Nda̱a̱ vitinví ka̱ku iin se̱ʼena

Xa̱a̱ ku̱a̱ʼání ku̱i̱ya̱ ti̱ndaʼa̱ ta̱ Abrahán xíʼin ñá Sara. Ku̱a̱ʼání ña̱ʼa sa̱ndákoona ña̱ ku̱ʼu̱nna ñuu Ur. Soo kǒo níka̱ʼa̱n kúáchi ñá Sara chi ka̱ndíxavañá Ndióxi̱.

Ñá Sara xi̱kuni̱ñá koo se̱ʼeñá, ta ni̱ka̱ʼa̱nñá xíʼin ta̱ Abrahán: “Tá ná koo iin se̱ʼún xíʼin ñá Agar ñá káchíñu nu̱úyó, tá koo se̱ʼi̱ miíi̱ saá kooña”. Tá ni̱ya̱ʼa tiempo ka̱ku se̱ʼe ñá Agar, ta Ismael xi̱naníra.

Ni̱ya̱ʼa tiempo, xa̱a̱ 99 ku̱i̱ya̱ ta̱ Abrahán, ta ñá Sara 89 ndíka̱a̱ñá, u̱ni̱ na̱ yiví ni̱xa̱ʼa̱n xi̱to-ñaʼá. Ta̱ Abrahán ni̱ka̱ʼa̱nra xíʼinna ña̱ ná ndakiʼinndeéna xa̱ʼa iin yitu̱n ta ná kuxuna. ¿Á xíni̱ún ndáana kúú na̱yóʼo? Na̱ ángel kúúna. Na̱yóʼo ni̱ka̱ʼa̱nna xíʼin ta̱ Abrahán: “Tá ná xi̱nu iin ku̱i̱ya̱, koo iin se̱ʼendó”. Ñá Sara xi̱niso̱ʼoñá ña̱ ni̱ka̱ʼa̱nna ta ki̱xaʼá xáku̱ñá ta ndákanixi̱níñá: “¿Á mií ña̱ ndixa kaku iin se̱ʼi̱ ta ñá xa̱a̱ ku̱cheéva kúi̱?”.

Tá xa̱a̱ ni̱ya̱ʼa iin ku̱i̱ya̱, ka̱ku se̱ʼe ñá Sara táki̱ʼva ni̱ka̱ʼa̱n na̱ ángel. Ta̱ Abrahán chi̱núura ki̱vi̱ ta̱ loʼo yóʼo ña̱ kunaníra Isaac. Ta ña̱yóʼo kúni̱ kachiña “ña̱ xáku”.

Tá xa̱a̱ u̱ʼu̱n ku̱i̱ya̱ ta̱ Isaac, xi̱ni ñá Sara kúsi̱kindaa ta̱ Ismael se̱ʼeñá. Ta ña̱ kǒo kúni̱ñá ndoʼora ña̱yóʼo ni̱ka̱ʼa̱nñá xíʼin ta̱ Abrahán: “ka̱ʼa̱n xíʼin ñá Agar xíʼin ta̱ Ismael ná ku̱ʼu̱nna inka ñuu”. Soo kǒo níxiniso̱ʼo ta̱ Abrahán ña̱ ni̱ka̱ʼa̱n ñá Sara, soo nu̱ú Jehová va̱ʼava ña̱ ni̱ka̱ʼa̱nñá, ta ni̱ka̱ʼa̱nra xíʼin ta̱ Abrahán: “Kuniso̱ʼo ña̱ káʼa̱n ñá síʼún. Yi̱ʼi̱ kundaa ta̱ Ismael soo ta̱ Isaac kúú ta̱ ndakiʼin ñuʼú ña̱ ni̱ka̱ʼi̱n taxii̱ ndaʼún”.