Jehová nda̱ka̱xinra ta̱ Josué

Xa̱a̱ ku̱a̱ʼání ku̱i̱ya̱ níʼi ta̱ Moisés yichi̱ nu̱ú na̱ ñuu Israel, ta ndáa si̱lóʼo kúni̱ ña̱ kuvira. Jehová ni̱ka̱ʼa̱nra xíʼinra: “Su̱ví yóʼó kuniʼi yichi̱ nu̱ú na̱ ñuu Israel ña̱ ki̱ʼvina ñuu ña̱ taxii̱ ndaʼa̱na. Soo taxii̱ ña̱ kuniún ñuʼú yóʼo”. Ta̱ Moisés ni̱ka̱ʼa̱nra xíʼin Jehová ña̱ ndaka̱xinra iin ta̱ kuniʼi yichi̱ nu̱úna ta kundaarana. Jehová ni̱ka̱ʼa̱nra xíʼin ta̱ Moisés: “Ka̱ʼa̱n xíʼin ta̱ Josué ña̱ nda̱kaxii̱ra”.

Si̱lóʼo tiempo kúni̱ ña̱ kuvi ta̱ Moisés, ta ni̱ka̱ʼa̱nra xíʼin na̱ ñuu Israel ña̱ nda̱ka̱xin Jehová ta̱ Josué ña̱ kuniʼira yichi̱ nu̱úna. Ta ña̱yóʼo ni̱ka̱ʼa̱n ta̱ Moisés xíʼin ta̱ Josué: “Kǒo yi̱ʼvíún chi Jehová chindeé yóʼó”. Ni̱ya̱ʼa tiempo, ta̱ Moisés nda̱ara xi̱ní yuku̱ Nebo. Kán ni̱na̱ʼa̱ Jehová ñuʼú nu̱úra ña̱ ni̱ka̱ʼa̱nra taxira ndaʼa̱ ta̱ Abrahán, ta̱ Isaac xíʼin ta̱ Jacob. 120 ku̱i̱ya̱ ta̱ Moisés tá ni̱xi̱ʼi̱ra.

Jehová ni̱ka̱ʼa̱nra xíʼin ta̱ Josué: “Ko̱sokava yu̱ta Jordán ña̱ va̱ʼa ki̱ʼviún ñuu Canaán. Yi̱ʼi̱ chindeé yóʼó táki̱ʼva chi̱ndeéi̱ ta̱ Moisés. Va̱ása nandósóún kaʼviún ley ndiʼi ki̱vi̱. Va̱ása yi̱ʼvíún, ndakú koo iniún. Kúaʼan ta keʼún ndiʼi ña̱ ni̱ka̱ʼi̱n xíʼún”.

Ta̱ Josué chi̱ndaʼára u̱vi̱ na̱ ku̱ʼu̱n koto se̱ʼé ñuu Jericó. Inka historia ña̱ va̱xi sakuaʼayó ndáaña ndo̱ʼona. Tá ndi̱kó na̱ ni̱xa̱ʼa̱n ñuu Jericó, ni̱ka̱ʼa̱nna ña̱ va̱ʼa ki̱ʼvina ñuu Canaán. Inka ki̱vi̱, ta̱ Josué ni̱ka̱ʼa̱nra xíʼin na̱ ñuu Israel ña̱ ná koo tu̱ʼva ña̱ ku̱ʼu̱nna. Siʼna chi̱ndaʼára na̱ su̱tu̱ na̱ ndíso tú caja ña̱ trato ña̱ ná ki̱ʼvina yu̱ta Jordán. Tá yóʼo kúnuní ni̱xi̱yorá, soo tá ni̱ki̱ʼvi na̱ su̱tu̱ inirá, iin kama ni̱yi̱chi̱rá. Tá ni̱xa̱a̱na ma̱ʼñú yu̱ta, kán xi̱kunditana nda̱a̱ ni̱ya̱ʼa ndiʼi na̱ ñuu Israel inka xiyo. Tá xi̱nina milagro yóʼo, ¿á nda̱kaʼánna xa̱ʼa ña̱ ke̱ʼé Jehová nu̱ú mar rojo?

Ku̱a̱ʼání ku̱i̱ya̱ ni̱ya̱ʼa, tasaá ni̱xa̱a̱ na̱ ñuu Israel ñuu nu̱ú ni̱ka̱ʼa̱n Jehová xíʼinna. Vitin kivi keʼéna veʼena, chiʼina ta saátu xa̱a̱na koona iin ñuu káʼnu. Iin ñuu nu̱ú ni̱xi̱yo leche xíʼin ñu̱ñú xi̱kuuña.