya̱ʼún nu̱ú ña̱ íxayo̱ʼvi̱ xíʼún ki̱vi̱ tá ki̱vi̱, tá kúú ña̱ íxandúxa inkana xíʼún ña̱ keʼún iin ña̱ʼa.

Viíka kutáʼún xíʼin na̱ migoún. Ndiʼi na̱ yiví kútóona kutáʼanna xíʼin na̱ xíni̱ ndáaña kúni̱na keʼéna ta chíka̱a̱na ndee̱ ña̱ va̱ʼa saxínuna ña̱ kúni̱na keʼéna. Iin ña̱ va̱ʼaní chíndeétáʼan xíʼinyó ña̱ viíka kutáʼanyó xíʼin na̱ migoyó kúú, ña̱ inkáchi kachíñuyó ña̱ va̱ʼa saxínuyó ña̱ kúni̱yó keʼéyó.

Kusi̱íka-iniún. Tá ndákanixi̱níún keʼún iin ña̱ʼa ta sáxi̱núnña, ña̱yóʼo sákusi̱íníña-iniún.

“Kúsi̱íní-inii̱ tá ndákanixi̱níi̱ ña̱ keʼíi̱ iin ña̱ʼa, saáchi ña̱yóʼo chíndeétáʼanña xíʼi̱n ña̱ va̱ása kundi̱ʼi̱-inii̱ xa̱ʼa̱ inka ña̱ʼa chi ña̱yóʼova chíka̱i̱ ndee̱ ña̱ saxínui̱. Iin ña̱ va̱ʼaní kúúña tá sáxi̱nuyó ña̱ kúni̱yó keʼéyó ta káchiyó, ‘ku̱chiñuvai̱ ke̱ʼíi̱ña’” (ta̱ Christopher).

TEXTO ÑA̱ VA̱XI NU̱Ú BIBLIA: “Na̱ xíto ndáa ki̱ʼva káni ta̱chí va̱ása chiʼina, ta na̱ xítoní nu̱ú vi̱kó va̱ása sakéena” (Eclesiastés 11:4).

¿NDÁAÑA KIVI KEʼÚN?

Ña̱ va̱ʼa ndakanixi̱níún ndáaña kúni̱ún keʼún ta saxínúnña, keʼé ña̱ va̱xi yóʼo.

Ndaka̱xin ndáaña kúni̱ún keʼún. Kaʼyí nu̱ú iin tutu ndiʼi ña̱ kúni̱ún keʼún, tándi̱ʼi ndaka̱xin ndáaña siʼna kúni̱ún keʼún.

Ndakanixi̱ní ndáa ki̱ʼva keʼúnña. Keʼé ña̱ va̱xi yóʼo xíʼin iin tá iin ña̱ kúni̱ún keʼún:

• Ndaka̱xin nda̱saa tiempo saxínún keʼúnña.

• Kaʼyí ndáa ki̱ʼva keʼúnña.

• Ndakanixi̱ní ndáaña kivi ixayo̱ʼvi̱ xíʼún ta ndáa ki̱ʼva ya̱ʼún nu̱ú ña̱yóʼo.

Kixáʼa keʼé ña̱yóʼo. Va̱ása xíniñúʼu kunda̱a̱-iniún ndáa ki̱ʼva koo ndiʼi ña̱ keʼún ta saáví kixáʼún keʼúnña. Ndakanixi̱ní ndáaña kúú ña̱ siʼna xíniñúʼu keʼún tasaá va̱ʼa saxínún ña̱ kúni̱ún ta keʼé ña̱yóʼo. Koto ndáa ki̱ʼva xa̱a̱ ku̱a̱ʼa̱n kána chiñu ña̱ kéʼún tá xa̱a̱ sa̱xínún iin táʼvíña.

TEXTO ÑA̱ VA̱XI NU̱Ú BIBLIA: “Na̱ ndákani vií xi̱ní xa̱ʼa̱ ña̱ kéʼéna viíní kanaña” (Proverbios 21:5).