U̱xu̱ u̱vi̱ ta̱a ni̱xa̱ʼa̱n xi̱to se̱ʼé ñuu Canaán

KOTO ku̱i̱ʼi ña̱ ndíso u̱vi̱ ta̱a yóʼo náʼnukavíña. Koto tí uva náʼnukavírí. ¿Ndáa míí ke̱e ku̱i̱ʼi yóʼo? Ñuu Canaán ke̱eña. ¿Á ndákaʼún xa̱ʼa ñuu Canaán? Yóʼo kúú nu̱ú ni̱xi̱yo ta̱ Abrahán, ta̱ Isaac xíʼin ta̱ Jacob. Soo tá ni̱xi̱yo so̱ko ñuu yóʼo saá ki̱ta ta̱ Jacob ku̱a̱ʼa̱nra chí ñuu Egipto xíʼin na̱ veʼera. Ta vitin xa̱ni̱ya̱ʼa 216 ku̱i̱ya̱, ta̱ Moisés ku̱a̱ʼa̱n tukura xíʼin na̱ ñuu Israel chí ñuu Canaán. Ta nu̱ú ñuʼú yi̱chí ña̱ naní Qadés kúú nu̱ú ndóona vitin.

Na̱ yiví na̱ ndóo ñuu Canaán su̱ví na̱ yiví va̱ʼa kúúna. Xa̱ʼa ña̱yóʼo chi̱ndaʼá ta̱ Moisés 12 ta̱a ña̱ ku̱a̱ʼa̱nna koto se̱ʼéna ñuu Canaán, ta káchira xíʼinna: ʼKuaʼánndó kotondó nda̱saa káa ñuu kán á na̱ ndakú kúú na̱ ndóo nu̱úña. Ta kotondó á va̱ʼa ñuʼú kúúña ña̱ chiʼiyó nu̱úña. Ta kuniʼindó ku̱i̱ʼi kixi xíʼindó ná kunindi̱ʼ.

Tá ndi̱kóna chí Qadés, ni̱ka̱ʼa̱nna xíʼin ta̱ Moisés: ʼVa̱ʼaní ñuʼú kúúñaʼ, ta níʼina sava ku̱i̱ʼi ki̱xa̱a̱na. Soo 10 na̱yóʼo káchina: ʼNa̱ yiví kán náʼnunína ta ndakúnína tá ná kindaayó ñuuna ndaʼa̱na kaʼnívana miíyóʼ.

Na̱ ñuu Israel ni̱yi̱ʼvínína tá xi̱niso̱ʼona ña̱yóʼo, ta káchina: ʼVa̱ʼaka níxi̱ʼi̱yó ñuu Egipto á nu̱ú ñuʼú yi̱chí yóʼo. Ta vitin kaʼnívana miíyó tá ná ku̱ʼu̱nyó kanitáʼanyó xíʼinna, ta ñá síʼíyó xíʼin na̱ va̱lí se̱ʼeyó ndakiʼinnana ku̱ʼu̱n xíʼinna. Ná ndaka̱xinyó inkana nu̱ú ta̱ Moisés ña̱ va̱ʼa kuniʼina yichi̱ nu̱úyó ta ndikóyó chí ñuu Egiptoʼ.

Soo ta̱ Josué xíʼin ta̱ Caleb ka̱ndíxavana Jehová ta ni̱ka̱ʼa̱nna xíʼin na̱ ñuu Israel: ʼVa̱ása yi̱ʼvíndó, Jehová kúú ta̱ íyo xíʼinyó. Kuchiñuvayó ndakiʼinyó ñuʼú kán kooyóʼ. Soo na̱ ñuu Israel kǒo kándíxana, nda̱a̱ kúni̱na kaʼnína ta̱ Josué xíʼin ta̱ Caleb.

Xa̱ʼa na̱yóʼo ni̱sa̱a̱ní Jehová ta káchira xíʼin ta̱ Moisés: ʼNdiʼi na̱ ndíka̱a̱ 20 ku̱i̱ya̱ iin saá nda̱a̱ na̱ xa̱chée kǒo ndi̱ʼvina ñuu Canaán. Chi xi̱nina milagro ña̱ ke̱ʼíi̱ xíʼinna ñuu Egipto ta xíʼin milagro ña̱ ke̱ʼíi̱ ñuʼú yi̱chí yóʼo, ta ni saáví kǒo kándíxana yi̱ʼi̱. Xa̱ʼa ña̱yóʼo 40 ku̱i̱ya̱ kakana ñuʼú yi̱chí yóʼo nda̱a̱ ná kuvi ndiʼina. Iinlá ta̱ Josué xíʼin ta̱ Caleb ki̱ʼvi ñuʼú Canaánʼ.