Ta̱ Jonás xíʼin iin ti̱a̱ká káʼnu

KOTO ta̱a ta̱ ndíka̱a̱ ini ti̱kui̱í yóʼo. Su̱ví ña̱ va̱ʼa ndóʼora. Koto tí ti̱a̱ká yóʼo kokórí miíra. ¿Á xíni̱ún nda̱saa naníra? Jonás naníra. Yóʼo sakuaʼayó ndachun nda̱kavara ndaʼa̱ tu̱ndóʼo yóʼo.

Iin profeta kúúra nu̱ú Jehová. Tá ni̱ya̱ʼa loʼo tiempo, ni̱xi̱ʼi̱ ta̱ profeta Eliseo, Jehová ni̱ka̱ʼa̱nra xíʼin ta̱ Jonás: ʼKuaʼán ñuu káʼnu ña̱ naní Nínive. Chi ku̱a̱ʼání ña̱ kini kéʼé na̱ yiví kán, ta ka̱ʼún xíʼinna xa̱ʼa ña̱ kéʼénaʼ.

Soo ta̱ Jonás kǒo kúni̱ra ku̱ʼu̱nra ñuu Nínive. Ña̱kán nda̱ara iin tú barco tú ku̱a̱ʼa̱n inka ñuuva. Soo Jehová kǒo níkutóora ña̱yóʼo. Xa̱ʼa ña̱yóʼo ndeéní ki̱xi ta̱chí i̱xaa Jehová, ta tú barco kúni̱ sa̱ʼvinú ini ti̱kui̱í. Na̱ yiví ku̱a̱ʼa̱n ini tú barco yóʼo ni̱yi̱ʼvínína, ta ki̱xaʼána káʼa̱nna xíʼin ndióxi̱na ña̱ ná chindeéñana.

Saáví ki̱xaʼá ta̱ Jonás káʼa̱nra xíʼinna: ʼYi̱ʼi̱, Jehová kúú ta̱ ndásakáʼnui̱, ta̱ i̱xava̱ʼa ndiví xíʼin Ñuʼú. Nu̱ú Jehová xínui̱, chi kǒo kúni̱ keʼíi̱ ña̱ ni̱ka̱ʼa̱nra xíʼi̱nʼ. Tasaá ni̱ka̱ʼa̱n na̱ ku̱a̱ʼa̱n ini barco xíʼinra. ʼ¿Ndáaña keʼéndi̱ xíʼún ña̱ va̱ʼa ná sayáa ta̱chí yóʼo?ʼ

ʼSakánandó yi̱ʼi̱ ini ti̱kui̱í tasaá sayáa ta̱chíʼ, káchi ta̱ Jonás xíʼinna. Soo na̱yóʼo kǒo xíínna sakánanara, soo tá ki̱xaʼá ndeéka káni ta̱chí, saáví sa̱kánanara nu̱ú ti̱kui̱í. Ta iin kama kuití sa̱yáa ta̱chí ta saátu ti̱kui̱íva.

Tá ni̱sa̱ʼvi ta̱ Jonás ku̱a̱ʼa̱nra ini ti̱kui̱í, iin ti̱a̱ká káʼnu ko̱kórí ta̱yóʼo. Soo kǒo níxi̱ʼi̱ra. U̱ni̱ ñu̱ú xíʼin u̱ni̱ káʼñu xi̱ndika̱a̱ra inirí. Nda̱ndikókaví-ini ta̱ Jonás xa̱ʼa ña̱ kǒo níxiniso̱ʼora ña̱ ni̱ka̱ʼa̱n Jehová xíʼinra ña̱ ku̱ʼu̱nra ñuu Nínive. Xa̱ʼa ña̱yóʼo, ¿á xíni̱ún ndáaña ke̱ʼéra?

Ki̱xaʼára káʼa̱nra xíʼin Jehová ta ndúkúra ndée nu̱úra. Tasaá Jehová ta̱vára tí ti̱a̱ká yóʼo nu̱ú ñuʼú yi̱chí ta ndu̱xanrí ta̱ Jonás. Tándi̱ʼi, saáví ku̱a̱ʼa̱n ta̱ Jonás ñuu Nínive. ¿Ndáaña sánáʼa̱ ña̱yóʼo miíyó? ¿Á su̱ví xíniñúʼu keʼéyó ndiʼi ña̱ káʼa̱n Jehová xíʼinyó?