Ta̱ Noé i̱xava̱ʼara iin arca

TA̱ Noé ni̱xi̱yo ñá síʼíra xíʼin u̱ni̱ se̱ʼera. Iin se̱ʼera xi̱naní Sem, inkara xi̱naní Cam ta inkara xi̱naní Jafet. Ta iin iin na̱yóʼo ni̱xi̱yo ñá síʼína. Ta̱ Noé xíʼin na̱ veʼera u̱na̱ xi̱kuuna.

Ta vitin Ndióxi̱ ni̱ka̱ʼa̱nra xíʼin ta̱ Noé ña̱ keʼéra iin ña̱ʼa. Ni̱ka̱ʼa̱nra xíʼinra ná keʼéra iin arca káʼnu. Tú arca yóʼo káʼnu ni̱xi̱yonú tá káa iin barco saá ni̱xi̱yonú, tá xi̱na̱ʼa̱ iin xatún káʼnu saá xi̱na̱ʼa̱nú. ʼU̱ni̱ piso keʼúnnú ta ná koo cuarto ininúʼ, káchi Ndióxi̱ xíʼinra. Ña̱ cuarto ña̱ keʼé ta̱ Noé iinña koora xíʼin na̱ veʼera, iinña koo kití ta iinña koo ña̱ʼa kuxuna.

Ndióxi̱ ni̱ka̱ʼa̱nra xíʼin ta̱ Noé ña̱ vií ná keʼéra tú arca yóʼo tasaá va̱ása ki̱ʼvi ti̱kui̱í ininú. Ta káchira xíʼinra: ʼSakói̱n sa̱vi̱ kini ta sandiʼi-xa̱ʼíi̱ ndiʼi ña̱ kini ña̱ íyo nu̱ú ñuyǐví yóʼo. Na̱ kǒo ñúʼu ini arca kuvinaʼ, káchi Ndióxi̱ xíʼinra.

Ta̱ Noé xíʼin se̱ʼera xi̱niso̱ʼona ña̱ ni̱ka̱ʼa̱n Ndióxi̱ ta ki̱xaʼána kéʼéna arca. Sava na̱ yiví ni̱xa̱ku̱vana ta nda̱kundeékana ke̱ʼéna ña̱ kini. Ni iinna va̱ása níkandíxa ña̱ ni̱ka̱ʼa̱n ta̱ Noé xíʼinna ña̱ ni̱ka̱ʼa̱n Ndióxi̱ xíʼinra.

Ña̱ káʼnuní tú arca yóʼo ku̱a̱ʼání tiempo xi̱niñúʼuna ña̱ i̱xava̱ʼananú. Ta ku̱a̱ʼá ku̱i̱ya̱ ni̱ya̱ʼa saáví ni̱xi̱nunú. Ta vitin Ndióxi̱ ni̱ka̱ʼa̱nra xíʼin ta̱ Noé ña̱ taánra kití ininú. Ni̱ka̱ʼa̱nra xíʼinra ná taánra u̱vi̱ nu̱ú iin iin kití iin tí si̱ʼí ta iin tí che̱e. Ta savarí ná taánra u̱xa̱rí. Ni̱ka̱ʼa̱nra xíʼin ta̱ Noé ná taánra ndiʼi nu̱ú tí saa. Ta̱ Noé ke̱ʼéra ndiʼi ña̱ ni̱ka̱ʼa̱n Ndióxi̱ xíʼinra.

Tándi̱ʼi, ta̱ Noé xíʼin na̱ veʼera ni̱ndi̱ʼvina ini tú arca, tasaá Ndióxi̱ sa̱sira yéʼé tú arca yóʼo. Ta̱ Noé xíʼin na̱ veʼera ñúʼuna ini tú arca ta ndátuna koon sa̱vi̱. Ndakanixi̱níún ña̱ ndíka̱ún kán, ¿á koon sa̱vi̱ kini táki̱ʼva káchi Ndióxi̱?