¿Ndáaña kéʼé na̱ xi̱ku̱aʼa na̱ kíʼin kuenta xíʼin congregación?

Na̱ ndísochíñu xíʼin na̱ ñuu Jehová kǒo xu̱ʼún kíʼinna. Táki̱ʼva ni̱xi̱yo tíempo xi̱naʼá saá íyo vitin na̱ xíni va̱ʼa xa̱ʼa Ndióxi̱ na̱yóʼo kúúna ndáka̱xinna ña̱ kiʼinna kuenta xíʼin congregación (Hechos 20:28). Ta na̱ xi̱ku̱aʼa yóʼo chíka̱a̱na ndée ña̱ kéʼéna ña̱ kúni̱ Jehová na̱yóʼo kúúna níʼi chiñu xíʼin congregación ta kíʼinna kuenta xíʼinña. Ta kǒo na̱ íxanduxa xíʼin na̱yóʼo ña̱ keʼénaña, ta va̱ása kéʼéna chiñu yóʼo xa̱ʼa xu̱ʼún chi ndinuʼu-inina kéʼénaña (1 Pedro 5:1-3). ¿Ndáa chiñu kéʼé na̱yóʼo?

Na̱yóʼo ndáana ndi̱ʼi̱. Na̱ xi̱ku̱aʼa yóʼo ndáana na̱ congregación ta sánáʼa̱na na̱yóʼo xa̱ʼa Ndióxi̱ ña̱kán va̱ʼa kuyatinkana nu̱úra. Ta xínina chi Ndióxi̱ kúú ta̱ ta̱xi chiñu káʼnu yóʼo ndaʼa̱na soo su̱ví xa̱ʼa ña̱yóʼo íxandiva̱ʼana xíʼin na̱ ñuu Ndióxi̱, na̱ xi̱ku̱aʼa yóʼo ndíʼi̱-inina xa̱ʼandi̱ ta kúni̱na si̱í ná kundoondi̱ (2 Corintios 1:24). Ta íxaa iin ta̱ ndáa ndikachi chi ndíʼi̱-inira xa̱ʼa iin tá iinrí, saá íxaa na̱ xi̱ku̱aʼa yóʼo ndíʼi̱-inina xa̱ʼa iin tá iinndi̱ chi kúúndi̱ ndikachi sana Ndióxi̱ (Proverbios 27:23).

Sánáʼa̱na ndi̱ʼi̱ ña̱ keʼéndi̱ ña̱ kúni̱ Ndióxi̱. U̱na̱ tá u̱na̱ ki̱vi̱ kíʼinna kuenta xíʼin ña̱ sakuaʼandi̱ nu̱ú ndátakandi̱ ña̱kán va̱ʼa ná kandíxakandi̱ Ndióxi̱ (Hechos 15:32). Ta su̱ví ña̱yóʼo kuití kéʼéna, chi ku̱a̱ʼa̱nna nátúʼunna xíʼin na̱ yiví veʼe tá veʼena, ta sánáʼa̱tuna miíndi̱ ña̱ va̱ʼaka sanáʼa̱ndi̱ na̱ yiví xa̱ʼa Ndióxi̱.

Chíndeéna iin iinndi̱. Ña̱ va̱ʼa ná keʼé iin iinndi̱ ña̱ káʼa̱n Ndióxi̱, na̱ xi̱ku̱aʼa yóʼo sava xáʼa̱nna veʼendi̱ nátúʼunna xíʼinndi̱ á savatu nátúʼunna xíʼinndi̱ veʼe nu̱ú ndátakandi̱ sákuaʼandi̱ xa̱ʼa Ndióxi̱. Xíniñúʼuna Biblia ña̱ chíndeéna miíndi̱ á ña̱ sandíkona-inindi̱ (Santiago 5:14, 15).

Na̱ xi̱ku̱aʼa yóʼo su̱ví iinlaa chiñu ña̱ congregación kuití kéʼéna chi íyoka inka chiñu kéʼéna chi káchíñuna kuxu na̱ veʼena ta ndáana na̱yóʼo. Ku̱a̱ʼání chiñu kéʼé na̱ xi̱ku̱aʼa yóʼo xa̱ʼa ña̱yóʼo tǒʼo koo iniyó xíʼinna (1 Tesalonicenses 5:12, 13).

• ¿Ndáa chiñu kéʼé na̱ xi̱ku̱aʼa ti̱xin ña̱ congregación?

• ¿Ndáaña kéʼé na̱yóʼo tasaá náʼa̱na ña̱ ndíʼi̱-inina xa̱ʼa iin iinndi̱?