Jehová chi̱ndaʼára ta̱ Jeremías ña̱ na̱túʼunra xa̱ʼara

Jehová nda̱ka̱xinra ta̱ Jeremías ña̱ kuura profeta ñuu Judá. Ni̱ka̱ʼa̱nra xíʼinra ña̱ ku̱ʼu̱nra natúʼunra xíʼin na̱ yiví na̱ íyo kán, ña̱ ná sandákoona ña̱ kini kéʼéna. Ta̱ Jeremías ni̱ka̱ʼa̱nra xíʼin Jehová: “Iin ta̱ loʼova kúi̱ kǒo xínii̱ ña̱ ka̱ʼi̱n”. Soo Jehová ni̱ka̱ʼa̱nra: “Va̱ása yi̱ʼvíún, chi yi̱ʼi̱ ka̱ʼa̱n xíʼún ndáaña ka̱ʼún xíʼinna”.

Jehová ni̱ka̱ʼa̱nra xíʼin ta̱ Jeremías ña̱ ná ndakayara na̱ xi̱ku̱aʼa íyo ñuu kán, ta taʼvíra iin ki̱si nu̱ú ndiʼina ta ka̱ʼa̱nra: “Saá ndoʼo ña̱ ñuu Jerusalén”. Tá ke̱ʼé ta̱ Jeremías saá, na̱ xi̱ku̱aʼa ni̱sa̱a̱nína. Iin ta̱ su̱tu̱ naní Pasjur ka̱nira ta̱ Jeremías ta ka̱túnra ndaʼa̱ra xíʼin xa̱ʼara xíʼin iin tabla. Iníísaá ñu̱ú va̱ása níkivi kanda ta̱ Jeremías. Ta̱ Pasjur ta̱várara nda̱a̱ inka ki̱vi̱. Tasaá ta̱ Jeremías ni̱ka̱ʼa̱nra: “Va̱ása kúndeéka-inii̱. Va̱ása ku̱ʼu̱nkai̱ natúʼi̱n ña̱ ni̱ka̱ʼa̱n Ndióxi̱”. Soo ¿á saá ke̱ʼéra? Va̱ása. Ta̱ Jeremías va̱ʼaka nda̱kanixi̱níra ta ni̱ka̱ʼa̱nra: “Ña̱ ni̱ka̱ʼa̱n Jehová nda̱a̱ táki̱ʼva íyo ñuʼu̱ saá íyoña ndíka̱a̱ña inii̱. Va̱ása kívi sandákoi̱ ña̱ natúʼi̱n”. Xa̱ʼa ña̱yóʼo ta̱ Jeremías kǒo nísandákoora ña̱ natúʼunra xíʼin na̱ yiví.

Ni̱ya̱ʼa ku̱a̱ʼá ku̱i̱ya̱, inka ta̱a xáʼndachíñura ñuu Judá. Na̱ su̱tu̱ xíʼin na̱ profeta vatá sáa̱nína xínina ta̱ Jeremías, ta ni̱ka̱ʼa̱nna xíʼin na̱ príncipe: “Ta̱ ta̱a yóʼo xíniñúʼu kuvira”. Ta̱ Jeremías ni̱ka̱ʼa̱nra: “Tá ná kaʼníndó yi̱ʼi̱, kaʼníndó iin ta̱a ta̱ kǒo ku̱a̱chi. Jehová kúú ta̱ ni̱ka̱ʼa̱n xíʼi̱n ña̱ ka̱ʼi̱n xíʼinndó su̱ví ña̱ kúni̱ miíi̱ kúúña”. Tá xi̱niso̱ʼo na̱ príncipe ña̱yóʼo ni̱ka̱ʼa̱nna: “Va̱ása xíniñúʼu kuvira”.

Ta̱ Jeremías va̱ása nísandákoora ña̱ natúʼunra, soo vitin nda̱a̱ na̱ príncipe ni̱sa̱a̱ ta ni̱ka̱ʼa̱nna xíʼin ta̱ rey ña̱ kaʼníra ta̱ Jeremías. Ta̱ rey ni̱ka̱ʼa̱nra ña̱ va̱ʼa ná keʼéna ña̱ kúni̱ miína. Xa̱ʼa ña̱yóʼo ti̱innara ta̱ chi̱ka̱a̱nara ini pozo nu̱ú ñúʼu nda̱ʼyi̱ ña̱ kuvira. Loʼo tá loʼo ku̱a̱ʼa̱n sáʼvi ta̱ Jeremías ini nda̱ʼyi̱.

Soo iin ta̱ kúúmií iin chiñu káʼnu ta̱ naní Ébed-Mélec ni̱ka̱ʼa̱nra xíʼin ta̱ rey: “Na̱ príncipe chi̱ka̱a̱na ta̱ Jeremías ini iin pozo. Tá ná sandákooyóra kán kuvivara”. Ta̱ rey ni̱ka̱ʼa̱nra xíʼin ta̱ Ébed-Mélec ña̱ ná ku̱ʼu̱n 30 ta̱a xíʼinra ña̱ tavára ta̱ Jeremías. Ta̱ Jeremías kǒo ña̱ʼa níkuchiñu kasi nu̱úra ña̱ natúʼunra xa̱ʼa Ndióxi̱. ¿Á kúni̱ún koún nda̱a̱ táki̱ʼva ni̱xi̱yora?